Efiram dimi zab nɛ Jefita la yɛla
12
1 Efiram dim la da buoli ba zabzabidibi lɔ'ɔŋi keŋ Zafon ka yɛl Jefita ye, “Bɔ ka fʋ keŋ zab nɛ Ammon dim ka pʋ buoli ti ka ti la'am keŋɛ? Ti na nyu'oe fʋn nɛ fʋ yir la wʋsa!” 2 Jefita da lɛbisi ba ye, “Man nɛ m nidib la wʋsa daa nyɛ zabtita'ar nɛ Ammon dim, la'am nɛ wala man daa buoli ya ka ya pʋ kena faanmi ba nu'usinɛ. 3 Man daa nyɛ ka ya pʋ bɔɔd ye ya sʋŋim la, m daa kuosi m nyɔɔri lɔ'ɔŋ titɔndig la zab nɛ Ammon dim, ka Zugsɔb la tisim paŋ ka m nyaŋi ba. Nannanna bɔzug ka ya kɛn zina na ye ya zab nɛ ma?” 4 Alazug ka Jefita buol Gilead sʋ'ʋlim dimi la'asi ba zab nɛ Efiram dɔɔg dim. Gilead dim da nyaŋi ba, bɔzugɔ Efiram dim da yɛl ye, “Yanam Gilead dim anɛ banɛ ka Efiram nɛ Manase dɔɔd dim yisi ya bas.” 5 Gilead dim da nyaŋi ba ka gu' ban da lɔ'ɔŋid Joodan kɔldaug la zin'isi'a la paae Efiram, ka Efiram teŋ nid ya'a zɔɔ yi zaba ni m paae na ka yɛli ba ye, “Kɛlli ka m lɔ'ɔŋ kpɛ'!” Gilead dim bu'osid o nɛ ye, “Fʋ anɛ Efiram dɔɔg nidaa?” O ya'a lɛbis ye, “Ayei!” 6 Ba na yɛl o ye, “Tɔ, yɛlim ye ‘shibbolef.’ ” O ya'a yɛl ye, “sibbolef”, on kʋ nyaŋi buol pian'ʋk la sʋ'ʋŋa la zug, ba na gban'e o kʋ Joodan suoya la ni. Efiram dim tusa pisnaasi nɛ ayi' da kpi saŋkan la.Jefita nɛ Ibizan nɛ Elon nɛ Abidon yɛla
7 Jefita da gur Israel teŋ nɛ yʋma ayuobʋ. Jefita onɛ an Gilead teŋ nid la da kpiya ka ba mum o Gilead teŋin.
8 Ka on nya'aŋ la, Ibizan onɛ yi Betilehem la da an Israel tuongat. 9 O da mɔr biribis pistan' nɛ bipumis pistan'. O da zaŋ o pu'ayuos la tis sidib banɛ ka' o dɔɔg la nidiba, ka bɔ pu'asada pistan' banɛ ka' o dɔɔg la nidibi tis o biribis la ka ba di. Ibizan da an Israel tuongat nɛ yʋma ayɔpɔi.
10 Ibizan n da kpi la, ba da mum o nɛ Betilehem teŋin. 11 Ka on nya'aŋ ka Elon onɛ an Zebulun dɔɔg nid la da lɛbig Israel dim tuongat yʋʋm piiga. 12 Elon n da kpi la, ba da mum o nɛ Aijalon teŋin Zebulun teŋgbauŋʋn.
13 Ka on nya'aŋ la, Abidon onɛ an Hillel biig ka yi Piraton teŋin la lieb Israel tuongat. 14 O da mɔr biribis pisnaasi nɛ yaas banɛ an biribis pistan'; ba da ban'adnɛ bʋmis pisyɔpɔi. O da niŋ Israel tuongat nɛ yʋma anii. 15 Abidon onɛ an Hillel biig la da kpi la, ba da mum o nɛ Piraton Efiram teŋin, kʋkʋna teŋ kanɛ da bɛ Amalek dim teŋgbauŋ sʋ'ʋlimin la.