Samson n bɛ Gaza teŋin la yɛla
16
1 Daar yinne ka Samson keŋ Gaza teŋin, ka nyɛ pu'agɔɔndir ka keŋ ye o gbɛn pu'a la sa'an. 2 Ba da yɛl Gaza nidib la ye, “Samson bɛ kpɛla!” Alazug ba da gur o teŋ la za'anɔɔrin. Yʋ'ʋŋ kan wʋsa ba da pʋ vurigɛ ka yɛt ye bɛog ya'a nie ba na kʋ o. 3 Amaa Samson da diginnɛ ti paae yʋ'ʋŋ tisʋʋs ka duoe gban'e teŋ la za'anɔya kɔlis la, nɛ li daad banɛ ba' la wʋsa, vɔn' za'anɔya ayi' la buki o biankimpiiung zugʋ mɔri keŋ pa'al zuokanɛ kpa' Hebron teŋ la zug.Samson nɛ Delila yɛla
4 Lina nya'aŋ, ka o nyɛ pu'a sɔ' ya'as Sorek bɔn'ɔgin la bɔɔd. Pu'a la yʋ'ʋri da buon Delila. 5 Filistia teŋ sʋ'ʋdib la da kɛɛn o san'an na yɛl o ye, “Fʋ ya'a na nyaŋi bɛlis o ka o pa'ali fʋ o yɛlsu'adir dinɛ aan o paŋ tita'ar la, nɛ tinamɛ na niŋ si'em nyaŋ o ka lɔɔ o. Ti wʋsa yinne-yinne na tisif anzurifa gbila tusir nɛ kɔbig-kɔbig.” 6 Delila da yɛl Samson ye, “Yɛlimi fʋ paŋ tita'ar la yɛlsu'adir la an si'em, nɛ sɔ' na niŋ si'em lɔɔf ka nyaŋif.” 7 Samson da lɛbis ye, “Sɔ' ya'a lɔɔm nɛ tiraug nwiis ayɔpɔi banɛ an bʋmma'asa ka nam pʋ kʋdigɛ, m na lieb tadim nwɛnɛ sɔ' wʋsa an si'em la.” 8 Ani ka Filistia teŋ sʋ'ʋdib la tis pu'a la tiraug nwima'asa ayɔpɔi dinɛ nam pʋ kʋdigɛ, ka o zaŋi li lɔɔ o. 9 Ka dap kena su'a dɔɔgin la, ka pu'a la tansi buol o ye, “Samson, Filistia dim la paae fʋ san'an na!” Amaa ka o kɛns nwiis la nwɛnɛ gum gaarigi na li'el bugum nɛ. Ala ka ba da pʋ baŋ yɛlsu'adir linɛ tisid o paŋ la. 10 Anina ka Delila yɛl Samson ye, “Fʋ buolim nɛ zɔlʋg ka ma'am! Nannanna kem na yɛlim ban na niŋ si'em lɔɔf.” 11 Ka o yɛl o ye, “Sɔ' ya'a lɔɔm sʋ'ʋŋa nɛ nwipaala dinɛ ka ba nam pʋ nɔki li lɔɔ si'el si'ela, m na lieb tadim nwɛnɛ sɔ' wʋsa an si'em la.” 12 Alazug Delila da zaŋ nwipaala lɔɔ o, ka dap kena su'a dɔɔgin la, ka o tansi buon o ye, “Samson, Filistia dim la paae fʋ san'an na!” Amaa ka o kɛns nwiis la o nu'usin nwɛnɛ gum gaarig nɛ. 13 Delila da lɛn yɛl Samson ye, “Hali nɛ nwa, fʋ nan kpɛm buonim nɛ zɔlʋg ka ma'adim. Yɛlim ban na niŋ si'em ka lɔɔf!” Ka o lɛbis o ye, “Fʋ ya'a pan'ami m zuobid la ayɔpɔi kpɛn'ɛs sʋlʋgini ʋg nɛ pien la naae ka kpa' li nɛ kpada, m na lieb tadim nwɛnɛ sɔ' wʋsa an si'em la.” Alazug o da bɛ gbɛɛmin ka Delila gban'e o zuobid la pan'ami li ayɔpɔi nɔki naal gumme ʋg nɛ pien, 14 ka kpa' nɛ kpada. Ka lɛn tansi buol o ya'as ye, “Samson, Filistia dim la paae fʋ san'an na!” Ka o nie gbɛɛmin ka tɛɛg kpada la vuoɛn nɛ gum la nɛ sʋlʋg dinɛ ka ba nɔki ʋg piena la wʋsa.
Delila n namis Samson la yɛla
15 Ani ka Delila yɛl o ye, “Fʋ na niŋ wala yɛl ye fʋ nɔŋim, ka kʋ pie fʋ pʋʋgʋ tisi ma? Nɛ'ɛŋa paas nɔɔr atan' ka fʋ pan'asim ka pʋ yɛlimi fʋ paŋ tita'ar la yɛlsu'adir la gbinnɛ.” 16 Muguskaŋa ka o da zi'e o zugin daar wʋsa ka o yaama ti yi. 17 Ani ka o yɛl o si'el wʋsa, ye, “Barig nan zi' kpɛn' man zugʋ nɛ, bɔzugɔ m anɛ Naazir nid onɛ ka Wina'am gaŋ hali m du'am saŋa sa. M zug la ya'a pʋn, m paŋ la na yii m san'an ka m lieb tadim nwɛnɛ sɔ' wʋsa an si'em la.” 18 Delila yʋ'ʋn da baŋ ye o yɛl o si'el wʋsa la, o da tʋm yɛl Filistia teŋ sʋ'ʋdib la ye, “Lɛmmi na ya'as, ka o yɛlim si'el wʋsa.” Ani ka Filistia teŋ sʋ'ʋdib la lɛb na ka zanl anzurifa ligidi la ba nu'usin. 19 Ka o kɛ ka o gbis o nɔba zug ka o buol dau ka o kena pʋni o zuobid ayɔpɔi dinɛ pan'am la. Delila yʋ'ʋn da nyaŋ o ka o paŋ la zɔ ka kɛɛ o. 20 Ani ka o tansi buol ye, “Samson, Filistia dim la paae fʋ san'an na!” Ka o nie gbɛɛmin ka tɛn'ɛs ye, “M na yi, nwɛnɛ man ɛɛnti yit si'em la, ka dammi m mɛŋ ka si'el kʋ gu' ma,” amaa ka pʋ baŋ ye Zugsɔb la bas o nɛ. 21 Ani ka Filistia dim la nyaŋ o ka kpig o nini la wʋsa, ka mɔr o keŋ Gaza teŋin. Ka ba lɔɔ o nɛ kʋntzɛn'ug baans, ka kɛ ka o bɛ sanrega dɔɔgin la nɛ'ɛm ki tisidi ba. 22 Amaa ban da pʋn o la nya'aŋ, o zuobid la da lɛm pin'ili busid.
Samson n yɔ sam O kumin si'em
23 Filistia dim teŋ sʋ'ʋdib la da la'as ye ba maal maantita'ari tis Dagon onɛ aan ba win la, ka maal di'ema yɛt ye,
“Ti win la zaŋ Samson onɛ aan ti bi'em la
niŋi ti nu'usin!”
24 Nidib la da nyɛɛ o la, ba zun'e ba win la yɛt ye,
“Ti win la zaŋ Samson, onɛ aan ti bi'em la, niŋi ti nu'usin,
Samson onɛ san'ami ti teŋ ka kʋʋ ti nidib bɛdegʋ la.”
25 Ba sʋnya da ma'ae hali galis la, ba da tansid ye, “Mɔri Samson n yina ka o di'em tisi ti!” Ka ba buol Samson ka o yi sanrega dɔɔgin la na di'em tisi ba. Ba da kɛ ka o zi'e zan'antɔlis ayi' la teŋsʋk. 26 Samson da yɛl biig onɛ mɔr o nu'ug la ye, “Kɛl ka m zi'en zin'ikanɛ ka m na nyaŋi babil zan'antɔlbanɛ ti'e pʋ'ʋsim dɔɔg la, ka zaŋi m mɛŋi dɛllim.” 27 Pʋ'ʋsim dɔɔg la da pɛ'ɛl nɛ dap nɛ pu'ab, ka Filistia dim teŋ sʋ'ʋdib la wʋsa bɛɛ ani. Dap nɛ pu'ab banɛ kalli an wʋʋ tusa atan' da bɛ dɔɔg la zugin gɔsid Samson di'ema la. 28 Anina ka Samson sɔs Zugsɔb la ye, “Zugsɔb onɛ gaad si'el wʋsa, tɛnri m yɛl. Wina'am, m sɔsidif nɛ kpɛmisimim yimmʋ ya'as, ka kɛ ka m nwɛ' yimmʋ ma'aa yɔ Filistia dim sam m nini ayi' nwa yɛla.” 29 Samson da paae gban'e zan'antɔlis ayi' banɛ bɛ sʋʋgin ka ti'e pʋ'ʋsim dɔɔg la mɔr la ka zaŋ o mɛŋi dɛlli ba, ka zaŋ o datiuŋ nu'ugʋ gban'e yinne ka o dagɔbʋg nu'ug mɛ gban'e yinne. 30 Ka Samson yɛl ye, “Kɛl ka m la'am kpi nɛ Filistia dim la!” Ka tɛbig nɛ o paŋ wʋsa ka pʋ'ʋsim dɔɔg la li teŋ sʋ'ʋdib la nɛ nimbanɛ bɛɛ ani la wʋsa zug. O da kʋ nidib bɛdegʋ o kum saŋa la, ka li gaad on da nan vʋe ka kʋ si'em la.
31 Ani ka o bieya nɛ o pitib, o saamnam nɛ o yidim wʋsa keŋ yis o. Ba da mɔr o lɛb na mum o Zora nɛ Esitaol tɛɛnsin la teŋsʋk, o saam Manoa yaʋgʋn. O da an Israel tuongat nɛ yʋma pisi.