<<    <     Josua     10     >    >> 
Winnigi zi'en kippi la yɛla
10
1 Na'ab Adoni-Zedek onɛ an Jerusalem na'ab la da wʋm ye Josua nyaŋ Ai ka san'ami li wʋsa ka kʋʋ ba na'ab la nwɛnɛ on da tʋm Jeriko dim nɛ ba na'ab si'em la, ka mɛ wʋm ye Gibeon dim maal nɔnaar nɛ Israel dim ka zin' nɛ ba. 2 On wʋm si'em la da kɛnɛ ka dabiem kpɛn' on nɛ o nidib la bɔzugɔ, Gibeon da anɛ teŋ tita'ar nwɛnɛ teŋ titada banɛ mɔr na'anam si'em la. Li mɛ da zu'oe gaad Ai teŋ la ka ba nidib la wʋsa mɛ an zabzabidib. 3 Alazug ka Adoni-Zedek onɛ an Jerusalem na'ab la da sɔs Hoham onɛ an Hebron na'ab nɛ Piram onɛ an Jarimuf na'ab nɛ Jafia onɛ an Lakis na'ab nɛ Debir onɛ an Eglon na'ab la 4 ye, “Kemi na sʋŋinim ka m zab nɛ Gibeon dim, ka ba yɛl ye ba maal sumbʋgʋsʋm nɔnaar nɛ Josua nɛ Israel dim la.”
5 Ka Ammon na'anam anu banɛ an Jerusalem nɛ Hebron nɛ Jarimuf nɛ Lakis nɛ Eglon na'anam nwa da naal nɔɔr nɛ taaba ka la'asi ba zabzabidib. Ba da dɔlli ba zabzabidib la tʋ'ʋs Gibeon tempʋʋg la nɛ tanp. 6 Ka Gibeon nidib la da tʋm yɛl Josua nɛ banɛ da bɛ Gilgal teŋin la ye, “Da basi tinam banɛ aan fʋ yammis la! Kem tɔ'ɔtɔ na faaɛn ti. Sʋŋimi ti! Bɔzugɔ Ammon dim na'anam banɛ bɛ kʋkʋna zug la la'asi ba zabzabidib la wʋsa kena ye ba zab nɛ ti.” 7 Ka Josua duoe nɛ o zabzabidibi yi Gilgal, la'am nɛ banɛ mi' zaba sʋ'ʋŋa la wʋsa. 8 Ka Zugsɔb la yɛl Josua ye, “Da kɛ ka dabiem mɔri fɔ! Ka mam nɔki ba niŋi fʋ nu'usin. Hali ba sɔ' kae na nyaŋi zab nɛ fɔ.” 9 Ka Josua nɛ o nidib la yi Gilgal n keŋ yʋ'ʋŋ ka pʋ gbisɛ, hali ti libigi ba dataas la. 10 Ban da nyɛ Israel dim la, Zugsɔb la da kɛ ka ba ya'am iank hali ka Israel zabzabidib la nyaŋi ba Gibeon teŋin la. Israel dim da kadi ba ka ba zɔɔ dɔl Bet-Horon, ka kʋʋ ba sieba hali ti paae Azeka nɛ Makeda. 11 Ban da zɔti yit Israel dim san'an la, Zugsɔb la da kɛ ka sakuga yi agɔla na luti ba zugin ban da nam bɛ Bet-Horon nɛ Azeka teŋsʋk la. Sakuga la da lu na kʋ ninsieba la da gaad nimbanɛ ka ba kʋ nɛ zaba sʋ'ʋraad la.
12 Daakanɛ ka Zugsɔb nɔk Amor dimi niŋ Israel nidib nu'usin la, Josua da yɛl Zugsɔb la Israel dim nini ni ye,
“Winniga, zi'enim Gibeon teŋ teŋsʋk!
Nwadiga, fʋn mɛ kpɛm bɛ Aijalon bɔn'ɔgin la.”
13 Ka winnig la sid zi'en anina yim kippi, ka nwadig la mɛ zi'en ani, hali ka ba ti nyaŋi yɔɔ ba dataas la sam. Bʋn linɛ da maal nwa sɔb Jaser Gbauŋʋn. Winnig la da zi'en kippi ka pʋ luu hali ti paae dabismum bɛn. 14 Dabiskaŋa nwa buudi nan zi' bɛɛ, ka mɛ kʋ maligim bɛ dabisa banɛ ken naa. Dabiskaŋa ka Zugsɔb sid da wʋm tis ninsaal. Ya'a an sida, Zugsɔb la da zabi tis Israel.
15 Ka Josua da zaŋ zabzabidib la wʋsa lɛb Gilgal.
Israel dim la zabi nyaŋ tɛɛns bɛdegʋ
16 Na'anam anu nwa da zɔɔ keŋ su'a Makeda tampinlɛma ni. 17 Josua n da wʋm ye ba nyɛɛ ba ka ba su'a tampinlɛma ni la, 18 o da yɛl ye ba biligim kugtitada na ligili li nɔɔr la ka kɛ ka ninsieba guri li. 19 Ka ye, “Amaa da gu'oe ya dataas la kadibɔ, bɛɛ kɛ ka ba paae ba tɛɛns la kpɛn' ka pɔnsɛ, bɔzugɔ Zugsɔb la zaŋi ba niŋi ya nu'usin.”
20 Ka Josua nɛ Israel dim la kpɛn kʋʋ ba wʋsa ka ba bi'ela ma'aa nyaŋi zɔɔ paae ba tempʋbanɛ ka ba mɛ' guoma gilig la pɔns. 21 Ka zabzabidib la wʋsa lɛb Josua san'an nɛ laafi, Makeda teŋin zin'ikanɛ ka ba la'asi bɛ ka zabid la, ka sɔ' pʋ lɛn ya'ae o nɔɔri yɛl Israel si'ela.
22 Josua yʋ'ʋn da yɛl ye, “Yɔ'ɔgimi tampinlɛma la nɔɔr, ka mɔri na'anam anu la na tisim.” 23 Ka ba yis na'anam la na tis o. Na'anam la daa anɛ: Jerusalem na'ab nɛ Hebron na'ab nɛ Jarimuf na'ab nɛ Lakis na'ab nɛ Eglon na'ab. 24 Ka ban da mɔr na'anam la kɛn Josua san'an na la, o da yɛl zabzabidib tuongatib la ye, “Kemi na zaŋi ya nɔba nɔɔ ba niŋgɔnya!” Ka ba sid kena zaŋi ba nɔba nɔɔ ba niŋgɔnya la. 25 Ka Josua yɛli ba ye, “Da zɔti dabiem, mɛ da kɛ ka ya giinla siɛn, zi'enimi sʋ'ʋŋa ka kpɛ'ɛŋi ya sʋnf, ka anwana ka Zugsɔb la na niŋidi ya dataas banɛ wʋsa na ti zabid nɛ ya la.” 26 Ka Josua da kʋ na'anam la ka zaŋi ba ya'al tiis anu zugin, ka basi ba ka ba bɛ tiis la zug hali ti paae zaamnɔɔr. 27 Ka zaam ti ma'ae la, Josua da tis o nidib la nɔɔr ka ba zaŋi ba sigis na mɔri ba lɛbis tampinlɛma la ni, zin'ikanɛ ka ba da su'a la. Ka ba zaŋ kugtitada ligil tampinlɛma la nɔɔr la, hali ka li kpɛm bɛ zina. 28 Li daar ka Josua nɛ o nidib la da zab nɛ Makeda teŋ, ka kʋ teŋ la na'ab ka san'am teŋ la nɛ linɛ wʋsa bɛɛ li ni la, sɔ' da pʋ kpɛlim teŋin la. O da maal Makeda na'ab la nwɛnɛ on da maal Jeriko na'ab si'em la.
29 Josua nɛ Israel nidib la da yi Makeda teŋinɛ keŋ Libna tempʋʋgin zab nɛ ba. 30 Ka Zugsɔb zaŋ teŋ la dim nɛ ba na'ab la niŋ Israel dim nu'usin. Ka Josua kʋ nidib la wʋsa, ka sɔ' da pʋ lɛn kpɛlim ani vʋeya. O da niŋ na'ab la nwɛnɛ on da niŋ Jeriko na'ab si'em la. 31 Ka Josua nɛ Israel nidib la da lɛn yi Libna keŋ Lakis tempʋʋgin; ba da la'asi ba zabzabidibi gilig teŋ la zab nɛ ba. 32 Daba ayi' daar la ka Zugsɔb la zaŋ Lakis n tisi ba. Ka Josua da kʋʋ ba wʋsa nwɛnɛ on da niŋ Libna dim si'em la.
33 Horam onɛ da an Giza na'ab la, da kena zabidi sʋŋid Lakis dim la, la'am nɛ wala Josua da nyaŋi kʋʋ o nɛ o zabzabidib la wʋsa, hali ka sɔ' pʋ kpɛlim. 34 Ka Josua nɛ o nidib la lɛn yii keŋ Eglon tempʋʋginɛ la'as o zabzabidibi zab nɛ ba. 35 Daakan la ka ba tʋ'ʋs tanpi nyaŋi ba ka san'am banɛ wʋsa da bɛɛ anina la nwɛnɛ ban da niŋ Lakis dim si'em la. 36 Ka Josua nɛ Israel nidib la wʋsa yi Eglon n keŋ hali ti paae Hebron tempʋʋgin zab nɛ ba. 37 Ba da nyaŋ teŋ la dim, ka kʋ sɔ' wʋsa; teŋ la dim nɛ ba na'ab nɛ ba teŋkpɛmis la nɛ banɛ wʋsa bɛɛ ani. Ba da san'ami li nwɛnɛ Eglon ka ba da san'am si'em la. 38 Ka Josua nɛ Israel nidib la wʋsa yʋ'ʋn da fɛndigi zab nɛ Debir dim. 39 Ba da nyaŋ tempʋʋg la nɛ li teŋkpɛmis la, nɛ teŋ la na'abi kʋʋ ba ka san'am si'el wʋsa linɛ bɛɛ ani la ka pʋ kɛ si'ela. Ba da niŋ ala nɛ Debir teŋ dim nɛ ba na'ab nwɛnɛ ban da niŋ Hebron nɛ Libna tɛɛns nɛ ba na'anam si'em la.
40 Josua da nyaŋ tɛɛns la si'em la, la'am nɛ tembanɛ bɛ kʋkʋna ni la nɛ Negef nɛ zuoya kpikpɛmis nɛ zuoya teŋir nɛ ba na'anam wʋsa, ka sɔ' pʋ kpɛlim vʋeya; ka san'am bʋnvʋr wʋsa nwɛnɛ Zugsɔb, onɛ an Israel Wina'am la yɛl si'em la. 41 O da nyaŋi ba din pin'il Kades Banɛa ti paae Gaza nɛ Gosen teŋ la wʋsa ti paae Gibeon. 42 O da nyaŋ na'abama nɛ ba tɛɛns la wʋsa saŋa yinne, ka li anɛ ye Zugsɔb onɛ an Israel Wina'am la da zabi tisi ba la zug.
43 Ka Josua yʋ'ʋn da zaŋ Israel dim la wʋsa lɛb Gilgal, zin'ikanɛ ka ba da dɛŋi la'as yiiga la.