Gbɛɛnb zin'ig la na an nyain si'em
5
1 Zugsɔb la da yɛl Moses ye, 2 “Yɛlim Israel dim la wʋsa ye ba yisim onɛ wʋsa bɛ la'asʋgʋn la ka mɔr niŋgbina san'auŋ ban'as, bɛɛ pu'a onɛ lu siaa ka li pʋ gu'oda, bɛɛ dau onɛ daulim yuod mɛt bɛɛ li yitnɛ o niŋgbina ni. Ba mɛ yisim onɛ si'is bʋnkpiilʋŋ ka li kɛ ka o ka' nyainnɛ. 3 Ba ya'a anɛ dap bɛɛ pu'ab, ya na yisi ba ya gbɛɛnsa zin'ig la kpikpɛŋ. Mid ka ya kɛ ka mam bɛ nɛ ya zin'isi'a la lieb dian'ad bamanam yɛla.” 4 Israel dim la sid da niŋ ala, ka da yis nimban buudi wʋsa la'asʋg la zin'igin wʋʋ Zugsɔb la da pa'al Moses si'em la.Tʋʋmbɛ'ɛd sam yɔɔb yɛla
5 Zugsɔb la da lɛn yɛl Moses ye, 6 “Yɛlim Israel dim la ye, ‘Dau bɛɛ pu'a ya'a tʋm tʋʋmbɛ'ɛd buudi wʋsa pɔ'ɔg o tiraan ka ka' sida sɔbi tis Zugsɔb la, on sɔb tʋm taal. 7 Li anɛ tilas ye o yɛl on tʋm taal si'a la, ka yɔ sam kanɛ nar ye o yɔ ka paam taal pɛ'ɛŋir, ka pɛ'ɛs o sam la pʋdigir zin'is anu tis onɛ ka o pɔ'ɔg la. 8 Amaa onɛ ka ba tʋm o taal la ya'a kpinɛ, ka o du'ad kae na di'e yɔɔd la, li na anɛ Wina'am din, ka li sʋ'ʋm ye ba nɔki tis maanmaan la, la'am nɛ pɛrakanɛ ka o di'e maali sɔs suguru tis tʋʋmbɛ'ɛd sɔb la.
9 “ ‘Maan nɛ piini wʋsa linɛ an kasi ka Israel dim la'asidi kenna tisid maanmaan la anɛ o din, 10 sɔ' wʋsa piini anɛ o din, amaa o ya'a nɔki tis maanmaan la, li anɛ maanmaan la din.’ ”
Pu'a kanɛ ka' sida sɔb kpansib yɛla
11 Zugsɔb la da lɛn yɛl Moses ye, 12 “Yɛlim Israel dim la ye, ‘Dau sɔ' pu'a ya'a yi yiŋ ka pʋ lɛm bɛ nɛ o sid nɛ sidaa, 13 ka li anɛ ye o diginnɛ nɛ dau sɔ' ka o sid la zi', ka o dian'ad tʋʋma la pʋ yi paalʋ na, ka sɔ' pʋ di kasɛta, ka sɔ' mɛ pʋ gban'e o muda; 14 o sid la ya'a ti pin'ili bi'esid ka pʋ lɛn niŋ pu'a la yadda ye o sid tʋm dian'ad bɛɛ o pʋ tʋm, 15 on dɔl pu'a la keŋ maanmaan san'an. Dau la mɛ na nɔk bodobodo zɔm wʋʋ ki kuriba ayi' o pu'a la yɛla. O da nɔk kpaam bɛɛ bʋnnyubisa gɛndigɛ, bɔzugɔ li anɛ zʋʋd maan linɛ an nyuur yɛla, ka na kɛ ka tʋʋmbɛ'ɛd la yi paalʋ na. 16 Maanmaan la na kɛ ka pu'a la kena zi'en Zugsɔb la tuon, 17 ka gbin'e ku'okanɛ an kasi bɛ yʋʋrin ka vaae Fuug Sʋgʋr la teŋ titani niŋ ku'omin la. 18 O na mɔr pu'a la na zi'el Zugsɔb la tuon, ka yidig pu'a la zuobid ka nɔk tiɛnr maan la nɛ zʋʋd maan linɛ an nyuur yɛla la niŋ o nu'usin, ka o mɛŋ yʋ'ʋn zanl ku'otɔɔg linɛ ziid nɔpɔɔri kenna la. 19 Ka maanmaan la yʋ'ʋn kɛ ka pu'a la pɔ ka yɛl o ye dau sɔ' ya'a nan zi' zaŋi fʋ diginɛ, ka fʋ mɛ pʋ tʋm dian'ad tʋʋm si'a fʋn bɛɛ fʋ sid yin la, ku'otɔɔg kaŋa da zi nɔpɔɔri kɛɛn fʋ san'an naa.’ ” 20 Amaa fʋ ya'a kɛ ka dau sɔ' zaŋi fʋ digin, ka fʋ tisi fʋ mɛŋ dian'ad saŋa kanɛ ka fʋ bɛɛ fʋ sid nu'ugin la, 21 maanmaan la na pɔ pɔkaŋa niŋ pu'a la zug ye, “Zugsɔb la kɛl ka fʋ gbɛr nwiilim ka fʋ pʋʋr pida ka fʋ kʋ nyaŋi du'aa, ka li na kɛ ka fʋ nidib la ya'a ye ba pɔ nɔɔri tis sɔ' ba na pɔ ye fʋ tɔɔg la buudi paam o sɔb. 22 Ku'okanɛ mɔr nɔpɔɔri kenna la na kpɛn' fʋ niŋgbina ni ka li kɛ ka fʋ pʋʋr pid ka fʋ gbɛr nwiilim.” Ka pu'a la na lɛbis ye, “Ami: li sid niŋim ala.” 23 Ka Maanmaan la na sɔb nɔpɔɔr la niŋ gbauŋʋn ka pie li niŋ ku'otɔɔgin 24 ka kɛ ka pu'a la nu ku'otɔɔg kanɛ ziid nɔpɔɔri kenna la, ka ku'om la kpɛn' o tis o tɔɔg ka o namis. 25 Maanmaan la na di'e maan la o nu'ugin, ka nyɔɔsimi li Zugsɔb la tuon ka mɔri li kɛn maan daka la ni na, 26 ka yʋ'ʋn gbin'e zɔm la nu'ukukudug ka li an tiɛnr maan ka o nyu'oe maan daka la zug; lin nya'aŋ la, o na kɛ ka pu'a la nu ku'om la. 27 On kɛ ka pu'a la nu naae la, o ya'a tʋm dian'ad ka pʋ bɛ nɛ o sid nɛ sidaa, ani ka ku'om linɛ ziid nɔpɔɔr la na kpɛn' o niŋgbina ni ka tis o tɔɔg nɛ namisʋg bɛdegʋ; o pʋʋr na pid ka o gbɛr nwiilim ka o nidib la ya'a ye ba pɔ nɔɔri tis sɔ' ba na pɔ ye fʋ tɔɔg la buudi paam o sɔb. 28 Amaa pu'a la ya'a pʋ tʋm dian'adɛ ka o pʋʋg an nyain, nɔpɔɔr la kʋ gban'e o ka o mɛ na nyaŋi du'a biis. 29 Lina anɛ nyuur wada zaŋi ken pu'a na san'am dau ka nan kpɛn bɛɛ o sid yin, 30 bɛɛ dau ya'a ti pʋ lɛn niŋ o pu'a yadda. Maanmaan la na kɛ ka pu'a la zi'en Zugsɔb la tuon ka ba maal malʋŋ bama wʋsa. 31 Taal kʋ dɔl o sid la, amaa o tʋʋmbɛ'ɛd taal na kpɛn bɛɛ o zug.