Benjamin dim pu'adiir yɛla
21
1 Israel dim da pʋn zi'el nɔɔr Misipa teŋin ye ba sɔ'ɔsɔ kʋ zaŋ o pu'ayua tis Benjamin dim dau sɔ' ka o dii. 2 Nidib la da keŋ Betel teŋin zin Wina'am tuonnɛ kaasid agɔla hali ti paae zaam yɛt ye, 3 “Zugsɔba, Israel dim Wina'am! Bɔɔ kɛ ka yɛl kaŋa tʋm Israel teŋinɛ? Bɔ ka zina nwa ka Israel dɔɔg yinne bɔdigɛ?” 4 Bɛogʋ nie la ka nidib la isigi mɛ' bimbimi maal nyu'or maana nɛ taaba la'asʋg maana. 5 Ani ka Israel dim la bu'os ye, “Israel buudi la wʋsa sʋʋgin, teŋ kanɛ nidibi pʋ la'as Zugsɔb la tuon na?” Ba da dɛŋi zi'el nɔɔr ye onɛ wʋsa pʋ la'as Zugsɔb la tuon Misipa teŋinɛ, ba na kʋʋ o. 6 Ka Israel dim sʋnf da san'am nɛ ba ba'abiis banɛ an Benjamin dim la yɛla ka ba ye, “Zina Israel dɔɔg yinne yii ti kallin. 7 Ti na niŋ wala nyɛ pu'abi tis banɛ kpɛlim la; tinamɛ zi'el nɔɔr nɛ Zugsɔb la ye ti kʋ tisi ba ti pu'ayuos ka ba kuli ba la?”8 Ani ka ba bu'os ye, “Israel buudi la wʋsa sʋʋginɛ, teŋ kanɛ nidibi pʋ la'as Zugsɔb la tuon Misipa teŋin na?” Ba da baŋ ye sɔ' pʋ yi Jabis Gilead teŋin kɛn la'asʋg zin'igin la naa. 9 Li anɛ ban da kaal nidib la ka baŋ ye Jabis nimbanɛ yii Gilead la sɔ'ɔsɔ ka' anina. 10 Ala ka la'asʋg la nidib tʋm dap banɛ an zabzabidib tusa pii nɛ ayi' nɛ zaba sʋ'ʋs, ka yɛli ba ye ba kem Jabis Gilead teŋin kʋʋ ba, la'am nɛ pu'ab nɛ biis. 11 Ka yɛli ba ye, “Kʋʋmi dap la wʋsa, nɛ pu'ab wʋsa banɛ nan mi' digin nɛ dau.” 12 Ka ba niŋ ala, ka nyɛ pu'asada kɔbis naasi nimbanɛ bɛ Jabis Gilead teŋin la sʋʋgin ka ba nan pʋ digin nɛ dau, ka ba mɔri ba keŋi ba la'asʋg la zin'igin dinɛ bɛ Siilo teŋin Keenan teŋgbauŋʋn la. 13 Ani ka nidib la wʋsa da tʋm nidib ye ba keŋ Benjamin dim la san'an, zin'ikanɛ an Rimmon tampiingin la, ye ba mɔr sumbʋgʋsʋm nɛ ba. 14 Ala ka Benjamin nidib la da lɛb na, ka ba nɔk pu'asada banɛ ka ba da pʋ kʋ Jabis Gilead la na tisi ba ka ba di. Amaa ba da pʋ paae dap la wʋsaa. 15 Nidib la sʋnf da san'am nɛ Benjamin dim la, bɔzugɔ Zugsɔb la kɛ ka tɔ'ɔŋir kae Israel buudi la ni. 16 Ka la'asʋg la kpɛɛmnam la yɛl ye, “Benjamin dim pu'abi lɛn kae la, ti na niŋ wala paam pu'abi tis dap banɛ kpɛlim la? 17 Benjamin nimbanɛ kpɛlim la sʋm ka ba mɔr banɛ na dii ba faar, ala ka Israel dɔsi'a kʋ bɔdig nyainnɛ. 18 Ti kʋ nyaŋi tisi ba ti pu'ayuos ye ba aan ba pu'aba, tinam Israel dimi sadigim digil nɔɔr la, nɔpɔɔr bɛ onɛ wʋsa tis Benjamin nid pu'a zug. 19 Amaa gɔsima, li kʋ yuugɛ ka Zugsɔb la malʋŋ dinɛ an yʋʋm-yʋʋm la na maal Siilo teŋin. Li bɛnɛ Betel teŋ la datiuŋ baba suokanɛ yi Betel n ken Sekɛm la nya'aŋ, ka bɛ Lebona dagɔbʋg baba la.” 20 Ala ka ba yɛl Benjamin nidib la ye, “Kem su'ae tiwanna pɔɔdin la, 21 ka Siilo pu'asada la ya'a ti yina ye ba la'asi wa'a, yanam zɔm yi pɔɔdin la na gban'e ba maali ya pu'abi mɔri ba kul Benjamin teŋin. 22 Ba saamnam bɛɛ ba tanp ya'a ti nyɔn nɛ ti, ti na yɛli ba ye, ‘Maalimi ti sʋm ka sʋŋi ba, bɔzugɔ zaba la saŋa la ti da pʋ nyɛ pu'abi tisi baa, ka yanam mɛ zi' li ti'irɛ, yanamɛ sadigim pʋ zaŋi ya pu'ayuosi tisi ba ye ba di la nɔpɔɔr la kʋ bɛɛ ya zugɔ.’ ” 23 Alazug Benjamin nidib la da niŋ ala, ka pu'asada la ya'a ɛɛnti wa'ad, dau woo gban'adnɛ pu'a mɔri kun. Ala ka ba da lɛbi ba mɛŋ sʋ'ʋlimin, ka lɛbisi mɛɛ ba tempʋʋd la bɛɛ ani.
24 Saŋkan la Israel dim da bas zin'ikan la ka kul banɛ aan ba dɔɔg dimin, sɔ' wʋsa da keŋ o mɛŋ teŋin.
25 Saŋkan la Israel dim da pʋ mɔr na'aba. Dinzug, sɔ' mɛkama da kʋdim tʋmnɛ o ya'am bɔɔdim.