Tuongatib 1

Israel Tuongatib

Israel n zab nɛ Keenan dim banɛ kpɛlim la yɛla

1 Josua da kpi la nya'aŋ, Israel dim da bu'os Zugsɔb la ye, “Anɔ'ɔnamɛ na gaad tuon yiiga zab nɛ Keenan dim la tisi ti?” 2 Zugsɔb la da lɛbis ye, “Juda dim la na gaad tuon. M zaŋ teŋ la niŋi ba nu'usin.” 3 Ka Juda dim la yɛl Simeon dim banɛ aan ba ma biis la ye, “Kemi na la'as nɛ ti keŋ sʋ'ʋlim kanɛ ka ba tisi ti la ni, ka ti zab nɛ Keenan dim la ka tinam mɛ na kɛɛn ya teŋin la na zab.” Ala ka Simeon dim la da dɔlli ba ka ba keŋ. 4 Juda dimi da duoe zab la, Zugsɔb la da zaŋ Keenan dim nɛ Perizi dim la niŋi ba nu'usin, ka ba kʋ nidib tusa piiga Bezek teŋin. 5 Ani ka ba nyɛ Adoni-Bezek ka zab nɛ o, ka nyaŋ Keenan nɛ Perizi dim la wʋsa. 6 Adoni-Bezek da zɔya, amaa ka ba kad o hali gban'e o ka fi'isi o nu'uraad nɛ o nɔbraad. 7 Ani ka Adoni-Bezek yɛl ye, “Na'anam pisyɔpɔi ka ba da fi'isi ba nu'uraad nɛ ba nɔbraad ka ba bɛ man teebul lɛuŋʋn dit dizɔra. Nannanna Wina'am yɔɔ m sam man da tʋm si'em tisi ba la zug.” Ka ba mɔr o kɛn Jerusalem na ka o kpii anina. 8 Ka Juda nidib duoe zab nɛ Jerusalem mɛ nyaŋ, ka kʋ nidib la wʋsa ka nyu'oe teŋ la nɛ bugum.

9 Din nya'aŋ la ka Juda nidib keŋ zab nɛ Keenan dim banɛ bɛ kʋkʋna teŋ la nɛ Negef nɛ kʋkʋna sisɛrim la. 10 Ka ba zabi nyaŋ Keenan dim la keŋ paae ba nimbanɛ bɛ Hebron, zin'ikanɛ ka ba da dɛŋin buon ye, Kiriaf Ariba la, ka nyaŋ nidib atan' banɛ yʋda buon ye Siesai, nɛ Ahiman, nɛ Talimai la. 11 Ka yii ani zabi keŋ paae nimbanɛ bɛ Debir teŋin ka ba da dɛŋin buon ye, Kiriaf Seefa la. 12 Ka Kaleb yɛl ye, “M na zaŋi m pu'ayua Akisa tis dau kanɛ wʋsa zabi nyaŋ Kiriaf Seefa ka o di.” 13 Ofniel da duoe zabi nyaŋ, o da anɛ Kenas biig, Kenas da anɛ Kaleb pitʋ; ala ka Kaleb zaŋ o pu'ayua Akisa tis o ka o di o. 14 On da paae Ofniel yin la, daar yinne Akisa da yɛl o sid la ye, “Asɛɛ fʋ yɛli m saam ka o tisif paalʋ.” Ka pu'a la da naanɛ o bʋŋ la zugʋ sig la ka o saam Kaleb bu'os o ye, “Fʋ bɔɔd ye m maal bɔɔ tisi fɔ?” 15 O da lɛbis ye, “Tisim bʋn linɛ an sʋ'ʋŋa; fʋn sadigim tisim paalʋ Negef teŋin la, mɛ tisim bulig.” Ka Kaleb tis o bulis ayi', linɛ bɛ zugin nɛ linɛ bɛ teŋir la. 16 Ken dau kanɛ da an Moses diem la yaasi da yi tempʋkanɛ ka ba buon kpʋkparis Teŋ la la'as nɛ Juda dim ye ba keŋ Juda Sian'arin linɛ bɛ Negef la zin'ini kpi'en nɛ Arad teŋ la. 17 Ani ka Juda dim keŋ la'as nɛ Simeon dim banɛ aan ba mabiis la, zab nɛ Keenan dim banɛ bɛ Zefaf teŋin la san'am tempʋʋg la wʋsa. Dinzug ka ba da buon zin'ikan ye Horma. 18 Ka Juda dim mɛ sʋ'ʋg Gaza, nɛ Askɛlon nɛ Ekron tɛɛns nɛ li sʋ'ʋlim wʋsa. 19 Zugsɔb la da bɛ nɛ Juda dim la, ka ba sʋ'ʋg kʋkʋna teŋ la wʋsa, amaa ba da pʋ nyaŋi kad nimbanɛ bɛ zin'ikanɛ ka paalʋ la dig sassi la, bɔzugɔ ba da mɔr widi tɛrekonam banɛ mɔr paŋ la zabid. 20 Ba da zaŋ Hebron n tis Kaleb nwɛnɛ Moses n da zi'el si'em la, ka o kad Anak biribis atan' la yis anina.

21 Benjamin nidib la da pʋ nyaŋi kad Jebus dim banɛ da bɛ Jerusalem la, amaa Jebus dim la da kpɛm bɛ ba san'anɛ zin' nɛ ba Jerusalem teŋin la hali ti paae zina.

22 Ka Josef yaas mɛ da keŋ zab nɛ Betel teŋ, Zugsɔb la da bɛ nɛ ba. 23 Ba da tʋm nidib ye ba labisi kaae Betel teŋ kanɛ ka ba da dɛŋi buon ye Luz la. 24 Ban da keŋ ye ba kaae teŋ la ba da nyɛ dau ka o yit teŋ la pʋʋgin na ka ba yɛl o ye, “Pa'alimi ti tinamɛ na niŋ si'em kpɛn' teŋ la pʋʋgin ka ti na maalif sʋ'ʋŋa.” 25 O da pa'ali ba ka ba kpɛn' zabi kʋ teŋ la nidib ka bas dau la nɛ o yidim wʋsa. 26 Ala ka o da yii keŋ Hitti dim teŋin, mɛ' tempʋʋg ka pʋdi li yʋ'ʋr ye, Luz, ka li yʋ'ʋr kpɛm bɛɛ ala paae zina. 27 Amaa Manase yaas da pʋ kad nimbanɛ bɛ Bet Sean teŋin la bɛɛ Taanak bɛɛ Dor bɛɛ Ibilam bɛɛ Megido nɛ nimbanɛ mɛɛ gilig zin'iban la, din an si'em anɛ Keenan dim da gban'anɛ nɛ nimmua ye ba bɛ teŋ kan la ni. 28 Amaa Israel dimi yʋ'ʋn da paam paŋ la, ba da mugus Keenan dim la nɛ tʋʋm kpi'ema amaa ka pʋ kpɛn kadi ba yis nyainnɛ. 29 Efiram dim mɛ da pʋ kad Keenan dim banɛ bɛ Giza la, amaa Keenan dim la da kpɛn la'am bɛ nɛ ba.

30 Zebulun dim mɛ da pʋ kad Keenan dim banɛ bɛ Kitrun bɛɛ Nahalol la, ba da kpɛn bɛ nɛ ba; amaa li nya'aŋ ba da mugusi ba ye ba tʋm tʋʋm kpi'ema tisi ba.

31 Aser mɛ da pʋ kad banɛ bɛ Ako bɛɛ Sidon bɛɛ Alab bɛɛ Akizib bɛɛ Heliba bɛɛ Afek bɛɛ Rehob tɛɛnsin la. 32 Ka nɛ' zug Aser nidib la da la'am bɛnɛ nɛ Keenan dim banɛ bɛ teŋin la.

33 Naftali dim da pʋ kad banɛ bɛ Bet Semes bɛɛ Bet Anaf tɛɛnsin la, amaa ba da la'as nɛ Keenan dim banɛ bɛ teŋin la; ka li nya'aŋ ba da mugus banɛ bɛ Bet Semes nɛ Bet Anaf la ye ba tʋm tʋʋm kpi'ema tisi ba.

34 Amor dim la da kpɛn gu'ud Dan dimi keŋ paae kʋkʋna teŋ la ni, ka pʋ tisidi ba suor ka ba yit paalʋ zin'ikanɛ an nyain la nii. 35 Amor dim la mɛ da mɔɔd ye ba kpɛn sʋ'ʋg Heres zuor la, nɛ Aijalon nɛ Saalibim tɛɛns la; amaa li nya'aŋ ka Josef yaas da nyɛ paŋ ka mugusi ba ye ba tʋm tʋʋm kpi'ema tisi ba. 36 Alazug ka Amor dim sʋ'ʋlim titɔndig da yi Akirabim keŋ paae Sela hali ka tʋʋg ni.