Samson pu'adiir yɛla
14
1 Samson da duoe keŋ Timna teŋin ka nyɛ Filistia dim pu'asadir ani. 2 On da lɛbi kul la, o da yɛl o saam nɛ o ma ye, “M nyɛ Filistia dim pu'asadir Timna teŋin; li'aminɛ o tisim ka m di o.” 3 O ba' nɛ o ma da lɛbis o ye, “Pu'a kanɛ narif ka' fʋ sizuopin la bɛɛ ti nidibin la wʋsa? Li anɛ tilas ye fʋ keŋ Filistia dim banɛ pʋ kpɛn' baŋʋ la ni di pu'a?” Amaa Samson da lɛbis ye, “Li'aminɛ o tisim! Onɛ an onɛ nar nɛ man.” 4 O saam nɛ o ma da pʋ baŋ ye nɛ' yinɛ Zugsɔb onɛ bɔɔd ye o maal suori zab nɛ Filistia dim la san'an na; bɔzugɔ saŋkan la banɛ da sʋ'oe Israel dim la.Samson n kʋ gbigim la yɛla
5 Samson da keŋ Timna, on nɛ o saam nɛ o ma. Ban da paad Timna teŋ dim tiis pɔɔdin la, gbigimpɔl da duoe anina kaasidi kpa'ad o na. 6 Zugsɔb Siig da sigi o san'an na nɛ paŋ ka o tɔɔns gbigim la nɛ o nu'us nwɛnɛ bʋbil ka o gban'e tɔɔnsid nɛ. Amaa o da pʋ yɛl o saam bɛɛ o ma on niŋ si'ela. 7 Ani ka o keŋ nyɛ pu'a la sɔns nɛ o, ka o ya'am kpɛn' o.
8 Ka lin nya'aŋ ka o da lɛbid ye o dii o pu'a la, ka bie nyɛ gbigim kpiiluŋ la, ka siins bɛ gbigim kpiiluŋin la ka siind mɛ bɛ. 9 Ka o tʋm baae siind la ken ka dit. On da lɛbi o saam nɛ o ma san'an la, o da tisi ba ka ba mɛ di. Amaa o da pʋ yɛli ba ye o taab siind la nɛ gbigim kpiiluŋʋ nɛ. 10 O saam la da keŋ ye o nyɛ pu'a la, ka Samson maal diibi la'as nidib ka ba di, nwɛnɛ ba malʋŋ la zi'el ye pu'a paal sid maal si'em la. 11 Ban da nyɛɛ o la, ba da zaŋ o taaba pistan' tis o. 12 Samson da yɛli ba ye, “Kɛl ka m tisi ya bʋgʋlʋm-bʋgʋlʋm ka ya ya'a nyaŋi lɛbisi tisim daba ayɔpɔi nwa sʋʋgin, m na tisi ya banaas pistan' nɛ fusieba pistan'. 13 Ya ya'a kʋ nyaŋi yɛli li gbinnɛ, asɛɛ ka ya tis man banaas pistan' nɛ fusieba pistan'.” Ba da yɛl o ye, “Yɛlimi ti fʋ bʋgʋlʋm-bʋgʋlʋm la ka ti wʋm!” 14 Ka o lɛbisi ba ye,
“Onɛ dit la ni, ka si'el yina ye ba di;
onɛ an paŋ sɔb la pʋʋgin ka ba nyɛ bʋmmalisiŋ.”
Li da mɔri paae daba atan' ka ba pʋ nyaŋi baŋi li gbinnɛ, 15 daba anaasi daar la, ba da yɛl Samson pu'a ye, “Bɛlisimi fʋ sid la ka o yɛli ti o bʋgʋlʋm-bʋgʋlʋm la gbin, ya'a ka' alaa, ti na nyu'oe fʋn nɛ fʋ saam la yir wʋsa ka ya kpi. Ya buoli ti na ye ya faaɛn tii?” 16 Ani ka Samson pu'a bibig o ka kum, ka gɛn'ɛdi yɛt ye, “Fʋ kis mam nɛ! Fʋ pʋ nɔŋi ma. Fʋ zaŋ bʋgʋlʋm-bʋgʋlʋm tisim nidib ka pʋ yɛl man bʋgʋlʋm-bʋgʋlʋm la gbinnɛ.” Ka o lɛbis o ye, “Mam pʋ nyaŋi yɛli m saam bɛɛ m ma li gbinnɛ. Bɔzug ka m na pa'ali fʋ li gbinnɛ?” 17 O pu'a la da kaas daba ayɔpɔi diib di'ema la saŋa la wʋsa. Alazug daba ayɔpɔi la daar o da gʋ'ʋŋ ka yɛl o, bɔzugɔ o da daam o nɛ galis. Pu'a la mɛ da yɛl o nidib la bʋgʋlʋm-bʋgʋlʋm la gbin. 18 Winnig da nam pʋ lii ka teŋ la nidib la'as o san'an na yɛl o ye,
“Bɔɔ malisi gat siindɛ?
Bɔɔ mɔr paŋi gat gbigimɛ?”
Samson da yɛli ba ye,
“Oi! Ya nɔki m na'asa'a la kuod!
Ya ya'a daa pʋ pan'asi nɛ m sabua laa,
Ya naan kʋ baŋinɛ li gbinnɛ.”