Buudbanɛ kpɛlim teŋin la yɛla
3
1 Tembama nidib ka Zugsɔb la da kɛ ka ba kpɛlim ka makid Israel dim banɛ da pʋ nyɛ tanp zaba Keenan teŋin la 2 (O da maal nɛ'ɛŋa ye o pa'al Israel yaas banɛ da nan zi' tanp nwɛ'ɛb la tanp nwɛ'ɛb suor): 3 Filistia dim teŋ sʋ'ʋdiba anu la, nɛ Keenan dim wʋsa, Sidon dim, nɛ Hivi dim banɛ bɛ Lebanon kʋkʋna ni la din yi Baal Hemon zuorin paae Lebo-Hamat la. 4 Ba da kpɛlim anina ye ba mak Israel dim la gɔs ye ba na di'e Zugsɔb la nɔzi'elʋg dinɛ ka o da tis Moses ye o tisi ba yaanam laa? 5 Israel dim la da bɛnɛ nɛ Keenan dim nɛ Hitti dim nɛ Amor dim nɛ Sidon dim nɛ Perizi dim nɛ Hivi dim nɛ Jebus dim la. 6 Israel dim da nɔk bama la pu'ayuosi tisi ba biribis ka nɔki ba mɛŋ bipumisi tis buudbama biribis, ka maannɛ ba wina nɛ ba teŋgbana la.Tuongat Ofniel n zabi nyaŋ Mesopotamia la yɛla
7 Israel dim la da tʋm bɛ'ɛd Zugsɔb la tuon; ba da tami ba Zugsɔb Wina'am la nɛ, ka zun'od teŋgbana banɛ yʋ'ʋri buon Baal nɛ Asera nam la. 8 Zugsɔb la sʋnf da pɛlig nɛ hali ka o kuosi ba niŋ Kusan-Risiatam onɛ an Aram Naharam na'ab la nu'usin, onɛ ka Israel dim da tʋm yʋma anii tis o la. 9 Amaa ban da kaasi tis Zugsɔb la, o da gaŋ onɛ na faaɛn ba, onɛ da an Ofniel onɛ an Kenas biig la, Kenas da anɛ Kaleb pitʋ. 10 Zugsɔb la Siig paŋ da kɛɛn o san'an na, ka o lieb Israel dim tuongat ka yii keŋ zab. Ka Zugsɔb la zaŋ Kusan-Risiatam onɛ an Aram na'ab la niŋ Ofniel nu'usin ka o nyaŋ o. 11 Ka teŋ la digin baanlim nɛ sumbʋgʋsʋm paae yʋma pisnaasi, hali ti paae Ofniel kum.
Tuongat Ehud n kʋ Moab na'ab la yɛla
12 Israel dim la da lɛn tʋm bɛ'ɛd Zugsɔb la tuon, ka ban da tʋm bɛ'ɛd la zugɔ, Zugsɔb la da tis Eglon onɛ an Moab na'ab la paŋ ka o nyaŋ Israel dim la. 13 Eglon da la'as nɛ Ammon dim nɛ Amalek dimi zab nɛ Israel dim, ka faaɛn kpʋkparis Teŋ la. 14 Eglon onɛ an Moab na'ab la da sʋ'ʋg Israel yʋma pii nɛ anii. 15 Israel dimi da lɛn kaasi tis Zugsɔb la, ka o tisi ba onɛ na faaɛn ba, o da anɛ Ehud onɛ an dau gɔbir, ka an Gera biig ka an Benjamin dɔɔg nid. Israel dim la da tʋm o ye o mɔr yɔɔdi keŋ tis Moab na'ab Eglon. 16 Ehud da maal zaba sʋ'ʋbil kanɛ dit tuon nɛ nya'aŋ wʋsa, ka li wa'alim zemis nɛ o gbɛr, ka o sʋʋ li tɛɛngʋn n lɔɔ li o datiuŋ gbɛrin ka lusi li nɛ o fuug. 17 O da zaŋ yɔɔd la tis Moab na'ab Eglon, na'ab la da anɛ dau kanɛ nɔb hali. 18 Ehudi n da tis yɔɔd la naae la, o da zi'el banɛ zi yɔɔd la kena la suor. 19 Ban li'el bada banɛ bɛ Gilgal la ka o mɛŋ fɛndigi lɛb na ka yɛl ye, “Na'aba, m mɔr yɛlsu'adir ye m yɛlif.” Ka na'ab la yɛl ye, “An baanlimm!” Banɛ bɛɛ o san'an la wʋsa daa yi ka bas o. 20 Ka Na'ab la kpɛlim zin' o kɔn'ɔkɔn' girimbisa la zug, na'am zin'ikanɛ ka o ɛɛnti zin' walʋsʋg saŋa la, Ehud da li'el o ka yɛl ye, “M mɔr labaar Wina'am san'an ye m yɛlif.” Na'ab la duoe o na'am gbauŋʋn la, 21 Ehud da nɔk o dagɔbʋgʋ fuoe sʋ'ʋg la bɛɛ o datiuŋ gbɛrin la kʋns na'ab la pʋʋr. 22 Hali ka sʋ'ʋg la kpa'ar la'am limi gaadi yii o nya'aŋ na. Ehud da pʋ fuoe sʋ'ʋg la, ka o niŋgbiŋ kpaam lusi li wʋsa. 23 Ka Ehud yi za'ambɛŋin na ka yɔ' za'anɔya banɛ dʋt girimbisa la zug la ka kpari ba. 24 On gaad la nya'aŋ, ka yammis la kena nyɛ ka girimbisa la za'anɔya kpar. Ka ba yɛl ye, “Daasi'erɛ o bɛnɛ bangida la ni.” 25 Ka ba gu'usid hali ka li ti kena mɔr nyan, amaa on da yuug ka pʋ yɔ'ɔg za'anɔya la ka ba zaŋ saafi na yɔ'ɔsi ba. Ani ka ba nyɛɛ ba zugdaan la kpii dig teŋin. 26 Ban nan gu'usid la, ka Ehud niaki dɔl bada la bɛ si'el la su'a gaadi paae Seira teŋ. 27 On paae anina la, o da pieb na'atan Efiram dinɛ an kʋkʋna teŋ la ni, ka Israel dim la dɔl o yi kʋkʋna la zugʋ sig na, ka o gaad tuon ka ba dɔl o. 28 Ka o yɛli ba ye, “Dɔlli man nya'aŋ! Zugsɔb la zaŋ Moab dim, ya dataas la, niŋi ya nu'usin.” Ka ba dɔl o keŋ sʋ'ʋg ban lɔ'ɔŋid Joodan zin'isi'a ken Moab teŋin la, ka pʋ tis suor ka sɔ' na nyaŋi lɔ'ɔŋ anina. 29 Saŋkan la ba da kʋ Moab nidib tusa piiga, banɛ kpi'em ka mɔr paŋ la; ka zabzabidib la baa yinne pʋ nyaŋi yii. 30 Din yi dabiskan la daar ka Moab yʋ'ʋn tʋmmi tisid Israel dim ka di'edi ba nɔɔr; ka teŋ la digin nɛ sumbʋgʋsʋm paae yʋma pisnii.
Tuongat Seamiga n faaɛn ba Filistia dimin si'em
31 Ehud nya'aŋ la, Seamiga onɛ an Anaf biig la da zaŋ nɛ balaar kanɛ ka ba mɔri kem niigi kʋ Filistia dim kɔbisyuobʋ. Onɛ an onɛ mɛ da faaɛn Israel dim la bas.