5
1 Ammon dim na'anam banɛ da bɛ Joodan kɔldaug tuon nɛ Keenan dim na'anam banɛ da bɛɛ Atɛuk la nɔɔrin baba la da wʋm Zugsɔb la kɛ ka Joodan kɔldaug ku'om la kpiɛn hali ka Israel dim la wʋsa ti lɔ'ɔŋi naae la, ba giinla wʋsa da siɛnnɛ ka ba pʋ lɛm mɔr sʋnkpi'euŋ kanɛ na zab nɛ Israel dim la.Ba kpɛn'ɛs dap la baŋʋ
2 Ka Zugsɔb yɛl Josua ye, “Gaŋim ninsieba ka ba maal kuga baris, ka gaans banɛ pʋ kpɛn' baŋʋ la kpɛn'ɛsi ba.” 3 Ka Josua siak Zugsɔb la nɔɔr ka kɛ ka ba niŋ ala, ka ba da pʋd zin'ikanɛ ka ba kpɛn'ɛsid baŋʋ la yʋ'ʋr ye Gibeaf Haralof.a 4 Dinɛ da kɛ ka Josua kɛ ka ba kpɛn' baŋʋ la anɛ anwa: Israel dap banɛ da yi Egipt ka siak zaba ken la da kpinɛ mɔɔgin la wʋsa. 5 Nimbanɛ da yi Egipt na la wʋsa da pʋ kpɛn' baŋʋ, amaa banɛ ka ba da du'a suorin mɔɔgin la da pʋ kpɛn' baŋʋʋ. 6 Israel dim la da giligidnɛ sian'arin yʋma pisnaasi hali ka nimbanɛ da siak zaba ken saŋkan ka ba da yi Egipt la ti kpii naae, ban pʋ siak Zugsɔb nɔzi'ela la zug. O da pɔ nɔɔri zi'el ye o na kɛ ka ba kpɛn' sʋ'ʋg teŋ kanɛ pʋbid bin'isim nɛ siind ka o da kaanbi tisi ba yaanam la. 7 Ba biribis la ka Zugsɔb da kɛ ka ba nɔbigi di'e ba zin'ig, amaa ba da nam pʋ kpɛn' baŋʋʋ. Linɛ kɛ ka Josua da kpɛn'ɛsi ba baŋʋ la. 8 Ban da kpɛn'ɛsi ba naae la, nidib la wʋsa da la'as nɛ kpɛm bɛ ban bɛ si'el la, hali ka banɛ kpɛn' baŋʋ la fɛn'ɛd bin'ei naae. 9 Zugsɔb la da yɛl Josua ye, “Ya da anɛ yammis Egipt teŋin ka dit nyan, amaa zina ka m yisi ya nyannɛ bas.” Lina zug ka ba buon zin'ig la ye Gilgal, ka yʋ'ʋr kan kpɛn bɛ hali nɛ zina.
Israel dim maal Kum Maliak Gaadʋg malʋŋ
10 Israel dimi da nam bɛ Gilgal teŋin Jeriko teŋ kanɛ an sassi ni la, ba da maal Kum Maliak Gaadʋg malima la nɛ nwadig dabisa pii nɛ anaasi daar zaam. 11 Bɛogʋ da nie la, ba da pin'ili di Keenan teŋin diib, li da anɛ kawɛnsɛn'ɛda nɛ bodobodo kanɛ ka danbin pʋ gɛndigɛ. 12 Ka ban pin'ili dit teŋ la diib la, manna la da pʋ lɛn lit naa. Israel dim la sid da pʋ lɛn nyɛ manna la ya'asɛ, asɛɛ Keenan teŋ diib la ma'aa.
Zugsɔb tanp tuongat la
13 Josua da bɛ Jeriko tempʋʋg baba la, o da ʋk o nini gɔsi nyɛ dau sɔ' ka o mɔr zaba sʋ'ʋg o nu'uginɛ zi'en o tuon. Ka Josua keŋ paae o, ka yɛl o ye, “Fʋ anɛ ti nid bɛɛ ti zabdimtaas la yinnɛ?” 14 Ka o lɛbis o ye, “Ayei, m kena ye m gaad Zugsɔb tanp la tuon.” Ka Josua da igin teŋin na'as o ka yɛl ye, “Naa, m zugdaana, bɔ ka fʋ ye fʋ pa'ali ma?” 15 Ka Zugsɔb Tanp Tuongat la lɛbis ye, “Pidigimi fʋ ta'ada la, ka fʋn zi'e si'el la an kasi.” Ka Josua pidigi li.