<<    <     Josua     13     >    >> 
Tembanɛ ka Israel dim da nam pʋ nyaŋ la
13
1 Josua yʋ'ʋn da kʋdigya, ka Zugsɔb la yɛl o ye, fʋ yʋ'ʋn kʋdig nɛ, amaa tɛɛns bɛdegʋ nan kpɛm bɛ ka ya na sʋ'ʋg. 2 “Tembanɛ kpɛlim nwa: Filistia dim nɛ Gesur dim teŋgbauŋ la wʋsa, 3 lin yi Siihor kɔligin zin'ikanɛ bɛ Egipt teŋ bɛnnɛ ti paae Ekron tempʋʋgin la. Ba gɔsi li ka li anɛ Keenan dim la teŋgbauŋ, amaa Filistia teŋ sʋ'ʋdib banɛ bɛ Gaza la nɛ Asdod nɛ Askɛlon nɛ Gaf nɛ Ekron la sʋ'oe li ya-datiuŋ baba la, ka Avi dim mɛ sʋ'oe li ya-dagɔbʋg la. 4 Keenan dim tɛɛns nan kpɛm bɛ nɛ Meara linɛ ka Sidon dim sʋ'oe la hali ti paae Afek dinɛ bɛ Amor dim sʋ'ʋlim titɔndigin la; 5 nɛ Gebal teŋ nɛ Lebanon wʋsa linɛ bɛ nya'aŋ lin zaŋ Baal-Gad linɛ bɛ Hemon zuor teŋir la ti paae Lebo-Hamat; 6 Sidon dim mɛ la'am paas, banɛ bɛ Lebanon zuor nɛ Misiripof-Mayim teŋsʋk la. M na kad nimbama wʋsa ka kɛ ka Israel dim la keŋ tuonnɛ sʋ'oe ba. Asɛɛ ka fʋ pʋdig teŋ la tis Israel dim la nwɛnɛ man yɛlif si'em la. 7 Nannanna zaŋim teŋ la pʋdig dɔɔd awai la nɛ Manase dɔɔg pʋsʋk la ka ba sʋ'oe li.”
Ban da pʋdig tembanɛ bɛ Joodan ya-nya'aŋ la si'em
8 Moses onɛ da an Zugsɔb tʋmtʋm la da pʋn zaŋ teŋi tis Reuben nɛ Gad nɛ Manase dɔɔg la pʋsʋk. Li da bɛ nɛ Joodan kɔldaug la nya'aŋ. 9 Ba sʋ'ʋlim la da paae Aroa teŋ linɛ bɛ Aanon bɔn'ɔg nɔɔrin la, nɛ teŋ linɛ bɛ bɔn'ɔg la teŋsʋk, la'am nɛ paalʋ linɛ gilig Medeba tempʋʋg la ti paae Dibon teŋin, 10 nɛ Amor dim Na'ab Sihon onɛ da zin' Hesbon tempʋʋgin ka sʋ'oe tɛɛns la keŋ paae Ammon dim sʋ'ʋlim la titɔndigin, 11 la'am nɛ Gilead nɛ Gesur nɛ Maaka, nɛ zuoya banɛ bɛ Hemon nɛ Basan wʋsa, la'am nɛ Saleka. 12 Na'ab Og sʋ'ʋlim la da la'am paas (onɛ da an Basan na'ab ka sʋ'oe Asitarof nɛ Edire tempʋʋdin la. On ma'aa da kpɛlim Refa dimin la).
13 Amaa Israel dim la da pʋ kad Gesur dim bɛɛ Maaka dim la yisɛ, ka ba kpɛm bɛɛ ba teŋin la hali ti paae zina. 14  Ba da pʋ tis Levi dɔɔg la zin'isi'a ka li aan ba dinnɛ, bɔzugɔ maana banɛ ka ba nyu'odi tisid Zugsɔb onɛ an Israel Wina'am la aan ba faar nwɛnɛ on da kaanbi tisi ba si'em la.
15 Moses da zaŋ teŋ la zin'isi'a tis Reuben dɔɔg la ka li aan ba din. 16 Ban sʋ'oe zin'isi'a la anɛ Aroa linɛ bɛ Aanon bɔn'ɔg nɔɔrin la, nɛ teŋ linɛ bɛ bɔn'ɔg la teŋsʋk la, la'am nɛ paalʋ linɛ gilig Medeba tempʋʋg la. 17 Ka la'am sʋ'oe Hesbon tempʋʋg nɛ li teŋkpɛmis banɛ giligi li la, wʋʋ Dibon nɛ Bamof Baal nɛ Bet-Baal-Meon, 18 la'am nɛ Jahaz nɛ Kedemof nɛ Mefaaf 19 nɛ Kiriafaim nɛ Sibma nɛ Zeret-Seaha linɛ bɛ kʋkʋn kanɛ zi'e bɔn'ɔgin la 20 nɛ Bet-Peor linɛ bɛ Pisig zuor teŋir la nɛ Bet-Jesimof. 21 La'am nɛ zuoya banɛ bɛ Sihon sʋ'ʋlimin la, o da anɛ Amor dim na'ab ka bɛ Hesbon tempʋʋgin la. Moses da nyaŋ o, la'am nɛ Midian na'anam banɛ bɛ Evi nɛ Rekem nɛ Zur nɛ Hur nɛ Reba. Na'abama wʋsa da gɔsid teŋ la sʋŋid Na'ab Sihon. 22 Banɛ ka Israel da kʋ la yinne anɛ Balaam onɛ an Beor biig, ka da an ba'abʋgʋd la. 23 Reuben sʋ'ʋlim titɔndig da anɛ Joodan kɔldaug nɔɔr la. Tembama ka ba zaŋi tis Reuben dim ka li aan ba din.
24 Moses da lɛn zaŋ teŋ la zin'isi'a tis Gad dim ka ba mɛ sʋ'oe li. 25 Ka ban sʋ'oe zin'isi'a la la'am kpanb nɛ Jaza nɛ tɛɛns banɛ bɛ Gilead wʋsa, nɛ Ammon dim teŋ la pʋsʋk hali ti paae Aroa linɛ bɛ Rabba nya'aŋ la. 26 Ba teŋ la da pin'il nɛ Hesbon ti paae Ramaf-Misipe nɛ Betonim linɛ pin'il Mahanam ti paae Debir teŋ titɔndig la. 27 La'am nɛ tɛɛns banɛ da bɛ bɔn'ɔgin, wʋʋ Bet-Haram nɛ Bet-Nimira nɛ Sukot nɛ Zaphon nɛ Na'ab Sihon, onɛ da an Hesbon na'ab la da sʋ'oe zin'ikanɛ kpɛlim la wʋsa, lin naan Joodan kɔldaug la ti paae Galile bɛuŋ la. 28 Tembama ka ba zaŋi tis Gad dim la, ka li aan ba din.
29 Moses da zaŋ teŋi tis Manase dɔɔg la pʋsʋk nidib ka ba sʋ'oe li. 30 Ba zin'ig la keŋ paae nɛ Mahanam kpanb nɛ Basan nɛ Na'ab Og onɛ da an Basan na'ab la sʋ'ʋlim la wʋsa; la'am nɛ Havof Jair, tɛɛns pisyuobʋ banɛ bɛ Basan sʋ'ʋlimin la. 31 Li paas Gilead teŋ la pʋsʋk la'am nɛ Asitarof nɛ Edire linɛ an Na'ab Og onɛ an Basan na'ab la na'am tempʋʋd. Ba da zaŋ nɛ nwa wʋsa tis Makir onɛ da an Manase biig la tuŋ dim. Ba nidib la pʋsʋkʋ da di'e li. 32 Tembama wʋsa ka Moses da pʋdigi tisi ba saŋa kanɛ ka o da bɛ Moab teŋ kanɛ an sassi ka bɛ Joodan nya'aŋ, ka kpa'ad Jeriko tempʋʋg la. 33 Amaa Moses da lɛɛ pʋ zaŋ teŋ la zin'isi'a tis Levi dɔɔg laa. O da yɛli ba ye Israel dim Wina'am la aan ba faar.