Israel dim nyaŋ Jeriko teŋ
6
1 Jeriko tempʋʋg zaŋguom za'anɔya la da yɔnɛ kpar kiŋ-kiŋ Israel dim la yɛla. Sɔ'ɔsɔ da pʋ nyaŋidi yit bɛɛ kpɛn'ɛda.2 Zugsɔb la da yɛl Josua ye, “M zaŋ Jeriko teŋ la niŋi ya nu'usin, la'am nɛ ba na'ab nɛ ba zabzabidib la wʋsa. 3 Yanam nɛ ya zabzabidib la na keŋ gilig teŋ la daar wʋsa nɔɔr yinne. Niŋimini anwa ti paae daba ayuobʋ. 4 Kɛl ka maanmaanniba ayɔpɔi mɔr na'atana bɛ Nɔnaar Daka la tuon. Ka daba ayɔpɔi daar la, ya na gilig teŋ la nɔɔr ayɔpɔi ka maanmaannib la piebidi ba na'atana la. 5 Ka ya ya'a ti wʋm ka ba pieb na'atana la ka li yuug hali, ka sɔ' wʋsa wʋmi li, ba wʋsa kaasim kuŋ ka teŋ la zaŋguoma na lu, ka zabzabidib la wʋsa nyaŋi kpɛn' teŋin la.” 6 Ka Josua buol maanmaannib la yɛli ba ye, “Zaŋimi Nɔnaar Daka la ka ya nidib ayɔpɔi bɛɛ li tuon ka mɔr na'atana.” 7 Ka Josua yɛl zabzabidib la sieba ye ba nɔkimi ba zaba la'adi gilig teŋ la ka gaad Nɔnaar Daka la tuon.
8 Josua n tu'as nidib la naae la, banɛ mɔr na'atana la da duoe gaad tuonnɛ piebidi ba na'atana la, ka Nɔnaar Daka la bɛ ba nya'aŋ. 9 Ka zabzabidib la sieba gaad maanmaannib banɛ piebid na'atana la tuon, ka ba sieba bɛ Nɔnaar Daka la nya'aŋ ka ba kpɛn piebid na'atana la yim. 10 Josua da pʋn yɛl nidib la ye, “Mid ka ya ki'e tanp kuŋ bɛɛ pian' agɔla bɛɛ yɛl si'el, hali ti paae daakanɛ ka m na tisi ya nɔɔr ye ya kuusim la.” 11 Ka o kɛ ka ba zaŋ Nɔnaar Daka la gilig teŋ la nɔɔr yinne ka lɛbi ba la'asʋg zin'igin la digin. 12 Ka Josua isig bɛkɛung, ka maanmaannib la zaŋ Nɔnaar Daka la 13 ka maanmaannib ayɔpɔi zaŋ na'atana piebid yim. Ka zabzabidib la sieba gaadi ba tuon, ka sieba bɛ Nɔnaar Daka la nya'aŋ ka ba kpɛn piebid na'atana la yim. 14 Ka daba ayi' daar la, ba keŋ gilig teŋ la nɔɔr yinne ka lɛbi ba la'asʋg zin'igin. Ba niŋ ala daba ayuobʋ la wʋsa.
15 Ka daba ayɔpɔi daar la ka ba isig bɛkɛungʋ keŋ gilig teŋ la nɔɔr ayɔpɔi. Dabiskaŋa ma'aa ka ba gilig nɔɔr ayɔpɔi. 16 Linɛ da paas ayɔpɔi la maanmaannib la da piebi ba na'atana la, ka Josua yɛl o nidib la ye, “Kuusimi, bɔzugɔ Zugsɔb la zaŋ teŋ la tisi ya! 17 San'ami teŋ la nɛ linɛ wʋsa bɛɛ ani ka li an maannɛ tis Zugsɔb la. Ya'a ka' Rahab onɛ an pu'agɔɔndir nɛ o yidim la ma'aa ka ya na basɛ, bɔzugɔ o daa su'a ti nimbanɛ daa keŋ labis ye ba vɛɛns teŋ la. 18 Amaa da zaŋ si'el ka li an Zugsɔb maan bʋn teŋ la nii. Ya ya'a zaŋ si'el, san'auŋ nɛ yɛla na lu Israel la'asʋg la ni. 19 Ka linɛ wʋsa an sanlima nɛ anzurifa nɛ kʋnt anɛ Zugsɔb la din, li anɛ ye ya zaŋi li niŋ Zugsɔb la ligidi suak zin'igin.”
20 Maanmaannib la pieb na'atana la ka nidib la wʋm la, ba wʋsa maali tʋkpiidʋg ka zaŋguoma la lu. Ka zabzabidib la wʋsa paam suor zin'ig wʋsa kpɛn' teŋin la zabi nyaŋi li. 21 Ka ba nɔki ba zaba sʋ'ʋraad la kʋ sɔ' wʋsa teŋ la ni, dap nɛ pu'ab, nɛ dasam nɛ bʋnkʋt wʋsa. Ka mɛ kʋ niigi nɛ pɛ'ɛs nɛ bʋmis.
22 Ka Josua yɛl dapa ayi' banɛ da dɛŋi keŋ gɔs teŋ la ye, “Kemi pu'agɔɔndir la yin, ka mɔr on nɛ banɛ wʋsa aan o nidib la yina nwɛnɛ yanamɛ daa pɔɔ tis o si'em la.” 23 Ka dasam la keŋ kpɛn' mɔr Rahab nɛ o ba' nɛ o ma nɛ o ba'abiis nɛ banɛ wʋsa kpin nɛ o la yina. Ba da mɔr o yidim wʋsa yina ka zaŋi baa niŋ zin'isi'a linɛ da an Israel dim la la'asʋg zin'ig la kpikpɛŋ.
24 Ka ba yʋ'ʋn la'aŋ tempʋʋg la nɛ bugum, la'am nɛ si'el wʋsa linɛ bɛ teŋin la. Amaa ba da zaŋ anzurifa nɛ sanlima nɛ la'abanɛ an kʋntzɛn'ug nɛ kuntmɛŋir la niŋ zin'ikanɛ ka ba digin Zugsɔb ligidi la. 25 Amaa Josua da bas Rahab onɛ an pu'agɔɔndir la nɛ o yidim nɛ banɛ an o nidib la wʋsa, bɔzugɔ on daa su'a nimbanɛ ka Josua da tʋm ye ba dɛŋi kaae gɔs Jeriko teŋ la. Ka Rahab kpɛm bɛ nɛ Israel dim la keŋ paae zina.
26 Saŋa kan la, Josua da yɛl nɔɔri zi'el ye, “Ninkanɛ wʋsa ye o maligim mɛ' Jeriko teŋ la, Zugsɔb la kaanb bɛ'ɛd bɛ ninkan zugin. Onɛ wʋsa ye o dɛŋi ɛɛnb teŋ la ɛɛnbir na kɔ'ɔŋ o biribiŋ kpɛɛm, ka onɛ mɛ ye o mɛɛ li za'anɔɔr la naae na kɔ'ɔŋ o bikpaanr.”
27 Ka Zugsɔb la da bɛ nɛ Josua ka o yʋ'ʋr yi teŋ la wʋsa ni.