Levi dim nid nɛ o pu'abil la yɛla
19
1 Saŋkanɛ ka Israel dim da nam pʋ mɔr na'aba la.Ka Levi dim nid onɛ bɛ teŋkpɛŋ lallisa Efiram kʋkʋna teŋin la da di pu'abil Betilehem teŋin linɛ bɛ Juda sʋ'ʋlimin la. 2 Amaa pu'a la da ka' sida sɔba. O da ginnɛ yuod, ka bas o sid la ka lɛbi o saam yin Betilehem Juda sʋ'ʋlimin. Ka on da bɛɛ anina la nwadis anaasi la, 3 o sid da keŋ o san'an ye o bɛlis o ka o lɛbi o san'an na. O da mɔr o tʋmtʋm nɛ bʋmis ayi' keŋ. Pu'a la da mɔr o keŋ o saam yin, ka o saam la nyɛɛ o la, ka di'e o nɛ sumalisim. 4 O diem dau onɛ an o pu'a saam la da bɛllim o ye o kpɛlimi ba san'an, ka o sid kpɛlim o san'an daba atan', dit ka nuud ka gbɛɛnd anina. 5 Daba anaasi daar la ba da dɛŋi duoe bɛogʋn ka o ti'eb ye o gaad, amaa o pu'a la saam la da yɛl o diem la ye ba kɛl ka nyɛ si'eli sʋʋgi ba nɔɔr, ka nyaan kul. 6 Babayi' la da la'as taaba zin'in nɛ di ka nu. Din nya'aŋ la pu'a la saam la da yɛl ye, “M bɛlimnɛ, kʋdim siakim lɛm gbɛn yʋ'ʋŋa ka maal sumalisim!” 7 Dau la da duoe ye o kul la, o diem dau la da bɛllim o ka o gbɛn anina yʋ'ʋŋ kan la.
8 Daba anu daar la bɛkɛung ka o duoe ye o kul. Ka pu'a la saam la da yɛl ye, “Dimi diib ka gu'usi paae nintaŋ!” Ala ka babayi' la da la'asi di hali ti paae zaam. 9 Ani ka dau la nɛ o pu'abil nɛ o tʋmtʋm la duoe ye ba kul. Ka o diem dau la da yɛl ye, “M biiga, gɔsima, zaam kʋdim ma'ae nɛ la. Gbɛɛm kpɛla ka winnig bɔɔdi liigi la. Gbɛɛm ka maal sumalisim. Bɛog bɛkɛung fʋ tun'e gban'e fʋ suori kul.” 10 Amaa, on pʋ bɔɔd ye o lɛm gbɛn yʋ'ʋŋ yinne paas la, dau la da bas ani ka kpa'ad Jebus teŋin (zin'ikan la anɛ Jerusalem), on nɛ o bʋmis ayi' banɛ ka o li'a ba la, nɛ o pu'abil la. 11 Ban da li'el Jebus ka yʋ'ʋŋ bɔɔd sɔb la, tʋmtʋm la da yɛl o zugdaan la ye, “Kɛl ka ti gbɛn Jebus dim tempʋʋgin kpɛla.” 12 O zugdaan la da lɛbis ye, “Ayei, ti kʋ keŋ teŋ zʋŋ banɛ nidibi ka' Israel dim la tempʋʋginɛ.” 13 Ka lɛn yɛl ye, “Kɛl ka ti mɔɔ paae Gibea teŋ bɛɛ Rama n gbɛn zin'iban la yinne ni.” 14 Ala ka ba da kpɛn ken, ka winnig ti kpɛn'ɛd, ban da li'en Gibea dinɛ bɛ Benjamin dɔɔg sʋ'ʋlimin la. 15 Anina ka ba da zi'en ye ba gbɛn. Ba da keŋ zin'in tempʋʋgin la, amaa sɔ' da pʋ nɔki ba kpɛn'ɛsi o yinne.
16 Zakan la bʋnkʋdʋg sɔ' da yi pɔɔginɛ kun na. O da anɛ Efiram linɛ an kʋkʋna teŋ la nid, ka bɛ Gibea teŋin (zin'ikan la nidib la da anɛ Benjamin dɔɔg dim). 17 O da gɔsi nyɛ suoken la tempʋʋgin ka bu'os o ye, “Fʋ wa'ae yaanɛ? Fʋ yi yaanɛ na?” 18 Ka o lɛbis ye, “Ti yinɛ suor zug Betilehem dinɛ bɛ Juda la, wa'ae teŋkpɛŋ kanɛ bɛ Efiram kʋkʋna teŋin la, anina ka m bɛ. M ɛɛnti bɛnɛ Betilehem teŋin Juda sʋ'ʋlimin la ka nannanna m kunnɛ yin. Sɔ' pʋ nɔkimi kpɛn' o yinne. 19 Ti mɔr bʋmis la diib nɛ dinɛ ka ti na tɛ'ɛg ka ba digin, ka mɔri ti mɛŋ diib nɛ daam. Man nɛ m pu'a nɛ dasaŋ la pʋ bɔɔd si'el si'ela.” 20 Bʋnkʋdʋg la da lɛbis ye, “Suor bɛ ka ya na kɛɛn m yin na. Kɛl ka m tisi ya dinɛ wʋsa ka ya bɔɔd. Amaa da digini suorin laa.” 21 Ala ka o dɔlli ba kuli o yin ka diis bʋmis la. Ban da pie ba nɔba naae la, ba da paam si'eli di ka nu. 22 Ban da nam maan sumalisim la, tempʋʋgin la nimbɛ'ɛd sieba da kena gilig yir la nwɛ'ɛd za'anɔɔr la, ka tansid bʋnkʋdʋg kanɛ an yidaan la ye, “Mɔr dau kanɛ kɛɛn fʋ yin la na ka ti digin nɛ o!” 23 Yisɔb la da yina yɛli ba ye, “Ayei, m zuanama, da tʋmmi dinɛ an zuziiga. Dau kaŋa sadigim an man saan la, da tʋmmi nyan tʋʋm kaŋa! 24 Gɔsima, man pu'ayua onɛ nan zi' dau nwana, nɛ dau la pu'abil la, m na mɔri ba yi nannanna na tisi ya. Ya na tun'e digin nɛ ba ka maali ba yanamɛ bɔɔd si'el. Amaa ya'a kpɛlim dau kaŋa nwa, da tʋm o nyan tʋʋm kaŋa.” 25 Amaa ba da pʋ kɛlis on yɛti ba si'el la, ka dau la gʋ'ʋŋi nɔk o pu'abil la tisi ba, ka ba bibig o san'am o yʋ'ʋŋ la wʋsa, ka bɛogʋ ti nied la ka ba nyaan bas o. 26 Bɛogʋ nie naae la ka pu'a la lɛb yikanɛ ka o sid la bɛ la za'anɔɔrini digi teŋin hali ka winnig ti tans na. 27 O sid la da duoe bɛogʋn yɔ'ɔg yir la za'anɔɔr ka yina ye o tɔlis tuon la, ka o pu'abil la lii digi yir la za'anɔɔrin ka o nu'us bɛ za'anɔɔrin la. 28 O da yɛl o ye, “Duom ka ti keŋ!” Amaa o da pʋ ya'ae nɔɔrɛ. Ani ka dau la zaŋ o pa'al o bʋŋ zugʋ mɔri kul.
Levi dau pu'abil ka ba kʋ ka o buudi sʋʋnr duoe
29 On paae yin la, o zaŋ nɛ sʋ'ʋgʋ nwaa o pu'a la zin'is pii nɛ ayi' ka nɔki tʋm tis Israel dɔɔd pii nɛ ayi' la bɛ zin'isi'a wʋsa. 30 Onɛ wʋsa nyɛɛ li la yɛl ye, “Tʋʋm kaŋa nan zi' maal bɛɛ ti nyɛɛ li, din yi Israel dimi da yi Egipt teŋin na la. Tɛn'ɛsimini li! Gɔsimini li! Yɛlimi ti tinamɛ na niŋ si'em.”