Naazir nid yɛla
6
1 Zugsɔb la da yɛl Moses ye, 2 “Yɛlim Israel dim la ye; ‘Dau bɛɛ pu'a ya'a bɔɔd ye o kaanb kaanbʋg kanɛ bɛɛ li kɔn' ye o yis o mɛŋi lieb Naazir nid, 3 li anɛ tilas ye on sɔb luaki o mɛŋ nɛ daam buudi wʋsa, ka da nu linɛ nwɛnɛ daam wʋsaa. O mɛ da nu tikanɛ wala ka ba mɔri maan daam la ku'om, bɛɛ o dii li bʋmma'asa bɛɛ li bʋnkpi'emisɛ. 4 O ya'a sadigim an Naazir nid, on mid ka o di walkanɛ ka ba mɔri maan daam la, hali baa li bielif bɛɛ li pa'ad la. 5 Lin pin'il saŋkanɛ ka o kaanb ye o yis o mɛŋi tʋm tis Wina'am la, o mid ka o zug pʋn nɛ barig. Li sʋ'ʋm ye o gban'e o mɛŋi an kasi ka dabisa banɛ ka o gban'e ye o tʋm tis Wina'am la ti gaad. Li anɛ tilas ye o bas o zuobid la ka li wa'am. 6 Lin yi saŋkan la wʋsa, o mid ka o li'el kum. 7 Hali baa o mɛŋ saam bɛɛ o ma bɛɛ o bier bɛɛ o taʋn ya'a kpi, on da si'is ka li kɛ ka o dian'a o mɛŋa. Bɔzugɔ, zanbin kanɛ pa'al ye o wɛligi o mɛŋ ye o tʋm Wina'am tʋʋma la bɛɛ o zugin. 8 Saŋa kanɛ ka o kaanb ye o pɛsigi o mɛŋ la o na an kasi tis Zugsɔb la. 9 Li ya'a an wʋʋ sɔ' kpi'e nɛ o ka gbirigi kpi, ka li kɛ ka zuobid kanɛ ka o pɛsig la pʋ lɛn an kasi, asɛɛ o pʋn zuobid la daba ayɔpɔi la daar, linɛ aan amaalim-mɛŋ-nyain dabisir la. 10 Ka daba anii daar la o yʋ'ʋn na mɔr sian'adawana ayi' bɛɛ na'adawana ayi' kɛn maanmaan la san'an na, za'anɔɔr kanɛ kpɛn'ɛd La'asʋg Fuug Sʋgʋr zakin la, 11 ka maanmaan la na kʋ yinne ka li an tʋʋmbɛ'ɛd maan, ka yinne mɛ an nyu'or maan ka li an suguru sɔsʋgʋ tis o, bɔzugɔ o tʋm bɛ'ɛd on la'am bɛ nɛ kum la zug. Daakan nɔɔ li anɛ ye o maligim pɛsigi o zug la. 12 Li mɛ anɛ tilas ye o lɛm maligim pɛsigi o mɛŋi tis Zugsɔb la saŋkanɛ ka o daa gban'e ye o wɛlig o mɛŋ la, ka mɔr pɛbil kanɛ an yʋʋm yinne na maal taal maan. Dabisbanɛ gaad la kʋ kaali paasɛ, bɔzugɔ o bakir la saŋa o daa liebnɛ dian'ad sɔb.13 “ ‘Nwa' an zi'elʋgʋ tis onɛ wʋsa an Naazir nid o kaanbʋg dabisa la ya'a ti gaad. O na kɛn La'asʋg Fuug Sʋgʋr la za'anɔɔrin na. 14 Ani ka o na maal maannɛ tis Zugsɔb la: pɛdibpɔl onɛ an yʋʋm yinne ka pʋ mɔr dɛŋŋa maal maannɛ nyu'oe tis Zugsɔb la, nɛ pɛsa'apɔl onɛ an yʋʋm yinne ka dɛŋ kae maal tʋʋmbɛ'ɛd maan, nɛ pɛraug yinne kanɛ ka' dɛŋ ka li anɛ taaba la'asʋg maan, 15 nɛ zʋʋd maannɛ pɛ'ɛs nɛ bʋnnuuda maan, la'am nɛ pɛog nɛ bodobodo linɛ pʋ mɔr dabinnɛ, nɛ ma'asa, nɛ linɛ nwɛnɛ sa'akɔnt kpi'emis. 16 Maanmaan la na mɔri li keŋ Zugsɔb la tuonnɛ maal tʋʋmbɛ'ɛd maan nɛ nyu'or maan. 17 Ka yʋ'ʋn nɔk pɛraug la nɛ bodobodo linɛ ka' danbin pɛog pɛ'ɛli maal maan linɛ an taaba la'asʋgʋ tis Zugsɔb la, la'am nɛ zʋʋd maan nɛ bʋnnuuda maan. 18 Naazir nid la na pʋn o zuobid kanɛ ka o pɛsigi tis Zugsɔb la La'asʋg Fuug Sʋgʋr za'anɔɔrin la. O na nɔk zuobid la niŋ bugum kanɛ bɛ maan bimbimin dit o maan linɛ an taaba la'asʋg maan la. 19 Naazir nid la ya'a pʋn o zuobid la naae, maanmaan la na nɔk gbɛr linɛ dʋg, ka yis bodobodo linɛ ka' danbin la yinne nɛ linɛ nwɛnɛ sa'akɔnt la yinne niŋ Naazir nid la nu'usin. 20 Maanmaan la na nyɔɔsimi ba Zugsɔb la tuon ka li an nyɔɔsʋŋ maan. Ba anɛ kasi ka an maanmaan la din, la'am nɛ kugsir linɛ nyɔɔsim Zugsɔb tuon la nɛ gbɛr linɛ an maanmaan tɔnsir la. Lin nya'aŋ la Naazir la tun'e nu daam. 21 Lina an zi'elkanɛ bɛɛ tis Naazir nid onɛ kaanbi zi'el ye o na maal maannɛ tis Zugsɔb la, ka li dɔl nwɛnɛ on gban'e ye o bɛɛ o kɔn' si'em la. Ka pɛ'ɛs on na nyaŋi tis si'el. Asɛɛ ka o maal nwɛnɛ on kaanb si'em la, ka li dɔl Naazir wada la.’ ”
Maanmaannibi niŋ nidib zug albareka la yɛla
22 Zugsɔb la da lɛn yɛl Moses ye, 23 “Yɛlim Aaron nɛ o biis la ye, ‘Yanamɛ na sɔsid albareka tisid Israel dim la si'em nwa: yɛlimi ba ye,
24 “ ‘Zugsɔb na niŋi ya bareka ka guri ya,
25 Zugsɔb na zɔɔ ya nimbaanlig ka tʋm sʋ'ʋm tisi ya,
26 Zugsɔb na fɛndigi o nindaa kpa' ya
ka tisi ya sumbʋgʋsʋm.’
27 “Ala ka ba na nɔki m yʋ'ʋri sɔs albareka tisi ba, ka m sid na niŋi ba bareka.”