Gibeon dimi pan'as Israel dim la
9
1 Na'anam banɛ da bɛ Joodan tuon la da wʋm Israel dimi nyaŋi ba dataas la, banɛ wʋsa da zin' kʋkʋna tɛɛnsin tuonnɛ, dɛn'ɛd Atɛuk Tita'ar nɔɔrin hali ti paae Lebanon la, ka sieba an Hitti dim, nɛ Amor dim, nɛ Keenan dim, nɛ Perizi dim, nɛ Hivi dim nɛ Jebus dim la wʋsa; 2 bama wʋsa da maal nɔɔr yinne la'as taaba ye ba zab nɛ Josua nɛ Israel nidib la wʋsa.3 Amaa Gibeon dimi da wʋm Josua niŋ Jeriko nɛ Ai tɛɛns si'em la, 4 ba da gban'e ye ba pan'as Israel dim la. Ba da gaans kpɛɛm sieba tʋmi ba ka nɔk bɔtkʋda nɛ daam waas banɛ ka' sʋ'ʋm lɔɔ ziili ba bʋmis ka li nwɛnɛ ba yinɛ lallisa na. 5 Ba mɛ da yɛnɛ fukʋda, ka pid ta'adkʋda, ka zaŋ dipɔn'ɔsa paas. 6 Ba da keŋ zin'ikanɛ ka Israel dim la la'as ka li bɛ Gilgal teŋin la, ka yɛl Josua nɛ Israel nidib la ye, “Ti yinɛ zin'ikanɛ lal hali na, ka bɔɔd ye ya maal nɔnaar nɛ ti.” 7 Amaa ka Israel nidib la lɛbisi ba ye, “Bɔ ka tinam nɛ yanam na maal nɔnaarɛ? Daasi'erɛɛ ya pʋ lalnɛ tii.” 8 Ka ba yɛl Josua ye, “Ti anɛ fʋ yammis.”
Ka Josua bu'osi ba ye, “Ya aan anɔ'ɔnama? Ya yi yaanɛ na?” 9 Ka ba ma' yɛl o ye, “Ti yinɛ teŋ lalli na, bɔzugɔ ti wʋm Zugsɔb onɛ aan ya Wina'am la yɛla. Ti wʋm linɛ wʋsa ka o niŋ Egipt teŋin la, 10 ka mɛ wʋm on niŋ si'em nɛ Amor teŋ na'anama ayi' banɛ bɛ Joodan kɔldaug nya'aŋ la, banɛ an Na'ab Sihon onɛ da bɛ Hesbon teŋin nɛ Na'ab Og onɛ da bɛ Asitarof teŋin la. 11 Ti kpɛɛmnam nɛ nidib la wʋsa banɛ bɛɛ ti teŋin la yɛli ti ye ti ti'ebim nɛ diib ka kɛɛn ya san'an na, ka yɛli ya ye ti na tʋm tisi ya, ka ya maal nɔnaar nɛ ti. 12 Gɔsimi ti diib la, tinamɛ daa ti'eb ka yi ye ti tʋ'ʋsi ya la, li daa nan tʋlnɛ. Amaa gɔsimi lin yʋ'ʋn kʋdig ka guunlim si'em. 13 Tinamɛ daa pɛ'ɛl daam waas nwa, ba daa anɛ bʋmpaala, amaa ba yʋ'ʋn aansnɛ. Ti fuud nɛ ti ta'ada mɛ kʋdig nɛ, ti suori wa'am la zug.” 14 Ka Israel nidib la da siaki di'e ba diib bi'ela di ka pʋ bu'os Zugsɔb la li yɛlaa. 15 Josua da naal nɔɔr nɛ ba ka ye o na kɛ ka ba bɛ nɛ ba nɛ sumbʋgʋsʋm. Israel kpɛɛmnam la mɛ da bas nɔɔri tisi ba ye ba na dɔl ban kaanbi zi'el si'em la.
16 Ban da maal nɔnaar nɛ ba la nya'aŋ, li daba atan' daar ka Israel dim da yʋ'ʋn baŋ ye Gibeon dim la bɛ nɛ yamma. 17 Ka Israel dim la duoe ye ba keŋ ie nidib la teŋ zin'ig, ka li nɔki ba daba atan' ka ba naan paae ba tempʋʋd la, tɛɛns la da anɛ Gibeon nɛ Kiefira nɛ Beerot nɛ Kiriaf Jiarim. 18 Amaa Israel dim la da pʋ nyaŋi kʋʋ baa bɔzugɔ ba kpɛɛmnam la da maal nɔnaar nɛ Zugsɔb onɛ an Israel Wina'am la yʋ'ʋr zug. Ka nidib la da nyɔnnɛ ba kpɛɛmnam la li yɛla. 19 Amaa ba kpɛɛmnam la da yɛli ba ye, “Tinam pɔnɛ Zugsɔb onɛ an Israel Wina'am la tuon ye ti kʋ si'isi baa. 20 Tinamɛ na niŋ si'em nwa: Asɛɛ ka ti kɛ ka ba vʋe, ya'a ka' alaa ti na san'ami ti nɔnaar la ka san'auŋ luu ti zug.” 21 Ka kpɛɛmnam la lɛn yɛl ye, “Ti na kɛ ka ba vʋe, amaa ba na nwaad daad ka ziid ku'om tisidi ti nidib la wʋsa.” Ala ka kpɛɛmnam la kaanbʋg la kpɛn zi'e.
22 Josua da buol Gibeon dim la na ka yɛli ba ye, “Bɔ ka ya pan'asi ti ye yanam yinɛ lalli na, ka bɛ kpɛla yamminɛ? 23 Yanamɛ maal bʋnkaŋa la zug, nɔpɔɔr bɛɛ ya zug, lin zaŋ zina ken sa ya na nwaad daad ka ziid ku'om tisid Israel Wina'am Pʋ'ʋsim Yir la.” 24 Ka ba lɛbis o ye, “Linɛ kɛ ka ti maal anwa la anɛ ban da yɛli ti ye ya Zugsɔb Wina'am la da yɛl Moses ye o nɔkim teŋ kaŋa wʋsa tisi ya, ka san'am bʋnvʋr kanɛ wʋsa bɛɛ ani la. Ka ti vʋm zugʋ daa kɛ ka ti zɔɔ ya dabiem, linɛ kɛ ka ti maal nwa' la. 25 Nannanna ti bɛnɛ fʋ nu'usin, maalimi ti fʋn bɔɔd si'em.” 26 Alazug ka Josua da sʋŋi ba ka pʋ siak ka Israel dim la kʋʋ baa. 27 Amaa nɛ wala, o kɛ ka ba an yammisi nwaad daad ka ziid ku'om tisid Israel dim nɛ zin'ibanɛ ka Zugsɔb la gaŋ ye ba maan malima la. Ala ka ba aɛn hali ti paae zina.