Gideon n zab nɛ Midian dimi nyaŋ si'em
7
1 Jerubaal, onɛ an Gideon la nɛ o nidib da duoe bɛogʋn keŋ gu' Harod buligin la. Ka Midian dim la mɛ bɛ bɔn'ɔkanɛ bɛ ya-datiuŋ ka kpi'e zuokanɛ yʋ'ʋri buon Mɔri la baba. 2 Ka Zugsɔb yɛl Gideon ye, “Nimbanɛ ka fʋ mɔri ye ba zab Midian dim la zu'oe nɛ galis. Li na kɛ ka Israel dim ti nwɛ'ɛd nyɔ'ɔg ye ba mɛŋ paŋ ka ba nyaŋ zaba la. 3 Mɔɔlim tis nidib la ye, onɛ zɔt dabiem on lɛm ka bas Gilead zuor la.” Ka nidib tusa pisi nɛ ayi' lɛb. Ka kɛ tusa piiga. 4 Amaa ka Zugsɔb yɛl Gideon ye, “Ba nan kpɛn zu'oe nɛ. Mɔri ba sig ku'omin la ka m na sie ba kal la tisif. Ka onɛ wʋsa ka m ye o da keŋ zaba la on da keŋɛ, ka onɛ wʋsa ka m ye o kem on kem.” 5 Ka Gideon mɔri ba sig ku'omin la, ka Zugsɔb yɛl o ye, “Bakim banɛ nuud ku'om la nwɛnɛ baa la, ka kɛ banɛ igini nuud la.” 6 Nidib kɔbistan' daa kabisidnɛ nuud, ka banɛ kpɛlim la wʋsa igini nuud. 7 Ka Zugsɔb yɛl Gideon ye, “Nidib kɔbistan' banɛ kabisid ku'om la nuud la, ban ka m ye m nɔk ka ya nyaŋ Midian dim la. Kɛl ka banɛ kpɛlim la wʋsa lɛbi kul.” 8 Ka Gideon kɛ ka Israel dim banɛ kpɛlim la wʋsa nɔki ba zaba la'ad la nɛ ba na'atana tis nidib kɔbistan' la ka lɛbi kuli ba yaan.9 Yʋ'ʋŋ kan la, Zugsɔb la da yɛl Gideon ye, “Duom keŋ zab nɛ nidib la, ka mam tisi ya nyaŋir. 10 Ka fʋ ya'a zɔt dabiem, fʋn kem sig zin'ikanɛ ka ba bɛ la ni, fʋn nɛ fʋ tʋmtʋm Pura. 11 Ya na wʋm ban yɛt si'el la wʋsa ka ya na nyɛ sʋnkpi'euŋʋ zab nɛ ba.” Ka Gideon nɛ o tʋmtʋm Pura keŋ hali paae zin'ikanɛ ka ba dataas la'as ye ba zab nɛ ba la. 12 Midian nidib nɛ Amalek nidib nɛ buudbanɛ bɛ ya-nya'aŋ la wʋsa da zu'oe nwɛnɛ na'azɔmnam nɛ, ba da mɔr yʋgʋma ka ba zu'oe nwɛnɛ kɔlʋgin titanbin'isʋg nɛ. 13 Ka Gideon n paae anina la, o wʋm ka dau sɔ' yɛt o zaansʋŋʋ tisidi o zua sɔ', ye on zaansim nɛ ka bodobodo gbil biligi sigi ba gbɛɛnb zin'igin la na nwɛ' Fuug Sʋgʋr yinne. Ka Fuug Sʋgʋr la lu teŋinɛ san'am. 14 Ka o zua la lɛbis ye, “Li ka' si'el si'ela, li anɛ Israel nid onɛ yʋ'ʋri buon Gideon ka o saam an Joas la sʋ'ʋraugʋ la, Wina'am zaŋ Midian dimi niŋ o nu'usin, ka o nyaŋ zabzabidib la.” 15 Ka Gideon wʋm dau la zaansʋŋ la nɛ li gbinnɛ an si'em la, o igini o duma zug, ka dʋ'ʋsid Zugsɔb la, ka duoe lɛb Israel dim la san'an ka yɛli ba ye, “Duomi, ka Zugsɔb la nɔk Midian dim la niŋi ti nu'usin!”
16 O pʋdig nidib kɔbistan' la nɛ zin'isa atan', zin'ig wʋsa kɔbig-kɔbig. Ka tis sɔ' wʋsa na'atan nɛ yʋʋr ka bugum mɔɔg bɛɛ li pʋʋgin. 17 Ka yɛli ba ye, m ya'a paae zaba la zin'igin, gɔsimi mam ka niŋ nwɛnɛ mam niŋid si'em la. 18 Ka mam nɛ m nidib la ya'a piebi ti na'atana la, yanam mɛ piebi ya na'atana la mɛn, ka dʋ'ʋsi ya kʋkɔya, yɛt ye, “Li anɛ Zugsɔb nɛ Gideon din!”
19 Gideon nɛ o nidib kɔbig la da paae zaba la zin'igin, ka li anɛ yʋ'ʋŋ tisʋʋs, saŋkan ka nimbanɛ ka ba tiak la yina, ye ba gur za'anɔɔr la. Ka Gideon nɛ o nidib la kpɛm piebi ba na'atana la, ka nwa'ae ba yʋya banɛ ka ba zaŋ bugum niŋi li pʋʋgin la, 20 ka banɛ an pʋdigir ayi' kpɛlim la mɛ niŋ ala mɛn. Ba wʋsa da zanl nɛ bugum mɔɔg la nɛ ba dagɔbʋg nu'ug ka zanl na'atana la nɛ ba datiuŋ nu'ug ka maal vuudi yɛt ye, “Zugsɔb la nɛ Gideon zaba sʋ'ʋraug!”. 21 Ka sɔ' wʋsa zi'e o zin'igin gilig zaba zin'ig la ka basi ba sʋʋgin. Ka Midian dim la wʋsa zɔt ka kaasid. 22 Ka nidib kɔbistan' la wʋsa piebi ba na'atana la, ka Zugsɔb la kɛ ka ba dataas la tulig taaba nɛ ba sʋ'ʋs la. Ba da zɔɔ kpa' nɛ Zaretan hali ti paae Bet Sitta, teŋ kanɛ bɛ Abɛl Mehola kpi'e Tabaf la.
23 Ba da buol Israel nimbanɛ an Naftali dɔɔg nɛ Aser dɔɔg nɛ Manase dɔɔg dim la ka ba yina kad Midian dim la. 24 Ka Gideon tʋm nidib Efiram linɛ an kʋkʋna teŋ la ye ba yɛli ba ye ba yim na gu' Midian dim la zin'ikanɛ ka ba na lɔ'ɔŋ Joodan kɔldaug la, hali ti paae Bet Bara. Ka ba buol Efiram dim la ka ba yina gu' zin'ibanɛ bɛ Joodan la, hali ti paae Bet Bara. 25 Ba da gban'e Midian na'anama ayi'. Ba yʋda da anɛ Oreb nɛ Zeeb. Ba da kʋ Oreb nɛ zin'ikanɛ ka ba buon ye, Oreb Tampiing la zug, ka kʋ Zeeb bʋmbɔk kanɛ ka ba nwiakid tiwala daam ka ba buon ye, Zeeb Daam Bʋmbɔk la ni. Ba da kad Midian dim la lalig sa, ka mɔr Oreb nɛ Zeeb zut na tis Gideon, saŋkanɛ ka o da bɛ Joodan kɔldaug baba la.