Tuongatib Debora nɛ Barak n faaɛn ba Keenan dimin si'em
4
1 Ehud kum nya'aŋ la, Israel nidib da lɛn tʋm bɛ'ɛd Zugsɔb la tuon. 2 Zugsɔb la da nɔki ba niŋ Jabin, onɛ an Keenan na'ab la nu'usin, onɛ da di na'am Hazo teŋin la. O soogianam kpɛɛm da anɛ Sisera. O da bɛ nɛ Harosief-Hagoyim teŋin, 3 o da mɔr zaba tɛrekonam banɛ mɔr paŋ kɔbiswai. On da namis Israel dim yʋma pisi, ka ba da kaasi tis Zugsɔb la ye o sʋŋi ba la.4 Debora onɛ an Wina'am nɔdi'espu'ak, ka an Lapidof pu'a la, da an Israel dim tuongat saŋkan la. 5 O da maal antu'a zin'ig kpʋkparig gbinnin linɛ ka ba buon ye, Debora Kpʋkparig ka li bɛ Rama nɛ Betel tɛɛns la teŋsʋk, ka an kʋkʋna teŋ linɛ bɛ Efiram sʋ'ʋlimin la. Israel dim da ken o san'an na ka o maannɛ ba pian'adi tisidi ba. 6 O da tʋm buol Barak onɛ an Abinoam biig ka yi Kades Naftali teŋin la yɛl o ye, “Zugsɔb onɛ an Israel Wina'am la tisif nɔɔr. Kem Naftali nɛ Zebulun tɛɛns la nii bɔ dap tusa piiga ka ya dɔl Tabo zuor suor la. 7 M na pan'as Sisera, onɛ an Jabin soogianam kpɛɛm la, on nɛ o zaba tɛrekonam nɛ zabzabidib la wʋsa, ka ba keŋ Kison kɔlʋgin la; ka m na nɔki ba niŋi fʋ nu'usin.” 8 Barak da lɛbisi yɛl o ye, “Fʋ ya'a na dɔllimi keŋ, m na keŋ; amaa fʋ ya'a kʋ dɔlli keŋɛ, m kʋ keŋɛ.” 9 Ka Debora yɛl ye, “Li an sʋ'ʋŋa, m na dɔlli fʋ keŋ. Amaa fʋn niŋid si'em la, na'asi la kʋ aan fʋ dinɛ: Zugsɔb la na zaŋ Sisera niŋ pu'a nu'ugin.” Ka duoe dɔl Barak n keŋ Kedes teŋin la. 10 Ani ka Barak la'as Zebulun nɛ Naftali dap tusa piiga ka ba dɔl o, ka Debora mɛ dɔl o keŋ.
11 Saŋkan ka Heber onɛ an Ken nid la da bas Ken dim sieba banɛ an Hobab onɛ da an Moses dakiig yaas la, ka keŋ ti' o fuug sʋgʋri kpi'el nɛ titita'ar dinɛ bɛ Zaananim ka pʋ lal nɛ Kedes la.
Ba nyaŋ Sisera ka kʋʋ o
12 Ban da yɛl Sisera ye Barak Abinoam biig la gaadi keŋ dʋ Tabo zuor la, 13 o da la'as o tɛrekonam kɔbiswai la, nɛ nimbanɛ bɛɛ o san'an la, lin yi Harosief-Hagoyim paae Kison kɔlʋgin la. 14 Debora da yɛl Barak ye, “Kem! Zina an dabiskanɛ ka Zugsɔb la na zaŋ Sisera niŋi fʋ nu'usin. Zugsɔb la pʋn pʋ gaadi fʋ tuonnɛɛ?” Barak da sig Tabo zuor la teŋir, ka dap tusa piiga la dɔl o nya'aŋ. 15 Barak n da ken tuon la, Zugsɔb la da kɛ ka ba zabi nyaŋ Sisera nɛ o tɛrekonam nɛ o soogianam wʋsa, ka Sisera bas o tɛreko la ka zɔ nɛ nɔba. 16 Amaa Barak da kati dɔl tɛrekonam nɛ soogianam la paae Harosief-Hagoyim. Zabzabidib la wʋsa da kpinɛ tanpin; dau baa yinne da pʋ kpɛlim.
17 La'am nɛ wala, Sisera da zɔ nɛ nɔba paae kpɛn' Jael onɛ an Heber pu'a la sʋgʋrin, Heber da anɛ Ken nid, bɔzugɔ o zugdaan Hazo Na'ab Jabin da maal zuod nɛ Heber dɔɔg dim la. 18 Jael da yii tʋ'ʋs Sisera ka yɛl o ye, “M zugdaana, kpɛn'ɛm na, da zɔt dabiem!” Ka o kpɛn' o sʋgʋrin la, ka o nɔk fuudi lus o. 19 Ka Sisera yɛl o ye, “Ku'onuudi mɔrim, nɔkim ku'om tisim ka m nu.” Ka o yɔ'ɔg bin'isim dinɛ ka ba maali su gan'arin la tis o ye o nu, ka lɛbisi pil o. 20 Ka Sisera lɛn yɛl ye, “Zi'enim za'anɔɔrin la, ka sɔ' ya'a kena bu'osif ye fʋ pʋ nyɛ sɔ' kpɛlaa, fʋn yɛlim ye ayei.” 21 Amaa Jael da zaŋ kpa'ar linɛ ka ba mɔri ba'ad Fuug Sʋgʋr la nɛ zan'ari keŋ o san'an baanlimm ka o gɛn hali digi gbisid, ka o nɔk kpa'ar la kpa' o gbɛ'ɛlaa tɔlig teŋin, ka o kpi. 22 Ka Barak bɛn Sisera paae na, ka Jael yina tʋ'ʋs o ka yɛl ye, “Kem na ka m na pa'alif dau kanɛ ka fʋ ieed la!” Ka o dɔl o kpɛn', ka Sisera kpii digi ka kpa'ar kpa' o gbɛ'ɛlaa tɔlig teŋ.