Akan tʋʋmbɛ'ɛd
7
1 Amaa Israel dim la da ki'is o nɔɔri zaŋi ken la'abanɛ an Zugsɔb din la. Akan onɛ da an Karmi biig ka Karmi an Zimiri biig ka on mɛ an Zera biig ka an Juda dɔɔg nid la da zu la'ad la sieba. Ka Zugsɔb sʋnf duoe nɛ Israel dim la.2 Josua da tʋm ninsieba ka ba yi Jeriko keŋ Ai tempʋʋgin linɛ bɛ Betel nya'aŋ ka kpi'e Bet-Aven teŋ la, ye ba kem gɔs teŋ la. Ka ba sid da niŋ ala 3 ka lɛb na tis Josua labaar ye li pʋ sʋm ye nidib la wʋsa keŋ Ai zabɛ, amaa o tʋm nidib tusa ayi' bɛɛ atan' ma'aa. Ba da yɛl ye, “Da tʋm zabzabidib la wʋsa anina ye ba zabɛ, ka li ka' teŋ tita'arɛ.” 4 Dinzugɔ Israel dim nidib tusa atan' da keŋi zab nɛ nidib la. Amaa Ai dim da nyaŋi kadi ba. 5 Ba da kadi ba teŋ la za'anɔɔrin hali ti paae bʋmbɔk kanɛ ka ba da tuud kugbɛda nwa'ad la sisɛrim, kʋʋ ba nwɛnɛ ba nidib pistan' nɛ ayuobʋ.
Ka dabiem da kpɛn' Israel dim la, ba da pʋ lɛm mɔr sʋnkpi'euŋʋ. 6 Ka Josua nɛ Israel dim kpɛɛmnam la sʋʋnr san'am ka ba vanbin teŋ Zugsɔb la Nɔnaar Daka la tuon, ka digin ani ti paae zaam, ka bugu ba zut nɛ uusʋg ye li pa'ali ba sʋnsa'aŋ. 7 Ka Josua yɛl ye, “Zugsɔba, fʋnɛ sʋ'oe si'el wʋsa linɛ bɛ, bɔ ka fʋ mɔri ti lɔ'ɔŋ Joodan kɔldaug la na? Fʋ ye fʋ zaŋi ti tis Amor dim la nɛ ka ba san'ami tii? Ti ya'a daa mi'in ka siaki kpɛlimin Joodan lɔ'ɔm la, li naan kʋ sɔn'ɔnɛɛ? 8 M Zugsɔba, m na yɛl ye bɔ, Israel dataas la yʋ'ʋn nyaŋi ba ka fɛndigi zɔ si'em la? 9 Keenan dim nɛ banɛ wʋsa bɛ teŋin la ya'a wʋmi li yɛla, ba na giligi ti kʋʋ ti wʋsa! Ka fʋ na niŋ wala gu' ka fʋ girima la kʋ yi?”
10 Ka Zugsɔb la lɛbisi yɛl Josua ye, “Duom zi'en! Bɔ ka fʋ vanb teŋinɛ anwana? 11 Israel tʋmnɛ tʋʋmbɛ'ɛd ka ki'is man zi'el nɔsi'a ye ba dɔl la. Ba zaŋ la'abanɛ ka ba naan san'amin la ye li aan ba mɛŋ din. Ba zuu ba nɛ, ka ma' ye li anɛ ba mɛŋ din. 12 Dinzug ka Israel dim pʋ nyaŋi zab nɛ ba dataas la ka fɛndigi zɔ la. Ba zɔya ka li anɛ banɛ bɔ san'auŋʋ tisi ba mɛŋ. M kʋ lɛm bɛ nɛ ba ya'asɛ, ya'a ka' ba san'am la'abanɛ ka m yɛli ba ye ba da zaŋ laa.
13 “Duom maal nidib la ka ba an nyain. Yɛlimi ba ye ba maalimi ba mɛŋ nyain gur bɛkanɛ nied la; bɔzugɔ Zugsɔb onɛ an Israel Wina'am la yɛt si'eli nwa: La'abanɛ ka m yɛli ba ye ba san'am bas la bɛɛ ba san'an. Ba kʋ nyaŋi zab nɛ ba dataas la, ya'a ka' ba yis la'ad la nɛ. 14 Yɛlimi ba ye bɛog bɛogʋn ban yii zi'en dɔɔg-dɔɔg; ka dɔkanɛ ka m gaŋ la, dɔkan dim na yina zi'en tuŋ-tuŋ, ka tuŋ kanɛ ka m gaŋ la na yi tuon na zi'en yir-yir; ka yir kanɛ ka m gaŋ la na yi tuon na zi'en dau yinne-yinne. 15 Ka ninkanɛ ka ba gban'e o ka o mɔr la'abanɛ ka ba zaŋi pɛsig la, ba na nyu'oe on nɛ o yidim nɛ on mɔr si'el wʋsa bugum. Bɔzugɔ o mɔr nyan tita'ari kɛn Israel dimin na, ka ki'isi m nɔɔr.”
16 Ka Josua daa duoe bɛkɛung asuba ka kɛ ka Israel dim la yi tuon na dɔɔg-dɔɔg, ka ba da gaŋ Juda dɔɔg. 17 Ka o mɔr Juda dim la yi tuon na ka ba gɔsi ba tuŋ-tuŋ, ka gaŋ Zera tuŋ. Ka o mɔr Zera tuŋ la yi tuon na, ka gɔsi ba yir-yir, ka gaŋ Zimiri yidim. 18 Ka o mɔr Zimiri yidimi yi tuon na ka ba gɔsi ba yinne-yinne ka gaŋ Akan onɛ an Karmi biig ka an Zimiri yaaŋ la.
19 Ka Josua yɛl o ye, “M dakɔɔnrɛ, tisim Zugsɔb onɛ an Israel Wina'am la girima ka na'as o. Yɛlimim nannanna fʋn maal si'el; da su'a li nɛ mam.” 20 Ka Akan lɛbis ye, “Asida, mam tʋm tʋʋmbɛ'ɛdi pɔ'ɔg Israel Wina'am. Mam maal si'eli nwa: 21 Man daa nyɛ Babilon dim fuvɛnliŋ nɛ anzurifa gbila kɔbisyi' nɛ sanlim gbila pisnu, ka m ya'am kpɛn' ba galis ka m zaŋi ba. M tunɛ bʋmbɔkʋ m Fuug Sʋgʋrin la su'a anzurifa la ka zaŋ fuug nɛ sanlima la pa'ali li zugʋ pin'.” 22 Ka Josua tʋm ninsieba ka ba zɔɔ keŋ sʋgʋrin la ka nyɛ la'ad la ka o pin' ba anina, ka anzurifa la bɛɛ li teŋir. 23 Ba da zaŋi ba yi Fuug Sʋgʋr la ni na ka mɔri keŋ Josua nɛ Israel dim la san'anɛ digil Zugsɔb la tuon.
24 Josua nɛ Israel dim la da gban'e Akan ka zaŋ anzurifa nɛ fuug nɛ sanlima la nɛ Akan biribis nɛ bipumis nɛ o niigi nɛ bʋmis nɛ pɛ'ɛs nɛ o Fuug Sʋgʋr la nɛ o mɔrim wʋsa mɔri ba keŋ bɔn'ɔg linɛ yʋ'ʋri buon Akor Bɔn'ɔg la. 25 Ka Josua bu'os o ye, “Bɔ ka fʋ mɔr yɛl kaŋa kɛɛn ti san'an na? Zugsɔb la mɛ yʋ'ʋn na mɔr yɛla kɛɛn fʋ zugin na.” Ka nidib la wʋsa lɔb Akan n kʋʋ o, ka yʋ'ʋn lɔb o yidim la kʋʋ ba ka nyu'oe ba nɛ la'ad la wʋsa. 26 Ba da zaŋ kuga diinl o ka li dʋ dʋʋr hali ka nan kpɛm bɛ zina. Lina kɛ ka ba buon zin'ikan la ye, Akor Bɔn'ɔg la. Ka Zugsɔb sʋnf nyaan yʋ'ʋn ma'ae.