Josua 8

Israel dim nyaŋ Ai teŋ la

1 Ka Zugsɔb la yɛl Josua ye, “Zaŋim zabzabidibi mɔri keŋ Ai teŋin. Da zɔt dabiem, bɛɛ kɛ ka fʋ giinla siɛn. M na kɛ ka fʋ nyaŋ Ai na'ab la nɛ o nidib nɛ o tempʋʋg la ka teŋgbauŋ la na lɛbigi ya din. 2 Maalimi Ai nɛ ba na'ab la nwɛnɛ yanamɛ da maal Jeriko nɛ ba na'ab si'em la. Amaa nannanna, ya na tun'e zaŋi ba la'ad nɛ ba bʋnkɔbid la sʋ'oe. Kɛl ka zabzabidib la su'a mɔɔgin ka ti yina libig nidib la ka li lidigi ba.”

3 Ka Josua nɛ o zabzabidib la niŋ asiri keŋ Ai ye ba zab nɛ ba. O da gaansnɛ zabzabidib tusa pistan' banɛ mi' zaba sʋ'ʋŋa ka kɛ ka ba keŋ yʋ'ʋŋ, 4 ka yɛli ba ye, “Su'ami teŋ la kpikpɛŋ, amaa ka lɛɛ da laligi na ala saa, ka maali siri guri. 5 Ka man nɛ m nidib la na keŋ teŋin la. Ka Ai dim la ya'a yina ye ba zab nɛ ti, ti na fɛndigi zɔt nwɛnɛ tinamɛ daa niŋ si'em yiigin la. 6 Ba na kadi ti yi teŋ la yiŋ ka ti pan'asi ba mɔri keŋ lallisa. Ka ba tɛn'ɛs ye ba nyaŋi ti nɛ ka ti zɔt nwɛnɛ ban daa niŋi ti si'em yiigin la. 7 Ka ya yʋ'ʋn na yii ya suak zin'igin la na kpɛn nyaŋi ba ka sʋ'ʋg teŋ la. Ya Zugsɔb onɛ aan ya Wina'am la na zaŋ teŋ la tisi ya. 8 Ka ya ya'a nyaŋ teŋ la yanam on nyu'omi li nɛ bugum nwɛnɛ Zugsɔb la tisi ya nɔɔr ye ya tʋm si'em la. Nwa' ka m yɛti ya ye ya niŋ.”

9 Ka Josua kɛ ka ba yii keŋi ba suak zin'igin linɛ bɛ Ai ya-tuona la, Ai nɛ Betel tɛɛns la teŋsʋk; ka Josua mɛ kpɛlim nidib la san'an yʋ'ʋŋ la wʋsa. 10 Ka bɛogʋ nie la ka Josua duoe la'as zabzabidib la wʋsa ka on nɛ Israel kpɛɛmnam gaad tuonnɛ dɔlli ba keŋ Ai. 11 Ka o dɔl zabzabidib la keŋ li'el teŋ la ka ba la'as taaba digin tempʋʋg la ya-datiuŋ baba, ka bʋmbɔk bɛ ban nɛ Ai teŋsʋk. 12 O da pʋn dɛŋi kɛnɛ ka dap tusa anu keŋ su'a teŋ la ya-tuona, linɛ bɛ Ai nɛ Betel teŋsʋk la. 13 Ba da kɛ ka zabzabidib la ti'ebi zi'e ba zin'isin sʋ'ʋŋa. Bam da bɛnɛ ya-datiuŋ ka bam mɛ kpɛlim su'a teŋ la ya-tuona. Ka Josua mɛŋ da sigi gbɛn bʋmbɔkin la yʋ'ʋŋ kan la. 14 Ai na'ab la da nyɛ Josua nidib la, on nɛ o zabzabidib la da kpɛn isignɛ bɛkɛungʋ ti'ebi ken ye ba zab nɛ Israel dim zin'ikanɛ kpa' Araba bɔn'ɔg la, amaa o da zi' ye nidib su'a tempʋʋg la nya'aŋa. 15 Josua nɛ o nidib la wʋsa da pan'asi ba nɛ zɔti kpa'ad zin'ikanɛ an sian'anr la. 16 Ba da buol teŋ la nidib wʋsa ye ba yina kadi ba, ka ba kpɛn yina kat Josua, ka ba maligim tʋgis tuonnɛ ti lalig sa ka bas teŋ la. 17 Dau baa yinne da pʋ kpɛlim Ai; ba wʋsa da yinɛ kat Israel nidib la ka basi ba teŋ za'anɔya la ka li yɔ'ɔs ka onɛ gur kae.

18 Ka Zugsɔb la yɛl Josua ye, “Zaŋimi fʋ kpan la tiesi kpa' Ai tempʋʋg, ka man zaŋi lii tisif!” Ka Josua niŋ nwɛnɛ on yɛl o si'em la. 19 Ka on kpɛn ʋk o nu'ug la, nimbanɛ su'a mɔɔgin la da yi tɔ'ɔtɔ na zɔɔ keŋ kpɛn' teŋ la pʋʋgin nyaŋi li ka nyu'oe teŋ la bugum. 20 Ai nidib la da fɛndigi gɔs nya'aŋ la, ba nyɛ ka nyɔ'ɔs kpɛn zɔɔnd teŋin la dʋt agɔla. Ba da pʋ nyɛ suori na zɔɔ keŋ tuon bɛɛ lɛb nya'aŋa, bɔzugɔ Israel nimbanɛ da zɔɔ paae sian'arin la da fɛndigi lɛb na zabid nɛ ba. 21 Josua nɛ o nidib la da nyɛ ka o nidib la nyaŋi nyu'oe teŋ la, ba da kpɛn fɛndignɛ gban'e Ai nidib la kʋʋb. 22 Ka Israel nimbanɛ da bɛ Ai teŋin la yina pɛ'ɛsi ba taab la zug ka ba gilig Ai nidib zin'ig wʋsa. Ba da kʋʋ ba ka pʋ bas sɔ'ɔsɔ. 23 Ai na'ab la ma'aa ka ba da gban'e mɔri keŋ Josua san'an.

24 Israel dim da kʋ Ai dim banɛ bɛ paalʋ la, nɛ banɛ zɔɔ keŋ sian'arin la, hali ka sɔ' pʋ kpɛlim; ba yʋ'ʋn da lɛb tempʋʋgin la san'ami li nɛ nimbanɛ bɛɛ ani la wʋsa. 25 Ba da kʋ sɔ' wʋsa Ai teŋin daakan la. Ba dap nɛ pu'ab wʋsa da la'as nɛ tusa pii nɛ ayi'. 26 Ka Josua da kpɛn kɛ ka o kpan la kpa' Ai dim ka pʋ digilɛ, hali nɛ ban ti kʋ sɔ' wʋsa. 27 Israel nidib la da kad bʋnkɔbid ka vaae la'ad teŋin la nwɛnɛ Zugsɔb la yɛl Josua si'em la.

28 Josua da nyu'oe Ai nɛ bugum ka li san'am hali. Li kpɛn anɛ dabɔɔdi ti paae zina. 29 O da nɔk Ai na'ab la yul tiig zug ka bas o ani ti paae zaamnɔɔr. Ka lin da sɔbid la, Josua da tis nɔɔr ye ba yisim o niŋgbiŋ la. Ba da lɔb o niŋgbiŋ la bas teŋ la za'anɔɔrin ka zaŋ kuga bɛdegʋ diinl o, ka li an dʋtita'ar hali bɛɛ ti paae zina.

Josua karim Wina'am wada tis Israel dim

30 Josua da mɛ maan bimbim Ebal zuor zugʋ tis Zugsɔb onɛ an Israel Wina'am la. 31 O da mɛɛ linɛ wʋʋ Moses onɛ da an Zugsɔb tʋmtʋm la da pa'al Israel biis la si'em ka li bɛ Moses zi'ela gbauŋʋn la. O da nɔknɛ kugbanɛ ka ba pʋ kpi'e ba nɛ kʋnt la'adi mɛ' bimbim la. Ani ka ba da maal nyu'or maan nɛ taaba la'asʋg maannɛ tis Zugsɔb la. 32 Ani ka Josua zaŋ kuga sɔb zi'ela linɛ ka Moses da pʋn sɔb la niŋ kuga la zug, ka Israel nidib nyɛ. 33 Ka Israel dim nɛ ba kpɛɛmnam nɛ ba sariakatib nɛ banɛ an teŋ zʋŋ dim wʋsa da zi'en Zugsɔb Nɔnaar Daka la datiuŋ nɛ dagɔbʋg, kpa'ad maanmaannib banɛ an Levi dim la, ka ba sieba nya'aŋ bid Gerizim zuor, ka sieba mɛ bid Ebal zuor la. Zugsɔb la tʋmtʋm Moses da pʋn dɛŋi yɛli ba ye ba niŋa nwa, saŋkanɛ wʋsa ka ba ye ba kaanb, kaanb sʋŋʋ tis nidib la. 34 Ka lin nya'aŋ ka Josua karim zi'ela la wʋsa ka ba wʋsa wʋm. O da karim albareka nɛ nɔpɔɔr yɛla, nwɛnɛ lin sɔbi niŋ zi'ela gbauŋʋn si'em la. 35 Linɛ wʋsa bɛ Moses zi'ela la ni la, Josua da karimi li tis nimbanɛ da la'as ani la, ka ba pu'ab nɛ ba biis nɛ saam banɛ bɛ nɛ ba la da la'am bɛ; o da pʋ bas zi'elʋg baa yinnee.