Josua tʋm nidib ye ba vɛɛnsi gɔs Jeriko
2
1 Ka Josua tʋm nidib ayi' ka ba yi Sittim teŋin ye ba keŋ vɛɛns teŋ la gɔs, linɛ gaad wʋsa anɛ Jeriko tempʋʋg la. Ka ba keŋ kpɛn' pu'agɔɔndir onɛ yʋ'ʋri buon Rahab la yin ka gbɛɛn anina. 2 Ba da yɛl Jeriko na'ab la ye, “Gɔsima! Israel ninsieba kɛn kpɛla yʋ'ʋŋa na ye ba vɛɛns teŋ la gɔs.” 3 Ka Jeriko na'ab la tʋm yɛl Rahab ye, “Mɔr dap banɛ kpɛn' fʋ yin la na, bɔzugɔ ba kena ye ba vɛɛnsi ti teŋ la gɔs.” 4 Amaa ka pu'a la pʋn zaŋ nidib ayi' la su'a, ka yɛli ba ye, “Sida dap la kɛn mam san'an na, amaa mam zi' ban yi zin'isi'a naa. 5 Zaam ma'ae ka ba ye ba yɔ' teŋ la za'anɔɔr la, ka nidib la yii gaad, ka m zi' ban keŋ zin'isi'a. Kem ieenɛ ba tɔ'ɔtɔ ka daasi'erɛ ya na paae ba gban'e.” 6 Amaa o da mɔri ba nɛ dʋʋ su'a o dɔɔg zug, zin'ikanɛ ka o nɔk bɛriŋdaadi dɛlig la. 7 Ka dap la daa yii kad nimbanɛ kena ye ba vɛɛns teŋ la gɔs la nɔba hali ti paae suokanɛ dɔlli kidigid Joodan kɔldaugin la. Ban kpɛn yi la, ka tempʋʋg dim la yɔ' za'anɔɔr la ka kpar. 8 Banɛ da kena ye ba vɛɛns teŋ la da ye ba digin saŋsi'a la, Rahab duoe dʋʋ ba san'an dɔɔg la zug 9 ka yɛli ba ye, “M mi' ye Zugsɔb la zaŋ teŋ kaŋa tisi ya, ka ya yɛla kɛ ka dabiem gban'e ti wʋsa. Dabiem kpɛn' banɛ wʋsa bɛ teŋ kaŋa ni hali. 10 Ti wʋm Zugsɔb la da niŋ si'em tisi ya, yanamɛ da yi Egipt teŋin na saŋa si'a la. Ti wʋm ye o da kɛ ka Atɛuk Zɛn'ug ku'om wie tisi ya ka teŋ kʋdig, ka lɛn wʋm yanamɛ da san'am Sihon nɛ Og, na'anam ayi' banɛ da bɛ Amor teŋin Joodan nya'aŋ la nyain si'em. 11 Tinamɛ wʋmi li la, ti sʋʋnr san'am nɛ hali ka ti giinla siɛn ya zug. Bɔzugɔ ya Zugsɔb Wina'am la anɛ onɛ sid bɛɛ agɔla nɛ teŋin wʋsa. 12 Nannanna nwa, pɔɔm tisinim nɛ Zugsɔb la yʋ'ʋr ye ya na zɔ mam nɛ m yidim la nimbaanlig mam maali ya sʋm la zug. Tisiminim zanbin linɛ na kɛ ka m niŋ yadda 13 ye ya na faaɛn man nɛ m ba', nɛ m ma nɛ m ba'abiis nɛ m yidim wʋsa yi kumin.” 14 Ka dap la lɛbisi yɛl pu'a la ye, “Tinam ya'a pʋ tʋm nwɛnɛ tinamɛ yɛl si'em la, Wina'am on kʋʋmi ti. Fʋ ya'a pʋ yɛl sɔ' tinamɛ bɛ kpɛla maan si'ela, ti kaanb ye Zugsɔb la ya'a ti nɔk teŋ la tisi ti, ti na maalif sʋ'ʋŋa.”15 Rahab da bɛnɛ yikanɛ ka ba mɛɛ tabil tempʋʋg zaŋguom la ni, ka o zaŋ nwiigi lɔ takoro la ni ka kɛ ka ba dɔlisi sig. 16 Ka o yɛli ba ye, “Kemi kʋkʋna la ni su'a; ya'a ka' ala na'ayikpɛm la na nyɛɛ ya. Su'amini anina daba atan' ti paae saŋkanɛ ka ba na lɛb na. Ka lin nya'aŋ ya na tun'e keŋ yanamɛ ken zin'isi'a.” 17 Ka dap la lɛbis o ye, “Nɔkanɛ ka fʋ kɛ ka ti pɔ la kʋ dɔlli tii, 18 ya'a ka' tinamɛ na ti kpɛn' teŋ la pʋʋg na ka nyɛ ka fʋ lɔ nwizɛn'ug takoro kanɛ ni ka fʋ kɛ ka ti dɔlli yi la naa. Asɛɛ ka fʋ mɛ kɛ ka fʋ ba' nɛ fʋ ma, nɛ fʋ ba'abiis nɛ ba nidib wʋsa bɛɛ fʋ yin la. 19 Ka ya sɔ' ya'a yi anina o kum anɛ o mɛŋ yɛl ka tinam ba'a kʋ bɛɛ li nii. Amaa sɔ' ya'a pu'alimi ya yir la pʋʋg, li na anɛ tinam yɛl. 20 Ka fʋ ya'a yɛl sɔ' tinamɛ ye ti maal si'el la, nɔpɔɔr kanɛ ka tinam nɛ fʋn pɔ la kʋ lɛn tʋm tʋʋmaa.” 21 Ka o siak ka kɛ ka ba keŋ. Ka ban gaadi naae la, o da lɔ nwizɛn'ug la o takoro la ni. 22 Banɛ da keŋ ye ba vɛɛns teŋ la gɔs la da keŋ su'a kʋkʋna la ni hali ka na'ayikpɛm iee ba daba atan' ka pʋ nyɛɛ baa ka lɛb Jeriko teŋin la na. 23 Ka nidib ayi' banɛ ka ba da tʋm la yi kʋkʋna la ni na, ka lɔ'ɔŋ kɔldaug la lɛb Josua onɛ an Nun biig la san'an ka yɛl o dinɛ wʋsa daa maal, 24 ka yɛl o ye, “Ti sid mi' ye Wina'am nɔk teŋ la wʋsa tisi ti. Nimbanɛ wʋsa bɛ teŋin la zɔti ti nɛ dabiem.”