Debora nɛ Barak yʋʋm la yɛla
5
1 Daakan la ka Debora nɛ Barak onɛ an Abinoam biig la, da yʋ'ʋm yʋʋm kaŋa:2 “Israel na'abiis gaad tuon,
nidib la siaki pɛsigi ba mɛŋ.
Wɔ'ɔgim Zugsɔb la!
3 Na'anama, kɛlisimi.
Yanam banɛ gur teŋ la wʋmmi!
M na yʋ'ʋm yʋʋma,
m na yʋ'ʋm tis Zugsɔb la.
M na yʋ'ʋm yʋʋma wɔ'ɔg Zugsɔb, onɛ an Israel dim Wina'am la.
4 Zugsɔba, fʋn da yi Seir teŋin
ka dɔlisi keŋ Edom sʋ'ʋlimin la,
teŋ da damya, ka agɔla kpa'ae ku'om,
ka saŋgbana kpa'ae saa ku'om sigis na.
5 Zuoya da mi'im Zugsɔb la tuon,
Sinai zuor da dam Zugsɔb la tuon,
ba da mi'im Zugsɔb onɛ an Israel dim Wina'am la tuon.
6 Siamega onɛ an Anaf biig la saŋa la, nɛ Jael saŋa la,
Nidib da bas suoraad la ka dɔl suobuga.
7 Nidib da pʋ lɛn zu'oe teŋkpɛmisin ya'asa,
hali ti paae saŋkanɛ ka man Debora duoe na,
m da duoe zi'enɛ lieb Israel dim ma.
8 Israel dimi da gaŋ win paala saŋsi'a la,
ka tanp da nwɛ'ɛd tɛɛns za'anɔya ni;
ba zabzabdib banɛ an tusa pisnaasi la sʋʋgin,
ba nid baa yinne da pʋ mɔr kpan bɛɛ gbanti'edʋgɔ.
9 M nyɔɔg bɛ nɛ Israel na'abiis
nɛ banɛ siaki pɛsigi ba mɛŋ la.
Wɔ'ɔgimi Zugsɔb la!
10 Yanam banɛ ban'ad bʋmpielis,
ka zin' ga'ar dinɛ ka ba maal nɛ fusʋma zug la,
hali nɛ yanam banɛ ken nɔba la wʋsa.
11 Kɛlisimi banɛ la'as kɔlisin la yʋ'ʋm si'em.
Ba yʋ'ʋmnɛ Zugsɔb pʋpielim tʋʋma la yɛla;
O zabzabidib banɛ an pʋpielim dim Israel dimin la.
Ka Zugsɔb nidib la yii keŋ tempʋʋg la za'anɔya ni.
12 Duom zi'en, duom zi'en, Debora.
Duom zi'en, duom zi'enɛ yʋ'ʋm yʋʋma!
Duom zi'en fʋn Barak onɛ an Abinoam biiga,
Duom dɔl banɛ ka fʋ zabi nyaŋ la keŋ.
13 Ka nimbanɛ kpɛlim la sigi kɛn kpɛɛmnam la san'an na;
Zugsɔb nidib la sigi paae m san'an na ye ba zab.
14 Sieba yinɛ Efiram na sig bɔn'ɔgin la, dɔlli yi Amalek teŋin;
‘Benjamin dim la dɔlli fʋ nidib la nya'aŋ!’
Kpɛɛmnam yi Makir dɔɔdin sig na,
ba anɛ banɛ yi Benjamin sʋ'ʋlimin la
ka ziid zabzabidib kpɛɛm la dansaar.
15 Isaka tuongatib la bɛ Debora ni;
Sida, Isaka dɔl Barak nya'aŋ,
ka ba keŋ tɔ'ɔtɔ paae bɔn'ɔgin la.
Amaa Reuben teŋ sʋ'ʋlimin la ba tɛn'ɛsidnɛ pʋtɛnda ayi', yi'.
16 Bɔ ka ya la'as nɛ banɛ kem kɔnbid
ka ya tʋba wʋm kɔnbkemnib wiis piebʋgɔ?
Reuben teŋ sʋ'ʋlimin la ba sid da tɛn'ɛsid pʋtɛnda ayi', yi'.
17 Gilead dim kpɛlim bɛ Joodan kɔldaug la nya'aŋ.
Ka bɔ ka Dan on nan kpɛm bɛ anrima la ni?
Aser dim kpɛlim atɛuk la nɔɔrin,
ka bɛ zin'ikanɛ ka anrima dɔlli sigid ku'omin la.
18 Zebulun nɛ Naftali nidib la kuosi ba nyɔvʋya,
ka dɔl zaba zin'ikanɛ an kʋkʋna zug la.
19 Ani ka na'anam la yina zab;
Keenan na'anam zab Taanak teŋin,
zin'ikanɛ kpi'e Megido ku'om la,
amaa ba pʋ nyaŋi faaɛn anzurifa bɛɛ ligidii.
20 Nwadbibis zab agɔl,
ban bɛɛ agɔla ken la, ka zab nɛ Sisera.
21 Kison kɔldaug la dii ba mɔri keŋ,
Kison kɔldaug la anɛ kɔldakʋdʋg.
M na keŋ tuon nɛ paŋ!
22 Widi la kena dɛɛd nɛ paŋ;
ka ba tafɛɛd la dammid parigid-parigid.
23 Zugsɔb maliak la yɛl ye,
‘Nɔpɔɔr bɛ Meroz teŋ la zug!
Pɔɔm nɔpɔbɛ'ɛdi niŋ nidib la.
Bɔzugɔ ba pʋ kena sʋŋ Zugsɔb la,
ba sid pʋ sʋŋi zab nɛ banɛ mɔr kpi'euŋ la.’
24 Jael anɛ pu'a kanɛ yʋ'ʋri mɔr albareka pu'ab sʋʋgin,
o anɛ Heber onɛ an Ken nid la pu'a,
O yʋ'ʋr dʋti gat pu'ab banɛ bɛ sʋga ni la wʋsa.
25 Dau la sɔs nɛ ku'om, ka o tis o bin'isim,
lakanɛ nar nɛ ninsʋma la ka o zaŋi niŋ bin'isgbisidim tis o.
26 O da zaŋ sʋgʋr kpa'ar nu'ug yinne ni,
ka zaŋ tʋmtʋmnib zan'ar o datiuŋ nu'ugin
keŋ nwɛ' Sisera zugʋ nwa'ae,
ka kpa' o gbɛ'ɛlaa la, ka li buak.
27 Ka o lii o nɔba ni,
o nɔba ni ka o da li;
ka on li si'el la, ani ka o kpi.
28 Sisera ma gɔsid takoro ni,
o gɔsid takoro la vɔnya ni
gu'usid ye o na lɛb na, ka yɛt ye
‘Bɔɔ niŋ ka o zaba tɛrekonam la nam pʋ kena?
Bɔ ka tɛrekonam banɛ zu'oe hali la yuugɛ?’
29 Ka pu'ab banɛ an ya'am dim ka bɛɛ o yin la lɛbis o,
ka o kpɛn takidi yɛt o mɛŋ ye;
30 ‘Anwaa o la'asid nɛ la'abanɛ ka ba zabi faaɛn la pʋdigid
ka dau woo di'ed pu'asadir yinne bɛɛ ayi', yi',
ka Sisera na paam fubanɛ pɔnre vɛnl,
ka mɔr fubanɛ vɛnl pamm na tis mam.’
31 Zugsɔba! Kɛl ka fʋ bi'emnam wʋsa bɔdig ala!
Amaa kɛl ka banɛ nɔŋif la nwɛnɛ winnigi
tansid na nɛ paŋ si'em la.”
Ka teŋ la da mɔr sumbʋgʋsʋm paae yʋma pisnaasi.