Tuongatib 11

Jefita onɛ an Gilead nid la gaad Israel dim la tuon si'em

1 Jefita onɛ an Gilead nid la da anɛ zabzabid kanɛ mi' zaba hali. O da anɛ Gilead mɛŋ biig, amaa o ma da anɛ pu'agɔɔndir. 2 Gilead pu'a da du'a biribis, ka ban da nɔbig la, ba da kad Jefita yisi ba yin la, ka yɛl ye, “Fʋ kʋ di faar tinam yin kpɛla bɔzugɔ fʋ anɛ pu'a sɔ' biig.” 3 Dinzug Jefita da zɔnɛ ka bas o ba'abiis la, ka zɔɔ keŋ zin'in Tob teŋin. Anina ka nimbanɛ an ninyɔɔd da la'as o san'an na dɔl o. 4 Li da paae saŋsi'a, ka Ammon dim duoe zabid nɛ Israel. 5 Ka Gilead dim kpɛɛmnam duoe keŋ Jefita san'an Tob teŋin 6 yɛl o ye, “Kem na aan ti tuongat, ka ti nyaŋi zab nɛ Ammon dim la.” 7 Jefita da yɛli ba ye, “Ya da pʋ kisigim ka kadimi yisi m ba' yinnee? Bɔ ka yɛl paae ya ka ya lɛn kennɛ m san'an na?” 8 Ka Gilead kpɛɛmnam la yɛl o ye, “La'am nɛ din kʋdim an si'em wʋsa, tinam lɛbidnɛ fʋ san'an nannanna na. Kem na paasi ti ka ti zab nɛ Ammon dim la, ka fʋnɛ yʋ'ʋn na an zugdaani sʋ'oe onɛ wʋsa bɛ Gilead teŋin.” 9 Jefita da lɛbis ye, “Ya'a nwɛnɛ ya dɔllim nɛ lɛb ye ti zab nɛ Ammon dim la ka Zugsɔb la zaŋi ba niŋi m nu'uginɛ, m sid na an ya zugdaana?” 10 Ka Gilead kpɛɛmnam la lɛbis ye, “Zugsɔb la aan ti kasɛt, ti sid na maal fʋn yɛl si'em la.” 11 Ka Jefita yʋ'ʋn dɔl Gilead kpɛɛmnam la ka nidib la da kɛ ka o gaadi ba tuonnɛ sʋ'oe ba zaba yɛla. O da paae Misipa teŋin ka lɛn tiɛn on pian' si'el la, Zugsɔb la tuon.

12 Ani ka Jefita tʋm o tʋmtʋmnib Ammon na'ab san'an bu'os o ye, “Bɔɔ bɛ tinam nɛ fʋ sʋʋgin ka fʋ zabid nɛ ti teŋgbauŋɔ?” 13 Ka Ammon dim na'ab la lɛbis labaari tis banɛ ka ba tʋm la ye, “Saŋkan ka Israel dim da yi Egipt teŋin na la, ba da faaɛn man teŋ, lin yi Aanon bɔn'ɔgin keŋ Yabok kɔldaugine mɔri ti paae Joodan kɔldaug. Nannanna lɛbisimi li baanlimm!” 14 Jefita da lɛn lɛbis labaari tʋm yɛl Ammon dim na'ab la, ye 15 “Man Jefita yɛt si'eli nwa ye, Israel dim pʋ faaɛn Moab teŋ bɛɛ Ammon dim teŋa. 16 Amaa ban da yi Egipt teŋin na la, Israel dim da dɔl sian'arinɛ yi Atɛuk Zɛn'ugʋn ti paae Kades. 17 Ani ka Israel dim tʋm labaari yɛl Edom na'ab ye, ‘Tisimi ti suor ka ti dɔlli fʋ teŋgbauŋ la sʋ'ʋlimin gaad.’ Amaa ka Edom na'ab la pʋ kɛligɛ. Ba da tʋm yɛl Moab dim na'ab, ka o mɛ zan'as. Ani ka Israel kpɛlim Kades teŋin. 18 Ka ba luaki dɔl sian'arin kaae gilig Edom nɛ Moab tɛɛns la, dɔlli yi Moab teŋ nya'aŋi keŋ la'as taaba Aanon bɔn'ɔg la lɔm. Ba da pʋ kpɛn' Moab teŋinɛ, Aanon bɔn'ɔg la da aan ba titɔndig. 19 Ani ka Israel tʋm labaari yɛl Sihon onɛ an Amor dim na'ab, ka sʋ'oe Hesbon teŋ la, ye o kɛl ka ti dɔl o teŋgbauŋʋn la gaadi keŋi ti mɛŋ zin'igin. 20 Sihon da pʋ siak ye ba dɔl o sʋ'ʋlimin gaadɛ bɔzugɔ o da pʋ niŋ Israel dim la yadda. O da la'as o zabzabidib Jahaz teŋin zab nɛ Israel dim. 21 Zugsɔb onɛ an Israel dim Wina'am la, da zaŋ Sihon nɛ o nidib la wʋsa niŋ Israel dim nu'usin ka ba nyaŋi ba. Israel da faaɛn Amor dim banɛ bɛɛ anina la wʋsa teŋi 22 sʋ'ʋgi li wʋsa din yi Aanon n ti paae Yabok nɛ din yi sian'arin la ti paae Joodan kɔldaug. 23 Nannanna, Zugsɔb onɛ an Israel dim Wina'am la sadigim kad Amor dimi yis teŋin la ka tis o nidib Israel dim la, suobɔ ka fʋ ye fʋ dɔlis ka lɛn di'e teŋ la? 24 Fʋ kʋ zaŋ dinɛ ka fʋ win Kemos tisif laa? Dinɛ wʋsa ka ti Zugsɔb Wina'am la tisi ti la, ti na sʋ'ʋgi li. 25 Fʋ an sʋm gat Balak onɛ da an Zippor biig ka an Moab dim na'ab laa? O nam mi' nwa'as nɛ Israel, bɛɛ o zab nɛ baa? 26 Yʋma kɔbistan' ka Israel dim da sʋ'ʋg Hesbon nɛ Aroa tempʋʋs nɛ teŋkpɛmis banɛ kpi'e anina nɛ tɛɛns banɛ wʋsa kpi'e Aanon bɔn'ɔgin la. Bɔ ka fʋ da pʋ faaɛn ba saŋkan la? 27 Mam pʋ tʋmif bɛ'ɛdɛ, amaa fʋnɛ tʋm bɛ'ɛdi tis man, ka ieed man nɛ zaba. Kɛl ka Zugsɔb, onɛ an sariakat la gban'e linɛ an sida zina nwa, Israel nɛ Ammon dim antu'a la ni.” 28 Amaa Ammon dim na'ab la pʋ kɛlis Jefita tʋm labasi'a tis o laa.

29 Anina ka Zugsɔb Siig la kɛn Jefita san'an na. Ka o gilig Gilead nɛ Manase ka gaadi paae Misipa dinɛ bɛ Gilead teŋin la, ka yi anina tɔlisi kpa' Ammon dimi la'as zin'isi'a la. 30 Jefita da zi'el nɔɔri tis Zugsɔb la ye, “Fʋ ya'a zaŋ Ammon dim la niŋi m nu'ugin, 31 ka m ti nyaŋ ka lɛb na, bʋnkanɛ wʋsa dɛŋi yii m yir za'anɔɔrin na tʋ'ʋsim la na anɛ Zugsɔb la din, ka m na zaŋi maal maannɛ nyu'oe tis Zugsɔb la.”

32 Ani ka Jefita duoe keŋ zab nɛ Ammon dim, ka Zugsɔb la zaŋi ba niŋ o nu'usin. 33 Ka o san'am tempʋʋs pisi din yi Aroa ti paae Minnif teŋ, hali keŋ paae Abɛl-Keramim. Ala ka Israel da nyaŋ Ammon dimi sʋ'oe ba.

34 Jefita n da lɛbi kunnɛ o yin Misipa teŋin la, o pu'ayua da kɛ ka ba nwɛ' kɔna ka o wa'a yina tʋ'ʋs o. O da anɛ bipuŋ yimmir. Ya'a ka' on ma'anɛ, o da pʋ lɛm mɔr biribiŋ bɛɛ bipuŋa. 35 On da nyɛɛ o la, o da aans o fuud sʋnsa'aŋ zug ka kaas ye, “Oi, m biiga! Fʋ kɛya ka m sʋnf wʋsa san'am ka malisim lɛn kae, bɔzugɔ m yɛl nɔɔri tis Zugsɔb la ka kʋ nyaŋi san'ami lii!” 36 O da lɛbis ye, “M saama, fʋ zaŋi fʋ pian'ʋkʋ tis Zugsɔb la. Zugsɔb la sadigim yɔɔ fʋ bi'emnam Ammon dim la samme tisif la maalim man nwɛnɛ fʋn pɔɔ zi'el si'em la. 37 Amaa bʋn yinne ka m bɔɔd ye m sɔsif; tisim nwadis ayi' ka man nɛ m zuanam gɔn kʋkʋna ni nɛ kukuma man kʋ kul sid la zug.” 38 O saam la da lɛbis o ye, “Ka kem!” Ka bas o ka o keŋ nwadis ayi'. On nɛ o bipuŋ taaba da keŋ kʋkʋna la ni gɔɔnd ka kum on kʋ kul sid la yɛla. 39 Nwadis ayi' la nya'aŋ, o da lɛn lɛbi o saam san'an na ka o niŋ o nwɛnɛ on da pɔ nɔɔri zi'el si'em la. Bipuŋ la da nan zi' dau. Nɛ'ɛŋa da lieb Israel dim malʋŋ 40 ye yʋʋm wʋsa Israel pu'asada wʋsa na yi daba anaasi tiɛn Jefita onɛ an Gilead nid la pu'ayua la yɛla.