Maika yɛla
17
1 Dau da bɛ Efiram linɛ an kʋkʋna teŋ la ka o yʋ'ʋr buon Maika. 2 O da yɛl o ma ye, “Fʋ anzurifa ligidi tusir nɛ kɔbiga daa bɔdig, ka m wʋm ka fʋ pɔ nɔɔri tis o sɔb, ligidi la bɛɛ m san'an; manɛ daa nɔki li.” Ani ka o ma la yɛl ye, “M biiga, Zugsɔb la na niŋif bareka!” 3 On da nɔk anzurifa ligidi tusir nɛ kɔbiga la lɛbisi tis o ma la, o ma da lɛbis ye, “M na zaŋ anzurifa ligidi la tis Zugsɔb, ka li an nimmua maannɛ m biig la yɛla, ka kpi'a ba'ari maali li wʋʋ nid nɛ, ka maal anzurifa ba'ar, ka nɔki lɛbisi tisif.” 4 La'am nɛ lin wʋsa, o da lɛbis anzurifa la tis o ma, ka o yis anzurifa ligidi la kɔbisyi' tis banɛ tʋm anzurifa tʋʋma la ka ba maal bada la, ka nɔki zi'el Maika yin. 5 Ka dau kanɛ yʋ'ʋri buon Maika la da mɔr teŋgbana zin'ig ka maal wina niŋ ani, ka sɛn dansik ka gaŋ o biig yinne ka o an maanmaan. 6 Saŋkan la Israel da pʋ mɔr na'aba, sɔ' wʋsa da tʋm nɛ dinɛ malis o.7 Dasambili da bɛɛ an Levi dɔɔg nid ka yi Betilehem linɛ bɛ Juda sʋ'ʋlimin la. 8 O da bas teŋ kan la ka duoe ieed zin'ig ye o zin'in, ka keŋ paae Maika yin dinɛ bɛ Efiram kʋkʋna teŋin la. 9 Maika da bu'os o ye, “Fʋ yi yaanɛ na?” Ka o lɛbis ye, “M anɛ Levi dɔɔg nidi yi Betilehem Juda teŋin na, ka ieed zin'ig ye m zin'in.” 10 Ani ka Maika yɛl o ye, “Bɛi nɛ man ka lɛbigi m saam nɛ m maanmaan, ka m na tisif anzurifa ligidi piiga yʋʋm wʋsa pʋʋgin, la'am nɛ fʋ fuud nɛ diib wʋsa.” 11 Alazug ka Levi dɔɔg nid la da siak ye o na bɛ nɛ o. Dasaŋ la yʋ'ʋn da nwɛnɛ o mɛŋ biis la yinne nɛ. 12 Maika da zin'il Levi dɔɔg nid la ani, ka o lɛbig o maanmaan ka bɛɛ o yin la. 13 Ka Maika yɛl ye, “Nannanna m mi' ye Zugsɔb la na sʋŋim, Levi nid nwa sadigim lɛbigi m maanmaan la.”