Israel dimi pi'is kuga digil ye li tiɛndi ba Wina'am nyalima tʋʋma la
4
1 Ka nidib la wʋsa da lɔ'ɔŋ Joodan kɔldaug la naae la, Zugsɔb la da yɛl Josua ye 2 “Buolim dap pii nɛ ayi' banɛ yi dɔɔd pii nɛ ayi' la ni na, 3 ka yɛli ba ye ba nɔk kuga pii nɛ ayi' Joodan kɔldaug la sʋʋgin zin'ikanɛ ka maanmaannib la zi'en la mɔri keŋ digil zin'ikanɛ ka ba na gbɛn yʋ'ʋŋa la.” 4 Ka Josua buol dap pii nɛ ayi' banɛ ka o pʋn gaŋ la, 5 ka yɛli ba ye, “Kemi Zugsɔb onɛ aan ya Wina'am la Nɔnaar Daka dinɛ bɛ Joodan Kɔldaugin la tuon. Ka ya yinne-yinne nɔk kugir kɔldaugin la pa'ali ya biankimpiiung zug, ka li pa'an Israel dɔɔd pii nɛ ayi' la kal. 6 Kugbama na kɛ ka nidib la tɛnr Zugsɔb la tʋm si'el la; ka bɛog sa, ya biis ya'a ti bu'osi ya ye, ‘Kuga nwa gbin an bɔ,’ 7 ya na yɛli ba ye li pa'annɛ Joodan kɔldaug ku'om da gu'oe si'em, ban da zaŋ Zugsɔb Nɔnaar Daka la lɔ'ɔŋ kɔldaug la. Kugbama na tiɛnd Israel dim la linɛ maal kpɛla la.” 8 Ka Israel dim la sid niŋ nwɛnɛ Zugsɔb la yɛli ba si'em la. Ba da nɔk kuga pii nɛ ayi' kɔldaug la sʋʋgin na, yinne wʋsa zi'enɛ Israel dɔɔd pii nɛ ayi' la yɛla, ka digili ba anina. 9 Josua da nɔk kuga pii nɛ ayi' ya'asi ba'a zi'el sappi Joodan kɔldaug la sʋʋgin, zin'ikanɛ ka maanmaannib la da mɔr Nɔnaar Daka zi'e la. Kuga la kpɛm bɛɛ anina hali ti paae zina. 10 Maanmaannib la da kpɛn zi'enɛ Joodan kɔldaug la sʋʋgin hali ka linɛ wʋsa ka Zugsɔb la yɛl Josua ye ba tʋm la ti tʋm wʋʋ Moses n da yɛl si'em la. Nidib la da lɔ'ɔŋ kɔldaug la tɔ'ɔtɔ. 11 Ban lɔ'ɔŋi naae la, maanmaannib la da mɔr Zugsɔb Nɔnaar Daka la yʋ'ʋn lɔ'ɔŋ ka nidib la wʋsa gɔsidi ba. 12 Ka Reuben nɛ Gad dɔɔg dim nɛ Manase dɔɔg pʋsʋk da mɔri ba zaba la'ad la dɛŋin lɔ'ɔŋ nidib la wʋsa tuon, nwɛnɛ Moses n da yɛli ba ye ba maal si'em la. 13 Banɛ da ti'eb ye ba zab la da anɛ nidib tusa pisnaasi (40,000), ka ba lɔ'ɔŋi gaad Zugsɔb la tuonnɛ paae Jeriko teŋ kanɛ an sassi la ni. 14 Daakan la, Zugsɔb da dʋ'ʋs Josua Israel dim wʋsa nini ni. Ba da tis o na'asi o vʋm saŋa wʋsa, nwɛnɛ ban da na'asid Moses si'em la.15 Zugsɔb la yɛl Josua ye, 16 “Yɛlim maanmaannib banɛ ziid Nɔnaar Daka la ye ba yim Joodan kɔldaugin la na.” 17 Ka Josua sid da yɛl maanmaannib la ye, “Yimi Joodan Kɔldaugin la na.” 18 Maanmaannib banɛ da ziid Zugsɔb nɔnaar daka la da yi kɔldaug la teŋsʋki paae gbɛog. Ka ba nɔbaa kpɛn si'is teŋ la, saŋkan nɔɔ ka kɔldaug la ku'om mɛ kpɛn pin'ili zɔt ya'as, hali ka pɛ'ɛli badigi dʋ gbɛog na. 19 Nidib la da lɔ'ɔŋ Joodan kɔldaug la saŋa si'a la da anɛ yiiga nwadig la dabisa piiga la daar. Ba la'as taaba Gilgal teŋin, Jeriko tempʋʋg la nya'aŋ. 20 Anina ka Josua da kɛ ka ba nɔk kuga pii nɛ ayi' banɛ ka ba zii yi Joodan kɔldaugin la m ba'a zi'el sappi; 21 ka yɛl Israel nidib la ye, “Ya biis ya'a ti bu'osi ya kuga nwa gbin, 22 ya na yɛli ba ye, ‘Saŋa kan ka Israel da dɔl teŋ kpi'emisi lɔ'ɔŋ Joodan kɔldaug la, 23 ya Zugsɔb Wina'am da kɛ ka Joodan kɔldaug la kpiɛn ka ti lɔ'ɔŋ nwɛnɛ on da kɛ ka Atɛuk Zɛn'ug kpiɛn si'em tisi ti la.’ 24 Bʋnkaŋa na kɛ ka dunia nidib wʋsa na baŋ Zugsɔb la paŋi an si'em, ka ya na na'asidi ya Zugsɔb Wina'am la saŋa linɛ ka' bɛnnɛ.”