Zugsɔb maliak kanɛ bɛ Bokim la yɛla
2
1 Zugsɔb la Maliak da yi Gilgal teŋin kɛn Bokim na, yɛl ye, “M mɔri ya yi Egipt teŋin na, ka mɔri ya kɛn teŋ kanɛ ka m da pɔ nɔɔri zi'eli ya yaanam la na; ka yɛl ye, ‘M kʋ san'am nɔnaar kanɛ ka m da maal nɛ ya la. 2 Da la'asi ya mɛŋ nɛ teŋ la nidiba. San'amini ba malʋŋ bimbima la bas.’ Amaa ya pʋ siaki m nɔɔrɛ. Bɔ ka ya maal ala? 3 Dinzugɔ nannanna m yɛti ya ye, ‘M kʋ kadi ba yisi ya san'anɛ; ba na an gɔn'ɔsi ya lʋga ni, ka ba wina la na an baŋi bɛndi ya.’ ” 4 Zugsɔb maliak la pian' nɛ'ɛŋa tis Israel dim wʋsa la, nidib la da kumnɛ ka li dʋt agɔla. 5 Ka ba buon zin'ikan la ye Bokim.a Anina ka ba da maal maana tis Zugsɔb la.6 Lin nya'aŋ, Josua da bas Israel dim la, ba da keŋ sʋ'ʋg teŋ la, sɔ' wʋsa nɛ o faar zin'ig. 7 Nidib la da nyɛ Zugsɔb la tʋm tʋʋm kpi'ema si'em tis Israel dim la ba da dɔl Zugsɔb la Josua nyɔvʋr bɛllim saŋa la wʋsa, nɛ kpɛɛmnam banɛ da kpɛn vʋe o kum nya'aŋ la. 8 Josua onɛ da an Zugsɔb la tʋmtʋm, ka an Nun biig la, da anɛ yʋma kɔbiga nɛ piiga ka nyaan kpi. 9 Ka ba mum o zin'ikanɛ an o paalʋ ka an o faar la, ka li bɛ Timnaf Heres linɛ bɛ Efiram dinɛ an kʋkʋna teŋ la, lɛbisid Gaas zuor la ya-datiuŋ baba la.
Zʋmaaŋ kanɛ an bugusim dim la yɛla
10 Zʋmaaŋ kan la nidib wʋsa da maal ka'alim naae la nya'aŋ, zʋmaaŋ si'a da duoe na, ba da zi' Zugsɔb la, bɛɛ on maal si'el wʋsa tis Israel dim la. 11 Ala ka Israel dim la da tʋm bɛ'ɛd Zugsɔb la tuon ka zun'od Baal. 12 Ba da tam Zugsɔb, onɛ aan ba saamnam Wina'am, onɛ da mɔri ba yis Egipt teŋin na la, ka zun'od ka wɔ'ɔgid winsieba, wina nɛ teŋgbana banɛ ka buudbanɛ da giligi ba la da wɔ'ɔgid la. Ba da kɛ ka Zugsɔb la sʋnf pɛlig nɛ ba, 13 bɔzugɔ ba da bas Zugsɔb la ka zun'od Baal nɛ Asitoref teŋgbana la. 14 Zugsɔb la sʋnfʋ da duoe nɛ Israel dim la, o da zaŋi ba niŋi ba bi'emnam nu'usin ka ba faaɛn ba la'ad. O da kuosi ba tisi ba dataas banɛ giligi ba la wʋsa ka ba kʋ lɛn nyaŋi zab nɛ ba. 15 Israel dim ya'a da yi saŋsi'a wʋsa ye ba zab, Zugsɔb la pʋ tisidi ba suor ka ba nyaŋid, nwɛnɛ on da pɔɔ zi'el si'em la. Ba da bɛnɛ namisʋg pʋʋgin.
Wina'am gaŋ banɛ na mɔr yɔlisim na la yɛla
16 Ala ka Zugsɔb la gaans tuongatibi tisi ba, ka ba faaɛn ba, ba bi'emnam nu'usin. 17 La'am nɛ wala ba da pʋ kɛlisidi ba tuongatib la nɔɔrɛ, amaa ka zɔti dɔl winsieba ka zun'odi ba. Ban da pʋ nwɛnɛ ba saamnama, ba da fɛndignɛ tɔ'ɔtɔ ka basi ba saamnamɛ da dɔl suosieba la, suokanɛ ka Zugsɔb la tis nɔɔr ye ba siaki dɔl la. 18 Zugsɔb la ya'a da ɛɛnti tisi ba tuongat, o na bɛnɛ nɛ tuongat la ka faaɛn ba yisi ba dataas nu'usin tuongat la nyɔvʋr bɛllim saŋa la wʋsa; li anɛ Zugsɔb la da zɔti ba nimbaanlig ban da unsid nɛ tɔɔg ba dataas la da mugusidi ba ka namisidi ba la. 19 Amaa tuongat la ya'a da kpi, nidib la da fɛndignɛ tʋm bɛ'ɛd hali gaadi ba yaanamɛ da dɔl winsieba ka zun'odi ba la. Ba da zan'as ye ba kʋ basi ba tʋʋmbɛ'ɛd nɛ ba tʋbzian'asim la.
Keenan dimi mak Israel dim la yɛla
20 Dinzugɔ Zugsɔb la sʋnf da pɛlig nɛ Israel dim la ka o yɛl ye, “Buudkaŋa dimi san'am nɔnaar kanɛ ka m da digili ba yaanam ka ba pʋ kɛlis man la zugɔ, 21 m kʋ lɛn kad buudbanɛ ka Josua da basi ba ka kpi la. 22 M na kɛ ka ba mak Israel dimi gɔs ye ba na kpɛn dɔl Zugsɔb la suor nwɛnɛ ba yaanamɛ da dɔl si'em la, bɛɛ?” 23 Zugsɔb la da kɛ ka buudbanɛ bɛɛ anina la kpɛlim; o da pʋ kɛ ka Josua kpɛn nyaŋi ba vuguri n kadi yisɛ.