Dan dɔɔg dimi bɔɔd ye ba yaligi ba sʋ'ʋlim la yɛla
18
1 Saŋkan la Israel da pʋ mɔr na'aba, ka Dan dɔɔg dim la mɛ bɔɔd paalʋ dinɛ ka ba na zin'in ka li aan ba mɛŋ din, bɔzugɔ ba da nam pʋ la'as nɛ Israel dim buudi la ka na di faarɛ. 2 Alazug Dan dim la da tʋm zabzabidib anu ka ba yi Zora nɛ Esitaol keŋ ye ba labisi gɔs zin'ig la. Nimbama da zi'enɛ ba dɔɔd la wʋsa nɔba zug. Ba da yɛli ba ye, “Kem giligi teŋgbauŋ la gɔs.”Dap la da kpɛn' Efiram sʋ'ʋlim linɛ an kʋkʋna teŋ la ti paae Maika yin na. Anina ka ba da gbɛn. 3 Ban da li'el Maika yin la ba da baŋ Levi nid la, ka kpɛn' anina bu'os o ye, “Anɔ'ɔnɛ mɔrif kpɛla na? Ka fʋ tʋm bɔ kpɛla? Bɔ ka fʋ bɛ kpɛla?” 4 O da yɛli ba Maika maal si'em tis o, ka ye, “O nɔkim nɛ ye m aan o maanmaan.” 5 Ka ba yɛl o ye, “Asɛɛ ka fʋ bu'os Wina'am gɔs ye ti ken la suor na an sʋ'ʋŋa tisi tii?” 6 Ka Maanmaan la lɛbisi ba ye, “Kemi nɛ sumalisim. Zugsɔb la yɔ'ɔg suori tisi ya.”
7 Alazug nidiba anu la da gaadi keŋ paae Lais teŋin na. Zin'ikan la ka ba da nyɛ nidib la bɛllim ka si'el pʋ daamidi baa, nwɛnɛ Sidon dim nɛ ka pʋ tɛn'ɛsid si'ela, ka mɔr sumalisim. Si'el-si'el da pʋ pansigi ba teŋin la, ba da mɔr kpan'am ya'as. Ba da bɛnɛ lalli nɛ Sidon dim la ka pʋ mɔr nɔnaar nɛ sɔ'ɔsɔ'ɔɔ.
8 Ban da lɛb Zora nɛ Esitaol tɛɛnsin la, ba ba'abiis la da bu'osi ba ye, “Ya keŋi gɔsi nyɛ ka li an wala?” 9 Ka ba lɛbis ye, “Kemi na ka ti zab nɛ ba! Ti nyɛya ka teŋ la an sʋm hali. Maalimi tɔ'ɔtɔ ka ti keŋ di'e teŋ la. 10 Ya ya'a paae anina, ya na nyɛ nimbanɛ ka ba ba'a kae nɛ si'ela, nɛ teŋ kanɛ yalim ka Wina'am zaŋi niŋi ya nu'usin, teŋ kanɛ ka si'el-si'el pʋ pansigi ba.”
11 Ani ka dap kɔbisyuobʋ banɛ an Dan dɔɔg nidib la bɔb nɛ zaba la'ad, ba da yinɛ Zora nɛ Esitaol tɛɛnsini keŋ. 12 Ban da yi suorin la ba da la'asi zi'en zin'ikanɛ kpi'e Kiriaf Jiarim teŋin linɛ bɛ Juda sʋ'ʋlimin la. Linɛ kɛ ka ba da buon zin'ikanɛ bɛ Kiriaf Jiarim teŋ ya-tuona la ye, Mahane Dan n ti paae zina la. 13 Ban yii anina la ba keŋ nɛ Efiram dinɛ an kʋkʋna teŋ la keŋ paae Maika yin na.
Bada nɛ maanmaan la yɛla
14 Ani ka dap anu banɛ da keŋ kaae Lais teŋ la yɛli ba taaba la ye, “Ya mi' ye ya' bama nwa ni yir yinne bɛɛ anina mɔr teŋgban nɛ winsieba banɛ bɛ yir wʋsa ni, nɛ ba'ar kanɛ ka ba kpi'a nɛ onɛ ka ba ya'abɛɛ? Nannanna ya mi' yanamɛ na niŋ si'em.” 15 Alazug ba da fɛndigi lɛbi keŋ dasaŋ kanɛ an Levi dim nid ka bɛ Maika yin la san'anɛ pʋ'ʋs o. 16 Ka dap banɛ an kɔbisyuobʋ ka an Dan dim ka yi nɛ zaba la'ad la kpɛn zi'en za'anɔɔrin la. 17 Ka dapa anu banɛ da keŋ kaae teŋ la kpɛn' tempʋʋgin zaŋ ba'ar kanɛ ka ba kpi'a la, nɛ teŋgban la, nɛ wina banɛ bɛ yin la wʋsa, nɛ ba'ar kanɛ ka ba kpia la; ka maanmaan la zi'e za'anɔɔrin la, zabzabidib kɔbisyuobʋ la san'an. 18 Nimbama da kpɛn' Maika yinne zaŋ bada la wʋsa, ka maanmaan la bu'osi ba ye, “Bɔɔ la ka ya maan na?” 19 Ka ba lɛbis o ye, “An baanlimm! Da yɛl si'ela. Kem na dɔlli ti ka aan ti saam nɛ ti maanmaan. Li ka' sʋm nɛ fʋn na tʋm tis dɔɔg nɛ tuŋ yinne Israel teŋin gaad fʋn an dau yinne nɛ o yidim maanmaan naa?” 20 Ani ka maanmaan la sʋnf ma'ae. Ka o zaŋ teŋgban la nɛ yin wina la wʋsa nɛ ba'ar kanɛ ka ba kpi'a la dɔl nidib la keŋ. 21 Ba da zaŋi ba bibibis la, nɛ ba bʋnkɔnbid nɛ ban sʋ'oe si'el wʋsa niŋi ba tuon, ka fɛndigi gaad. 22 Ban da yi Maika yinne lalig bi'ela la, nimbanɛ kpi'e Maika yin la da la'as taaba zɔɔ geŋ Dan dɔɔg nidib la sa'an. 23 Ban da tansi buoli ba la, Dan nidib la da fɛndigi yɛl Maika ye, “Fʋ labaar an bɔ ka fʋ buoli fʋ nidib ye fʋ zabɛ?” 24 O da lɛbisi ba ye, “Ya zaŋ wina banɛ ka m maal la, nɛ m maanmaanni mɔri keŋ. Bɔ ka m lɛm mɔr ya'asɛ? Bɔ ka ya bu'osidim ye m labaar an bɔ?” 25 Dan dɔɔg nidib la da lɛbis ye, “Da nwa'asid nɛ tii, ya'a ka' alaa, banɛ sʋnya dɛŋi pɛlig la na zab nɛ ya, ka fʋn nɛ fʋ yidim wʋsa na kɔ'ɔŋi ya nyɔvʋr.” 26 Alazug Dan dɔɔg nidib la daa gaad; Maika n da nyɛ ka ba paŋ gat o la, ka o fɛndigi lɛbi kul.
Dan dɔɔg dimi zab nɛ Lais teŋ dim banɛ zi' zaba ti'ir la yɛla
27 Ani ka ba zaŋ Maika maal si'el la wʋsa nɛ o maanmaan la keŋ Lais teŋin tʋ'ʋs nimbanɛ mɔr sumalisim ka pʋ mɔr zaba pʋtɛn'ɛrɛ. Ba da zab nɛ ba, ka nyu'oe ba tempʋʋg la. 28 Sɔ' da kae na faaɛn ba bɔzugɔ ba da lal nɛ Sidon ka mɛ pʋ mɔr nɔnaar nɛ sɔ'ɔsɔ'ɔɔ. Tempʋʋg la da bɛnɛ bɔn'ɔgin ka pʋ lal nɛ teŋ kanɛ buon Bet Rehob laa.
Dan nidib la da maali mɛ' tempʋʋg la zin'in anina. 29 Ba da zaŋi ba yaab Dan yʋ'ʋri pʋd teŋ la ye Dan Teŋ. Dan onɛ da an Jakob biig la, la'am nɛ ban da dɛŋi buon teŋ la yʋ'ʋr ye Lais la. 30 Anina ka Dan dɔɔg dim la nɔk ba'ar la zi'el, ka Jonatan onɛ an Gersom biig, ka an Moses yaaŋ la aan ba maanmaan. On nɛ o yaas la da an maanmaannibi ti paae saŋkanɛ ka ba da kena zabi gban'e ba mɔri keŋ ka ba lieb yammis la. 31 Wina'am Sʋgʋr la da bɛ Siilo teŋin saŋa si'a la wʋsa, ba da kpɛm maan bada banɛ ka Maika maal la.