Ban da pʋdig tembanɛ bɛ Joodan ya-tuona la si'em
14
1 Linɛ dɔl la anɛ ban da pʋdig Keenan teŋ linɛ bɛ Joodan kɔldaug tuon la tis Israel dim la si'em. Eleazar onɛ da an maanmaan la nɛ Josua onɛ an Nun biig la nɛ Israel buudi kpɛɛmnam la da pʋdigi li. 2 Ba da maalnɛ bʋgʋlʋm-bʋgʋlʋm pʋdig teŋ linɛ bɛ Joodan tuon la tis dɔɔd awai nɛ pʋsʋk banɛ kpɛlim la ka li aan ba faar nwɛnɛ Moses n da yɛl si'em la. 3 Moses da pʋn zaŋ teŋ la tis dɔɔd ayi' nɛ pʋsʋk la, Joodan kɔldaug la nya'aŋ; amaa Levi dim la, o da pʋ tisi ba teŋa. 4 Josef dɔɔg la da lieb nɛ dɔɔd ayi'. Banɛ an Manase dim nɛ Efiram dim. O da pʋ tis Levi dim la teŋ la zin'isi'a, amaa ba da bɛnɛ tempʋʋdin nɛ zin'ikanɛ ka ba na kemmi ba bʋnkɔbid. 5 Israel dim la da pʋdig teŋ la nɛ nwɛnɛ Zugsɔb la da yɛl Moses si'em la.6 Daar yinne ka ninsieba yi Juda dɔɔg la nii kɛn Josua san'an Gilgal teŋin na. Kaleb, onɛ an Jefune biig ka yi Kenas dimin la na da yɛl o ye, “Fʋ mi' Zugsɔb la da yɛl si'em tis Moses onɛ an Wina'am nid Kades Banɛa teŋin, ka li anɛ man nɛ fʋn yɛla. 7 Mam da anɛ yʋma pisnaasi, ka Zugsɔb tʋmtʋm Moses tʋm mam ka m yi Kades Banɛa teŋinɛ keŋ labisi gɔs Keenan teŋ la an si'em. M da zaŋ labasʋŋʋ lɛb na tis o nɛ m sʋʋnr wʋsa; 8 amaa m ba'abiis banɛ da dɔlli keŋ la kpɛn'ɛs nidib la dabiem. Ya'a kpɛlim mam, mam da dɔl Zugsɔb Wina'am la tituaa. 9 Daakan la ka Moses da pɔɔ tisim, ye, ‘Keenan teŋgbauŋ kanɛ ka fʋ nɔbir nɔ wʋsa na anɛ fʋn nɛ fʋ yaas la din lin zaŋ zina ken sa, bɔzugɔ fʋ dɔl Zugsɔb Wina'am la nɛ fʋ sʋnf wʋsa.’ 10 Gɔsima, nwɛnɛ Zugsɔb la da kaanbi tisim si'em la, o kɛya ka m kpɛn vʋe yʋma pisnaasi nɛ anu nwa, din yi on da yɛl Moses saŋkanɛ ka Israel dim la da bɛ mɔɔgin ken la hali ti paae zina! Gɔsima, m yʋ'ʋn anɛ yʋma pisnii nɛ anu yʋ'ʋs 11 ka nan kpɛm mɔr paŋ zina nwɛnɛ man da an si'em ka Moses tʋmim ka m keŋ la! M nan kpɛm mɔr paŋ kanɛ na yi zaba bɛɛ tʋm tʋʋm si'a wʋsa. 12 Zaŋim teŋ kanɛ bɛ zuoya ni la tisim, teŋ kan ka Zugsɔb da kaanbi tisim daakan la. Ti da wʋm ye, gandaad buudbanɛ ka ba buon ye Anak dim la bɛɛ ani, ka mɛ' zaŋguom bɛda giligi ba tɛɛns la. Amaa Zugsɔb la na bɛ nɛ mam, ka m na nyaŋi kadi ba yis, nwɛnɛ Zugsɔb la yɛl si'em la.” 13 Ka Josua kaanb, kaanb sʋŋʋ tis Kaleb onɛ an Jefune biig la, ka zaŋ Hebron teŋ la tis o ka li aan o din. 14 Hebron kpɛn anɛ Kaleb yaas teŋ hali ti paae zina bɔzugɔ, o da dɔl Zugsɔb onɛ an Israel Wina'am la nɛ o sʋnf wʋsa. 15 Saŋkanɛ ka Hebron da nan ka' Kaleb din la, ba da buon teŋ la ye Kiriaf Ariba, (Ariba da anɛ onɛ an nintita'ari gaad Anak buudi wʋsa).
Ka teŋ la yʋ'ʋn digin baanlimm ka zaba kae.