Josua
Wina'am yɛl Josua ye o zam nyaŋ Keenan
1
1 Moses onɛ da an Zugsɔb tʋmtʋm la kum nya'aŋ la, Zugsɔb la da pian' tis Josua onɛ an Nun biig ka sʋŋid Moses la ye, 2 “M tʋmtʋm Moses kpiya. Maalim siri nannanna, dɔl Israel nidib la wʋsa ka ya lɔ'ɔŋ Joodan kɔldaug la keŋ kpɛn' teŋ kanɛ ka m ye m tisi ba la. 3 M na tisi ya zin'ikanɛ wʋsa ka ya nɔba nɔ, nwɛnɛ man da kaanbi tis Moses si'em la. 4 Yanamɛ sʋ'oe zin'isi'a la na pin'il sian'arin la paae Lebanon ka lɛn yi Efiritis kɔldatita'ar nɛ Hitti dim tɛɛns la wʋsa ni ti paae Atɛuk Tita'ar linɛ bɛ tuon la baba. 5 Sɔ' kae na nyaŋ fʋn Josua hali nɛ fʋ nyɔvʋr bɛnnɛ. Man da bɛ nɛ Moses si'em la, ala ka m na bɛ nɛf. M kʋ maligim basif bɛɛ zan'asi fɔ. 6 Zi'enim sʋ'ʋŋa ka kpɛ'ɛŋi fʋ sʋnf bɔzugɔ fʋnɛ ye fʋ mɔr nimbama keŋ paae ka sʋ'ʋg zin'ikanɛ ka mam pɔɔ tisi ba yaanam ye m na tisi ba la. 7 Dinzugɔ zi'enim sʋ'ʋŋa ka kpɛ'ɛŋi fʋ sʋnf, gu'usim ka mɔr zi'el kan ka m tʋmtʋm Moses da tisif la. Da yuki lɛb datiuŋ bɛɛ dagɔbʋga. Ka fʋ na nyɛ nyaŋir zin'ikan wʋsa ka fʋ keŋ. 8 Kɛl ka Zugsɔb Zi'elʋg Gbauŋ la bɛɛ fʋ nɔɔrin saŋa wʋsa. Tɛn'ɛsimi li yɛla nintaŋ nɛ yʋ'ʋŋ, linɛ na kɛ ka fʋ nyaŋi tʋm linɛ bɛɛ li ni. Ala ka fʋ na nyɛ nyɔɔd nɛ nyaŋir. 9 Ka' manɛ yɛlif ye fʋ zi'enim sʋ'ʋŋa ka kpɛ'ɛŋi fʋ sʋnfɔɔ? Da zɔt dabiem, da kɛ ka fʋ sʋʋnr san'am, ka fʋ Zugsɔb na bɛ nɛf zin'ikanɛ wʋsa ka fʋ keŋ.”10 Ka Josua yɛl nidib la kpɛɛmnam la ye, 11 “Kem giligi nidib la sʋʋgin ka yɛli ba ye ba maalim siri nɛ ba diib, ka daba atan' nwa ni ba na lɔ'ɔŋ Joodan kɔldaug la keŋ sʋ'ʋg teŋ la. Ya Zugsɔb Wina'am nɔki li tisi ya ka li aan ya din.” 12 Ka Josua yɛl Reuben dɔɔg nɛ Gad dɔɔg nɛ Manase dɔɔg pʋsʋk la, ye 13 “Tiɛnmi zi'elkanɛ ka Moses onɛ an Zugsɔb tʋmtʋm la da tisi ya la. Ya Zugsɔb Wina'am la pʋn tisi ya teŋ kaŋa ye ya bɛ baanlimm. 14 Alazug, ya pu'ab nɛ ya biis nɛ ya bʋnkɔbid tun'e kpɛlim bɛ teŋ kanɛ ka Moses tisi ya Joodan nya'aŋ la. Amaa zabzabidib banɛ bɔb nɛ zaba la'ad la na lɔ'ɔŋi ba taaba la san'anɛ zabi sʋŋi ba, 15 hali ka Zugsɔb la ti kɛ ka ban mɛ zin'in teŋ la nii bɛ baanlimm nwɛnɛ on tisi ya si'em la. Ka lin nya'aŋ ka ya na lɛbi sʋ'oe ya teŋ kanɛ ka Moses onɛ an Zugsɔb tʋmtʋm la da tisi ya Joodan nya'aŋ la.” 16 Ka ba lɛbis Josua ye, “Fʋn yɛli ti si'el wʋsa, ti na tʋm, ka zin'ikanɛ wʋsa ka fʋ tʋmi ti, ti na keŋ. 17 Nwɛnɛ tinamɛ da siak Moses nɔɔr si'em la, ala mɛn ka ti na siaki fʋ nɔɔr. Nwɛnɛ Zugsɔb la da bɛ nɛ Moses si'em la o mɛ na bɛ nɛf. 18 Ninkanɛ ki'isi fʋ nɔɔr ka pʋ siak fʋn yɛli ba si'em wʋsa, ti na kʋʋ o. Zi'enim sʋ'ʋŋa ka kpɛ'ɛŋi fʋ sʋnf.”