Tola n gaad Israel dim tuon la yɛla
10
1 Abimelek saŋa la gaad la, Tola onɛ da an Pua biig ka an Dodo yaaŋ la da duoe ye o faaɛn Israel dim. O da yinɛ Isaka tuŋʋn na, ka bɛ Siamir kʋkʋna teŋ linɛ an Efiram la sʋ'ʋlimin. 2 O da gaad Israel dim tuon yʋma pisi nɛ atan' ka kpi, ka ba mum o Siamir teŋin.Jair n gaad Israel dim tuon la yɛla
3 Onɛ da dɔl o nya'aŋ da anɛ Jair onɛ yi Gilead sʋ'ʋlimin la na. O da gaad Israel dim tuon yʋma pisi nɛ ayi'. 4 O da mɔr biribis pistan' ka ba ban'ad bʋmis pistan'. Ba da sʋ'oe nɛ tɛɛns pistan' Gilead sʋ'ʋlimin, hali nɛ zina ba buon tɛɛns la nɛ ye Havof Jair. 5 Jair n da kpi la, ba da mum o nɛ Kamon teŋin.
Jefita yɛla
6 Israel dim da lɛn tʋm tʋʋmbɛ'ɛd Zugsɔb la tuon. Ba da zun'odnɛ Baal nɛ Asitoref, nɛ Aram dim wina la, nɛ Sidon dim wina, nɛ Moab dim wina nɛ Ammon dim wina nɛ Filistia dim wina. Israel dimi da basi ba Zugsɔb ka pʋ lɛn zun'od o la zug, 7 o sʋnf da pɛlig nɛ ba. Ka o zaŋi ba niŋ Filistia dim nɛ Ammon dim la nu'usin. 8 Yʋʋm kan la ni ka ba zabi nyaŋi ba widig ka san'ami ba. Yʋʋm pii nɛ anii ka ba mugus Israel dim wʋsa, banɛ bɛ Joodan nya'aŋ Gilead dinɛ an Amor dim teŋ la. 9 Ammon dim la mɛ da lɔ'ɔŋ Joodan kɔldaug la ye ba zab nɛ Juda nɛ Benjamin nɛ Efiram dim. Israel da bɛnɛ mugus tita'arin.
10 Ka Israel dim kaasi tis Zugsɔb la ye, “Ti tʋm tʋʋmbɛ'ɛdi pɔ'ɔgif, tinamɛ bas fʋn kanɛ aan ti Wina'am, ka dɔl Baal la zug.” 11 Ka Zugsɔb la lɛbis ye, “Egipt dim nɛ Amor dim nɛ Filistia dim 12 nɛ Sidon dim nɛ Amalek dim nɛ Maon dimi da mugusidi ya ka ya kaasi tisim ye m sʋŋi ya la, m da pʋ faaɛn yaa? 13 Amaa ya bas man ka zun'od winsieba, alazugɔ m kʋ lɛn faaɛn ya ya'asɛ. 14 Ya ya'a ti bɛ yɛla pʋʋgin, yanam kem kaasi tis wina banɛ ka ya gaŋ la; kɛlli ka ba faaɛn ya!” 15 Ka Israel dim yɛl Zugsɔb la ye, “Ti sid tʋm tʋʋmbɛ'ɛd. Maalimi ti dinɛ wʋsa ka fʋ tɛn'ɛs ka li tu'al, amaa faaɛn mɛ ti nannanna.” 16 Ka ba zaŋ win zʋna banɛ bɛɛ ba san'an la bas ka dɔl Zugsɔb la. Ka o pʋ lɛn siak ye Israel dim nyɛ namisʋg la ya'asɛ.