Tuongatib 8

Ban kʋ Zeba nɛ Zalmunna la yɛla

1 Efiram dim la yʋ'ʋn da bu'os Gideon ye, “Bɔ ka fʋ maali ti wala? Fʋn daa keŋ ye fʋ zab nɛ Midian dim la, bɔ ka fʋ daa pʋ buoli ti?” Ka zɛrig o hali. 2 Amaa o lɛbisi ba ye, “Bɔ ka man tʋm ka li na nyaŋi mak nɛ yanama? Efiram dim banɛ wi'isid tiwala la pʋ gaad Abieza onɛ bʋn tiwala la wʋsaa? 3 Wina'am zaŋ Oreb nɛ Zeeb, banɛ an Midian tuongatib la, niŋi ya nu'usin. Bɔ ka man nyaŋi tʋm ka li zem nɛ ya?” Ani ka ba sʋʋnr la lɛbi bʋk.

4 Gideon nɛ o nidib kɔbistan' la da gɛnnɛ, la'am nɛ wala ba da kpɛn kad nidib la lɔ'ɔŋ Joodan kɔldaug la. 5 O da yɛl Sukot teŋ dim la ye, “Nɔkimi diibi tisim zabzabidib la, ka ba gɛnnɛ, ka man nan katnɛ Zeba nɛ Zalmunna banɛ an Midian na'anam la.” 6 Amaa Sukot kpɛɛmnam la yɛl o ye, “Fʋ nam pʋ gban'e Zeba nɛ Zalmunna fʋ nu'usinɛ, ka bɔzug ka ti na tisi fʋ zabzabidib la diibɔ?” 7 Ka Gideon lɛbis ye, “Nɛ' zug, Zugsɔb la ya'a ti zaŋ Zeba nɛ Zalmunna niŋi m nu'usin, m na aansi ya niŋgbina nɛ zaaŋ gɔn'ɔs nɛ gɔn'ɔs banɛ bɛ pipirigin la!” 8 Ka yii ani gaadi paae Peniel teŋin sɔsi ba mɛn, amaa ka ba lɛbis o nwɛnɛ Sukot dim la yɛl o si'em la. 9 Ka o yɛl Peniel dim la ye, “M ya'a ti nyaŋ ka lɛb na, m na nwa'ae ya girimbisa la.” 10 Zeba nɛ Zalmunna da bɛnɛ Kariko teŋin nɛ zabzabidib ka ba an wʋʋ dap tusa pii nɛ anu. Ya-nya'aŋ zabzabidib banɛ da kpɛlim la; bɔzugɔ ba nidib tusa kɔbiga nɛ pisi da pʋn dɛŋi kpi.

11 Gideon da dɔlisidnɛ banɛ kem kɔnbid suoya, Nɔba nɛ Jogbɛha tɛɛns la nya'aŋ, ka libig Midian dim zabzabidib la. 12 Zeba nɛ Zalmunna, banɛ an Midian na'anama ayi' la, da zɔnɛ, amaa o da kadi ba hali gban'e ba, ka ba zabzabidib la wʋsa zɔɔ widig. 13 Gideon onɛ an Joas biig la da yi zaba la nii lɛb na, ka dɔl zin'ikanɛ buon Heres Suor la. 14 Ani ka o gban'e dasaŋ onɛ yi Sukot na, ka kɛ ka o sɔb teŋ la kpɛɛmnam nɛ ba tuongatib la yʋda tis o; nidib pisyɔpɔi nɛ ayɔpɔi. 15 Ka Gideon lɛb na yɛl Sukot dim la ye, “Zeba nɛ Zalmunna nwana, banɛ yɛla ka ya pa'asim nɛ man ka yɛl ye, ‘Fʋ dɛŋi gban'e Zeba nɛ Zalmunna fʋ nu'usinɛɛ, ka bɔzug ka ti na tisi fʋ zabzabidib banɛ gɛn la diibɔ?’ ” 16 O da gban'e teŋ la kpɛɛmnam ka nɔk zaaŋ nɛ gɔn'ɔs banɛ bɛ pipirisin la namisi ba pa'ali ba ya'am. 17 O mɛ da nwa'ae Peniel girimbisa la, ka kʋ teŋ la nidib wʋsa.

18 Ka bu'os Zeba nɛ Zalmunna ye, “Nimbɔ buudi ka ya daa kʋ Tabo zuorin la?” Ka ba lɛbis ye, “Ba daa nwɛnɛ fʋ nɛ, sɔ' wʋsa daa nwɛnɛ na'abiig nɛ.” 19 Ka Gideon lɛbis ye, “Bama daa anɛ man ba'abiis, ba anɛ mam mɛŋ ma pʋʋgin biis. Nɛ Zugsɔb kanɛ vʋe la yʋ'ʋr zugɔɔ, ya ya'a daa pʋ kʋʋnɛ baa, mam mɛ kʋ kʋʋ yaa.” 20 Ka o fɛndigi kpa' Jeta, onɛ an o bikpɛɛm la, yɛl o ye, “Kʋʋmi ba!” Amaa Jeta pʋ fuoe o sʋ'ʋgɔ bɔzugɔ, o da anɛ biribiŋ bil ka zɔt dabiem. 21 Ka Zeba nɛ Zalmunna yɛl o ye, “Kem na tʋmi li fʋ mɛŋ. Dau la an si'em la o paŋ mɛ anɛ ala.” Ka Gideon yi tuon na kʋʋ ba, ka yisi ba yʋgʋma la baans banɛ bɛɛ ba niŋgɔnya ni la.

Teŋ la digin baanlimm yʋma pisnaasi Gideon tuon gaadʋg saŋa la yɛla

22 Israel dim da yɛl Gideon ye, “Dim na'am ka sʋ'oe ti, fʋn nɛ fʋ biig nɛ fʋ yaaŋ la wʋsa bɔzugɔ, fʋ faaɛn ti Midian dim nu'usin.” 23 Amaa Gideon da yɛli ba ye, “Man kʋ aan ya na'ab bɛɛ m biig aan ya na'aba. Zugsɔb la na aan ya na'ab.” 24 Ka yɛli ba ye, “M mɔr sɔsʋg yinne ye m sɔs nɛ ya, sɔ' wʋsa tisim tʋblɛm banɛ ka ya faaɛn pʋdig la.” (Li da anɛ Midian dim buudi la malʋŋ ye ba ga'ad sanlima tʋblɛma, ban da an Isimael yaas la zug). 25 Ba da lɛbis ye, “Ti sʋnya malis nɛ tinamɛ na zaŋi tisif.” Ka ba zaŋ fuugʋ yadig ka sɔ' wʋsa yis tʋblɛm banɛ ka ba faaɛn pʋdig la nii lɔb fuugin la. 26 Sanlima tʋblɛma banɛ ka o da kɛ ka ba la'as la tɛbisim da anɛ sanlim gbila tusir nɛ kɔbisyɔpɔi, ka baans nɛ niŋgɔnkɔris pʋ paasɛ, bɛɛ Midian na'anam fuud dinɛ ka na'anam yɛɛd la, bɛɛ baans banɛ ka ba yis yʋgʋma niŋgɔnya ni la. 27 Ka Gideon da zaŋ sanlima la maal maanmaan dansik ka zaŋi li zi'el o mɛŋ teŋin Ofra. Israel dim la da kennɛ anina zun'odi li, ka bas Zugsɔb la ka tʋm wʋʋ ba anɛ pu'agɔɔnda nɛ; ka li lieb bɛndigi tis Gideon nɛ o yidim la wʋsa. 28 Ala ka Israel dim da nyaŋ Midian dim, ka ba pʋ lɛn nyaŋi duoe ba zug Israel tuonnɛ.

Gideon nyɔvʋr bɛllim saŋa la wʋsa, teŋ la da dignɛ nɛ sumbʋgʋsʋm yʋma pisnaasi. 29 Gideon Jerubaal onɛ an Joas biig la da lɛbi kuli bɛɛ o mɛŋ teŋin. 30 O da du'a biribis pisyɔpɔi bɔzugɔ o da mɔri pu'ab bɛdegʋ. 31 Ka o pu'abil onɛ da bɛ Sekɛm la mɛ da du'a biribiŋi tis o, ka o pʋd o yʋ'ʋr ye Abimelek. 32 Gideon da kʋdignɛ hali paae o bɛn ka kpi, ka ba mum o, o ba' Joas yaʋgʋn, Ofra teŋin linɛ bɛ Abieza dim sʋ'ʋlimin la.

Daamʋgʋ duoe Gideon kum nya'aŋ la yɛla

33 Gideon kum nya'aŋ la, li pʋ yuugɛ ka Israel dim lieb wʋʋ pu'agɔɔnda nɛ, lɛm pʋ'ʋsid Baal dinɛ an teŋgban la. Ba da maalnɛ Baal Berit n zi'el ka o aan ba ba'ar 34 ka tami ba Zugsɔb Wina'am onɛ faaɛn ba, ba bi'emnam nu'usin zin'ig wʋsa la yɛla. 35 Ba mɛ da pʋ tʋm sʋm tis Jerubaal (onɛ an Gideon la) yidima, hali la'am nɛ on da tʋm tʋʋm sʋŋ si'a tisi ba la.