Samson n zab nɛ Filistia dim la
13
1 Israel dim da lɛn tʋm bɛ'ɛd ya'as Zugsɔb la nifin, ka Zugsɔb la zaŋi ba niŋ Filistia dim nu'usin yʋʋma pisnaasi.2 Zora dim dau sɔ' da bɛ ka o yʋ'ʋr buon Manoa, o da anɛ Dan dɔɔg nid, o pu'a da anɛ kʋndu'ar ka pʋ mɔr biiga. 3 Zugsɔb maliak da nie pu'a la san'an ka yɛl o ye, “Fʋ anɛ kʋndu'ar ka pʋ mɔr biiga, amaa fʋ na tʋk pʋʋgʋ du'a biribiŋ. 4 Nannanna kpɛ'ɛŋimi fʋ mɛŋ ka da nu daam buudi wʋsa, ka mɛ da di bʋnkanɛ kisa, 5 bɔzugɔ fʋ na tʋk pʋʋgʋ du'a biribiŋ, ka o zug kʋ pʋn nɛ bariga bɔzugɔ biig la ye o anɛ Naazir ninkanɛ ka Wina'am na gaŋ o, o du'am saŋa, ka o na pin'ili faaɛn Israel dim Filistia dim nu'usin ka tisi ba yɔlisim.” 6 Ka pu'a la keŋ o sid san'anɛ yɛl o ye, “Wina'am nid kɛɛn m san'an na. O nwɛnɛ Wina'am maliak nɛ, ka o gɔsig la mɔr dabiem. Man pʋ bu'os o on yi si'el naa, ka o mɛ pʋ yɛl man o yʋ'ʋrɛ. 7 Amaa o yɛl man ye, ‘Fʋ na tʋk pʋʋgʋ du'a biribiŋ. Alazugɔ, nannanna, da lɛn nu daam buudi wʋsa ka mɛ da di bʋnkanɛ kisa bɔzugɔ biig la ye o anɛ Naazir nid Wina'am san'an din yii o du'am saŋa ti paae o kum daar.’ ”
Manoa winsɔsʋg yɛla
8 Ani Manoa da sɔs Zugsɔb ye, “M Zugsɔba, m bɛlimnɛ, kɛl ka Wina'am dau kanɛ ka fʋ daa tʋm o na la lɛb na ya'asi pa'ali ti tinamɛ na ti mɔr biribiŋ kanɛ ka ti ye ti du'a la si'em.”
9 Wina'am da wʋm tis Manoa, ka Wina'am maliak la lɛn lɛb pu'a la san'an na, saŋkanɛ ka o da yii bɛ pɔɔgin la; amaa o sid Manoa da ka' anina. 10 Pu'a la da zɔ tɔ'ɔtɔ keŋ yɛl o sid ye, “Dau kanɛ daa nie o mɛŋi m san'an daakaŋa la lɛb na.” 11 Manoa da duoe dɔl o pu'a la keŋ, ka on paae dau la san'an la o yɛl dau la ye, “Fʋnɛ daa pian' tisim pu'a laa?” Ka o lɛbis ye, “Manɛ la.” 12 Manoa da bu'os o ye, “Fʋ pian'ad la ya'a ti niŋ amɛŋa, biig la bɛllim suor nɛ o tʋʋma na ti an wala?” 13 Zugsɔb maliak la da lɛbis ye, “Asɛɛ ka fʋ pu'a la dɔlis man yɛl o si'em la wʋsa. 14 O kʋ di daam tiig la wala, bɛɛ o nu daam buudi wʋsa bɛɛ di dikanɛ kisa, asɛɛ o niŋ man yɛl o ye o dɔlis si'el la wʋsa.” 15 Manoa da yɛl Zugsɔb maliak la ye, “Ti bɔɔd ye fʋ kpɛlim ka ti kʋ bʋpɔli maali dʋgi tisif.” 16 Zugsɔb maliak la da lɛbis ye, “La'am nɛ yanamɛ giŋim la, m kʋ dii ya diib la baa bi'ela. Amaa maalimi maannɛ nyu'oe tis Zugsɔb la.” (Manoa da pʋ baŋ ye o anɛ Zugsɔb maliaka.) 17 Ani ka Manoa bu'os Zugsɔb maliak la ye, “Fʋ yʋ'ʋrɛ, ka fʋ pian'ad la ya'a ti lieb amɛŋa ka ti na'asi fɔ?” 18 Ka o lɛbis ye, “Bɔ ka fʋ bu'osidi m yʋ'ʋrɛ? Li tʋʋgi ya ya'am baŋir bɛn.” 19 Ani ka Manoa zaŋ bʋpaalig nɛ kii maal maan tampiing zugʋ tis Zugsɔb la. Ka Zugsɔb la tʋm tʋʋmnyalima ka Manoa nɛ o pu'a nyɛ. Saŋkanɛ ka ba da nan zi'e gɔsid, 20 ka bugum la dit maan la bimbim la zugʋ dʋti agɔla la, Zugsɔb maliak la da dɔl bugum la dʋ. Manoa nɛ o pu'a la da nyɛɛ li la, ba da sʋn'ʋni ba nindaa kpa' teŋin. 21 Zugsɔb maliak la da pʋ lɛn nie o mɛŋ ya'asi tis Manoa nɛ o pu'a la. Manoa yʋ'ʋn da baŋ ye o anɛ Zugsɔb maliak. 22 O da yɛl o pu'a la ye, “Ti na kpi, tinamɛ nyɛ Wina'am la!” 23 Amaa o pu'a lɛbis ye, “Zugsɔb la ya'a gban'an ye o kʋʋ ti, o naan kʋ di'en piinkanɛ ka ti maal maannɛ tis o la, hali ka pa'ali ti nɛ'ɛnam bɛɛ o yɛli ti nɛ'ɛnama.”