Israel nyaŋ Jabin nɛ o zabidim taas la
11
1 Ka Jabin onɛ an Hazo teŋ na'ab la da wʋm Israel dimi zabi nyaŋi ba dataas si'em la, o da tʋm yɛl Jobab onɛ an Madon teŋ na'ab la nɛ na'anam banɛ bɛ Simiron nɛ Akisiaf la.2 Ka lɛn tʋm yɛl na'anam banɛ bɛ ya-datiuŋ baba kʋkʋna la zug la, nɛ na'anam banɛ bɛ Araba bɔn'ɔgin linɛ bɛ Kinɛref teŋ la ya-tuona la, nɛ Sefela teŋgbauŋʋn la, nɛ Nafof-Dor teŋgbauŋʋn la. 3 O mɛ da tʋm yɛl Keenan nimbanɛ kpi'e Joodan kɔldaug la, nɛ Amor dim nɛ Hitti dim nɛ Perizi dim nɛ Jebus dim banɛ bɛ teŋin la, la'am nɛ Hivi dim banɛ da zin' Hemon zuor linɛ bɛ Misipa teŋin la. 4 Ka ba wʋsa yina nɛ ba zabzabidib. Ba da anɛ nidib bɛdegʋ zu'oe hali nwɛnɛ atɛuk nɔɔrin titanbin'isʋg nɛ. Ba mɛ da mɔr widi nɛ ba tɛrekonam bɛdegʋ. 5 Na'abama wʋsa da la'as nɛ taaba Merom kɔldaugin ye ba zab nɛ Israel dim la.
6 Zugsɔb la da yɛl Josua ye, “Da zɔti ba dabiem! Ka bɛog anwa saŋa, mam Zugsɔb na kʋʋ ba wʋsa tis Israel dim. Kɛnsimi ba widi la wʋsa gada ka nyu'oe ba tɛrekonam la nɛ bugum.” 7 Ka Josua nɛ o nidib la keŋ Merom kɔldaugin la libigi ba zab nɛ ba. 8 Zugsɔb la kɛ ka Israel dim la paam nyaŋiri kadi ba hali ti sig Sidon Tita'ar la sʋ'ʋlimin nɛ Misiripof-Mayim teŋin, nɛ Misipa bɔn'ɔg linɛ bɛ ya-nya'aŋ la. Zaba la da keŋ tuon hali ka bʋnvʋr pʋ lɛn kpɛlim. 9 Josua niŋ nwɛnɛ Zugsɔb la yɛl o si'em la. O da kɛnsi ba widi la wʋsa gada ka nyu'oe ba widi tɛrekonam la.
10 Josua da fɛndigi lɛbi nyaŋ Hazo tempʋʋg ka kʋ teŋ la na'ab. (Saŋkan la Hazo da sʋ'oe tɛɛns nwa wʋsa). 11 Ba da kʋ sɔ' wʋsa, ka mɛ nyu'oe teŋ la, hali ka bʋnvʋr baa yinne pʋ lɛn kpɛlim.
12 Josua da nyaŋ tɛɛns nwa wʋsa nɛ ba na'anam la ka kʋ sɔ' wʋsa, nwɛnɛ Moses onɛ da an Zugsɔb tʋmtʋm la da zi'el nɔɔr si'em la. 13 Amaa Israel dim la da pʋ nyu'oe tembanɛ ka ba mɛ zaŋguoma gilig laa, ya'a ka' Hazo teŋ la ma'aa ka Josua da nyu'oe. 14 Nidib la da zaŋ la'asʋma nɛ bʋnkɔbid tembama pʋʋgin, ka li aan ba din, amaa ka lɛɛ kʋ nidib la wʋsa ka sɔ' pʋ kpɛlim. 15 Zugsɔb la da yɛl o tʋmtʋm Moses si'em ka Moses di'e yɛli tis Josua la, Josua da siaki niŋi li wʋsa, nwɛnɛ Moses n da yɛl o si'em la.
16 Josua nɛ o zabzabidib la da nyaŋ tembanɛ wʋsa da bɛ kʋkʋna la ni, nɛ Negef nɛ Gosen tɛɛns la nɛ Araba, hali nɛ Israel teŋ zuoya zug nɛ li sisɛrim la wʋsa. 17 O da nyaŋ sɔ' wʋsa lin yi Halak zuor linɛ kpi'e nɛ Edom sʋ'ʋlim la, hali ti paae Baal-Gad linɛ bɛ Lebanon bɔn'ɔgin Hemon zuor la teŋir. 18 Josua nɛ na'abama la da bɛnɛ zaba ni ka li yuug, amaa o da ba'asi nyaŋi ba wʋsa kʋ. 19 Teŋ kae ka Israel da pʋ tʋ'ʋs tanpa, ya'a ka' Gibeon teŋ la ma'aa zin'ikanɛ ka Hivi dim la da bɛ la. Tembanɛ kpɛlim la wʋsa, o da zabi nyaŋi ba. 20 Zugsɔb la da digilimi ba sʋnf ka kɛ ka ba zab nɛ Israel dim, linɛ na kɛ ka ba nyaŋi ba, ka kʋʋ ba, ka li kʋ mɔr nimbaanliga, nwɛnɛ Zugsɔb la da yɛl Moses si'em la.
21 Saŋkaŋa, Josua da keŋ san'am Anak buudbanɛ an nintitada bɛ kʋkʋna, linɛ bɛ Hebron nɛ Debir nɛ Anab nɛ kʋkʋna banɛ bɛ Juda nɛ Israel la. Josua da kpɛn san'ami ba nɛ, nɛ ba teŋgbauŋ la wʋsa. 22 Anak dim la nid sɔ' da pʋ lɛn kpɛlim Israel teŋ la nii, ya'a ka' Gaza nɛ Gaf nɛ Asdod tɛɛnsin la ka nidib kpɛlim bi'ela.
23 Josua da nyaŋ teŋ la wʋsa nwɛnɛ Zugsɔb la yɛl Moses si'em la, ka zaŋi li tis Israel dim ka ba pʋdig, ka dɔɔg wʋsa paam o din.
Ka nidib la zin'inɛ vʋ'ʋs, ka pʋ lɛn zab ya'asɛ.