Josua 3

Israel nidib la da lɔ'ɔŋ kɔldaug la

1 Ka bɛogʋ da nie la, Josua nɛ Israel nidib la da dɛŋi duoe Sittim teŋin keŋ Joodan kɔldaug baba; ani ka ba da gbɛn ka nyaan lɔ'ɔŋ. 2 Daba atan' la nya'aŋ ba kpɛɛmnam da gilig zin'ikanɛ ka ba la'as la 3 ka yɛl nidib la ye, “Ya ya'a ti nyɛ ka maanmaannib banɛ an Levi dim la nɔk Zugsɔb onɛ aan ya Wina'am Nɔnaar Daka la ziid, yanam duom dɔlli ba nya'aŋ. 4 Ala ka ya na baŋ yanamɛ na dɔl si'el, bɔzugɔ ya nan zi' dɔl kpɛlaa. Amaa mid ka ya miri Nɔnaar Daka la. Lɛmmini li nya'aŋ nwɛnɛ nɔba makir tusa ayi' nɛ.” 5 Ka Josua yɛl nidib la ye, “Maalimi ya mɛŋ nyain, bɔzugɔ bɛog Zugsɔb la na tʋm nyalima tʋʋma ya san'an.” 6 Ka o yɛl maanmaannib la ye ba zaŋim Nɔnaar Daka la dɛŋ nidib la tuon, ka ba sid da maal nwɛnɛ on yɛl si'em la.

7 Ka Wina'am yɛl Josua ye, “M na maal si'el zina linɛ na kɛ ka Israel dim wʋsa na pin'ili tisif girima ka baŋ ye fʋ anɛ dau kanɛ mɔr kpi'euŋ. Ka ba na lɛm baŋ ye m kpɛn bɛ nɛf nwɛnɛ man daa bɛ nɛ Moses si'em la. 8 Yɛlim maanmaannib banɛ ziid Nɔnaar Daka la ye ba ya'a paae kɔldaug nɔɔrin la ban da lɔ'ɔŋɛ, asɛɛ ka ba keŋ tuon bi'ela sigi zi'en kɔldaug la pʋʋg.”

9 Ka Josua yɛl nidib la ye, “Kemi kpɛla na ka kɛlisi ya Zugsɔb Wina'am mɔr si'el ye o yɛli ya. 10 Dinɛ na kɛ ka ya baŋ ye Wina'am onɛ vʋe la sid bɛɛ ya san'an ka na kad Keenan dim nɛ Hitti dim nɛ Hivi dim nɛ Perizi dim nɛ Girgas dim nɛ Amor dim nɛ Jebus dim la yis teŋin la. 11 Gɔsimi ya, Nɔnaar Daka linɛ an Zugsɔb onɛ sʋ'oe dunia wʋsa la na gaadi ya tuonnɛ sig Joodan kɔldaugin la. 12 Alazug, gaŋimi dap pii nɛ ayi' banɛ an Israel dɔɔd pii nɛ ayi' la nidib. Dɔɔg wʋsa nid yinne. 13 Ka maanmaannib banɛ ziid Nɔnaar Daka linɛ an Zugsɔb onɛ sʋ'oe dunia wʋsa la din la ya'a ti nɔki ba nɔba pu'al ku'omin la, Joodan kɔldaug la na gu'oe ka ku'opʋbidim la na mɛ' wʋʋ zaŋguom nɛ.”

14 Ka nidib la duoe ye ba lɔ'ɔŋ kɔldaug la, maanmaannib banɛ da ziid Nɔnaar Daka la da gaadi ba tuon. 15 Li da anɛ ba zʋʋd nɔkir saŋa, ka Joodan kɔldaug la da pɛ'ɛli badigi dʋ gbɛog na. Ka maanmaannib la sid sigisi ba nɔba la ku'omin la, 16 ku'okanɛ naan agɔlli zɔt na la da gu'onɛ ka duoe nwɛnɛ zaŋguom nɛ lallisa teŋ kanɛ ka ba buon ye Adam ka li bɛ Zaretan tempʋʋg baba la. Ka ku'okanɛ da zɔti sigidi paad Araba Tɛuk (Yaarim Tɛuk) la da kpɛn gu'oe, ka nidib la da nyaŋi lɔ'ɔŋi kennɛ kpa'ad Jeriko. 17 Nidib la da lɔ'ɔŋid la, maanmaannib banɛ da ziid Zugsɔb Nɔnaar Daka la da zi'enɛ teŋ kpi'emisin kɔldaug la teŋsʋk, hali ka nidib la wʋsa ti lɔ'ɔŋi naae.