Samson n nyu'oe Filistia dim zʋʋd la yɛla
15
1 Lin nya'aŋ, li da paae ki bunib saŋa, ka Samson mɔr bʋʋgʋ keŋ ye o kaae o pu'a. O da yɛl ye, “M kpɛn'ɛdnɛ m pu'a dɔɔgin.” Amaa o pu'a la saam da pʋ siak ye o kpɛn' o pu'a la dɔɔginɛ, 2 ka yɛl o ye, “Man mi' sʋ'ʋŋa ye fʋ pʋ bɔɔd o, din ka m zaŋ o tisi fʋ zua. O pitʋ la pʋ vɛnli gat oo? Tiakim nɔk on la.” 3 Samson da yɛli ba ye, “Nannanna m sid mɔr suori na paam Filistia dim la. M sid na maali ba bɛ'ɛd.” 4 Ala ka o da yii gban'e zunna kɔbistan' lɔɔ ba ta'al ayi', yi', ka zaŋ mɔɔdi lɔ on ta'al sieba la wʋsa zʋya. 5 O da zaŋ bugum vian'as mɔɔd la bʋnkɔnbid la zʋya ni, ka kadi ba kpɛn'ɛs Filistia dim ki pɔɔdin. Ka ba kpɛn' nyu'oe pɔɔd la nɛ linɛ ka ba buni digil la la'am nɛ olif tiis nɛ vain tiis pɔɔd la wʋsa. 6 Filistia dim la da bu'os ye, “Anɔ'ɔn tʋm nɛ'?” Ka ba yɛli ba ye, “Li anɛ Samson, onɛ an Timna dim dau la diem, bɔzugɔ ba daa zaŋ o pu'a la tis o zua.” Alazug Filistia dim la da keŋ nyu'oe pu'a la nɛ o saam la wʋsaa kʋ. 7 Samson da yɛli ba ye, “Yanamɛ sadigim tʋm si'em la, man kʋ basɛ, asɛɛ ka m ti yɔ sam!” 8 O da tʋ'ʋsi ba nɛ zaba hali ka dabiem bɛ, n kʋʋ ba bɛdegʋ. O da duoe keŋ Etam kpɛn' tampinyɔkin bɛɛ anina.Samson n kʋ Filistia dim tusir la yɛla
9 Filistia dim la da keŋ la'as taaba Juda teŋin yadig hali li'el Lehi teŋ la. 10 Juda nidib da bu'osi ba ye, “Bɔ ka ya kena ye ya zab nɛ ti?” Ba da lɛbis ye, “Ti kena ye ti gban'e Samson n lɔɔ niŋ o wʋʋ on niŋ tinam si'em la.” 11 Ani ka nidib tusa atan' yi Juda keŋ Etam tampinyɔkin la yɛl Samson ye, “Fʋ zi' ye Filistia dim la sʋ'oe tii? Bɔ ka fʋ maali ti wala?” Ka o lɛbisi ba ye, “M maali banɛ ban maalim si'em la lɛbis.” 12 Ka ba yɛl o ye, “Ti kɛnɛ na ye ti lɔɔ fʋ zaŋi tis Filistia dim la.” Ka Samson da lɛbisi ba ye, “Pɔɔmi ye ya kʋ kʋʋmi ya mɛŋa!” 13 Ka ba lɛbis ye, “Ti ye ti lɔɔf nɛ ma'aa nɔki tisi ba ka ti kʋ kʋʋ fɔ.” Alazug ba da lɔɔ o nɛ nwipaala ayi' mɔr o yis tampiingin la na. 14 On da li'en Lehi teŋ la, Filistia dim da tansid agɔla gɔla kennɛ o san'an na. Zugsɔb Siig la da kɛɛn o san'an na nɛ paŋ. Nwiis banɛ bɛɛ o nu'usin la da nwɛnɛ li anɛ gum nɛ tɔnsi o nu'usin la li. 15 Ka o nyɛ bʋŋ yier ka pi'igi li kʋ nidib tusir. 16 Anina ka Samson yɛl ye,
“Bʋŋ yier ka m zaŋi kʋʋ ba digil kuda-kuda!
Bʋŋ yier ka m nɔki kʋ nidib tusir.”
17 On pian' naae la o lɔb kɔnbir la bas; ka ba buon zin'ikan la ye Ramaf Lehi. 18 Ku'onuud yʋ'ʋn da mɔr o nɛ, ka o kaasi buon Zugsɔb la ye, “M Zugsɔba! Fʋnɛ tisim nyaŋ kaŋa, ka li sʋm ye m kpiid ku'onuud ka li banɛ pʋ kpɛn' baŋʋ la nu'usinɛ?” 19 Ani ka Wina'am kɛ ka ku'om tans teŋin la na; ka Samson nu, ka o paŋ lɛb na ka o kpɛ'ɛŋ. Ala ka ba buon ku'om la yit si'el la ye Een-Hakkore. Li nan kpɛm bɛ Lehi teŋin la.
20 Samson da gur Israel teŋ la nɛ yʋʋm pisi, Filistia dim saŋa la.