Kohat tuŋ la na tʋm si'el
4
1 Zugsɔb la da yɛl Moses nɛ Aaron ye, 2 “Kaalimi Kohat tuŋ la dim Levi dɔɔgin la, dɔlisi ba za'as nɛ ba ya'. 3 Kaalim dap wʋsa banɛ an yʋma pistan' keŋ paae yʋma pisnu banɛ na kena tʋm La'asʋg Fuug Sʋgʋr tʋʋma la. 4 Kohat dim la ye ba tʋm tʋʋm si'a La'asʋg Fuug Sʋgʋrin la anɛ ba gɔsid la'abanɛ an kasi hali tis Zugsɔb la.5 “Ba ya'a ti ye ba vuoɛn Fuug Sʋgʋr la tɔɔm, Aaron nɛ o biis la na kpɛn' li pʋʋgin yidig fukanɛ bɛŋ la ka nɔki li ligil Nɔnaar Daka la. 6 Ka nɔk gbansʋma ligil, ka yadig futɛbisir linɛ an bʋlʋ pa'al gbauŋ la zug, ka yʋ'ʋn nɔk dabanɛ ka ba gban'adi ʋkidi li mɔri ken la tʋ. 7 Ba na nɔk fukanɛ an bʋlʋ yadig teebul kanɛ ka ba ɛɛnti nɔkid bodobodo kanɛ ka ba tisid Zugsɔb la pa'annɛ li zug la, ka nɔk laas la, nɛ dʋgid nɛ bʋtiis nɛ nuub piini la wʋsa pa'ali li zug, ka mɛ nɔk bodobodo kanɛ pa'a li zug saŋa wʋsa la pa'al. 8 Ba na nɔk fuzɛn'ugʋ pa'ali li zug, ka ligil nɛ gbansʋma ka nɔk dabanɛ ka ba gban'adi ʋkid mɔri ken la tʋ. 9 Li anɛ ye ba nɔk fukanɛ an bʋlʋ ligil fita zi'esir la la'am nɛ li fita la, nɛ ma'adis linɛ na gban'e bugumsaana la, nɛ li tampɛligim laas nɛ kpaam laas la, 10 ka viligi li la'ad la wʋsa nɛ gbansʋma pa'al dabanɛ ka ba mɔri ziid la zug. 11 Ba na nɔk fukanɛ an bʋlʋ pil sanlima maan daka la ka ligili li wʋsa nɛ gbansʋma, ka nɔk dabanɛ ka ba gban'adi ʋkidi mɔri ken la tʋ. 12 Ba na nɔk la'abanɛ ka ba mɔri tʋm Fuug Sʋgʋr tʋʋma la wʋsa pil nɛ fukanɛ an bʋlʋ, ka ligil nɛ gbansʋma pa'al dabanɛ ziid la zug. 13 Ba na vaae tampɛligim la wʋsa yis kʋntzɛn'ug maan daka la zugʋ bas, ka nɔk fukanɛ mu'oe zim-zim ligili li. 14 Ka yʋ'ʋn nɔk la'abanɛ ka ba mɔri maan maana la wʋsa pa'ali li zug, la'am nɛ la'aban ka ba mɔri mu'od bugum la, nɛ laas, nɛ ban ka ba mɔri yaad ni'im la, ka ligili li wʋsa nɛ gbansʋma, ka nɔk dabanɛ ka ba gban'adi ʋkidi mɔri ken la tʋ.
15 “Aaron nɛ o biis la ya'a ti ligil la'abanɛ an kasi la naae ka nidib la ti'eb ye ba duoe tɔɔm la, Kohat dim la na kena zii li wʋsa keŋ. Amaa ba mid ka ba si'is la'abanɛ an kasi la ka ba na kpi. Kohat dimi nar ye ba zi la'abanɛ bɛ La'asʋg Fuug Sʋgʋrin la. 16 Maanmaan kpɛɛm Aaron biig Elieza na suoɛn kpakanɛ ka ba mɔri nyu'od fita la nɛ bʋnnyubisa la, nɛ saŋa wʋsa maan la, nɛ malʋŋ kpaam la. Onɛ na gɔsid Fuug Sʋgʋr la wʋsa yɛla, nɛ linɛ bɛɛ li pʋʋgin wʋsa, la'am nɛ la'abanɛ an kasi tis Zugsɔb la.”
17 Zugsɔb la da lɛn yɛl Moses nɛ Aaron ye, 18 “Gu'usimi ka Kohat tuŋ la da kpii naae Levi dɔɔg la nii. 19 Yanamɛ na niŋ si'em ka ba na li'el Wina'am mɛŋ la'abanɛ an kasi la ka da kpi anɛ ya kɛ ka Aaron nɛ o biis la dɛŋin kpɛn' Kasi Wʋsa Kasi zin'ig la ni pa'al dau wʋsa on na tʋm si'em nɛ on na zi si'el. 20 Amaa Kohat tuŋ dim la mid ka ba kpɛn' gɔs la'abanɛ an kasi la. Ba pʋn da vɛɛsɛ, ya'a ka' ala ba na kpi.”
Gerson tuŋ la tʋʋma
21 Zugsɔb la da lɛn yɛl Moses ye, 22 “Mɛ lɛn kaal Gerson tuŋ la, dɔlisi ba za'as nɛ ba ya'. 23 Kaalim dap wʋsa banɛ an yʋma pistan' ken paae yʋma pisnu. Banɛ na tʋm La'asʋg Fuug Sʋgʋr la tʋʋma. 24 Gerson tuŋ la tʋʋma na anɛ ziib tʋʋma nɛ tʋʋm banɛ bɛ. 25 Ba na ziid fuud linɛ pili bʋʋl La'asʋg Fuug Sʋgʋr la, nɛ La'asʋg Fuug Sʋgʋr la mɛŋ, nɛ linɛ pili li pɛ'ɛs la, nɛ gbansʋma linɛ pili li wʋsa tak la, nɛ fubanɛ geŋ La'asʋg Fuug Sʋgʋr za'anɔɔr la, 26 nɛ fubanɛ geŋ zak kanɛ gilig Fuug Sʋgʋr la nɛ maan daka la, nɛ fubanɛ geŋ za'anɔɔr linɛ kpɛn'ɛd pʋʋgin la, nɛ nwiis nɛ la'abanɛ wʋsa ka ba mɔri tʋm tʋʋma la. Gerson tuŋ la na tʋm linɛ wʋsa nar ye ba tʋm nɛ la'abama. 27 Tʋʋm kanɛ ka ba na tʋm wʋsa, li ya'a anɛ ziib bɛɛ tʋʋm si'a, ban tʋm wʋʋ Aaron nɛ o biis la na pa'ali ba si'em la. Ya na pa'ali ba linɛ nar ye ba tʋm nɛ ban na zi si'el. 28 Tʋʋm kanɛ ka Gerson tuŋ la na tʋm La'asʋg Fuug Sʋgʋrin la nwa. Ba tʋʋma anɛ ye ba siak maanmaan kpɛɛm Aaron biig Itamar na pa'annɛ ba si'em wʋsa.”
Merari tuŋ la tʋʋma an si'em
29 Mɛ kaalim Merari tuŋ la, dɔlisi ba za'as nɛ ba ya'. 30 Kaalim dap wʋsa banɛ an yʋma pistan' keŋ paae yʋma pisnu. Banɛ na tʋm Fuug Sʋgʋr la tʋʋma. 31 Ban na tʋm si'em nwa: ba ya'a ye ba tʋm La'asʋg Fuug Sʋgʋrin la, ba na zi' La'asʋg Fuug Sʋgʋr la dalamma la nɛ li dabanɛ zi'e sappi la, nɛ li dawa'a, nɛ li zi'esa la. 32 La'am nɛ dabanɛ zi'e sappi gilig zak la nɛ li zi'esa la wʋsa, nɛ kpada nɛ nwiis la, nɛ li la'ad nɛ linɛ wʋsa ka ba mɔri tʋm. Kɛl ka sɔ' wʋsa baŋ on na zi si'el. 33 Merari tuŋ la na tʋm tʋʋm si'a La'asʋg Fuug Sʋgʋrin si'em la, ka li dɔl nɛ maanmaan kpɛɛm Aaron biig Itamar n na pa'ali ba si'em.
Levi dim kal
34 Moses nɛ Aaron nɛ kpɛɛmnam da kaal Kohat tuŋ la dimi dɔlisi ba za'as nɛ ba ya'. 35 Ba da kaal dap banɛ wʋsa an yʋma pistan' keŋ paae yʋma pisnu, ban banɛ da kena ye ba tʋm La'asʋg Fuug Sʋgʋr tʋʋma la. 36 Ban da kaali dɔlisi ba za'as la ba kalli an si'em nwa: tusa ayi' nɛ kɔbisyɔpɔi nɛ pisnu (2,750). 37 Kohat tuŋ la dim banɛ da tʋm La'asʋg Fuug Sʋgʋr la tʋʋma kalli la. Moses nɛ Aaron da kaali ba wʋʋ Zugsɔb la da zi'eli tis Moses si'em la.
38 Ba mɛ da kaal Gerson tuŋ la dimi dɔlisi ba za'as nɛ ba ya'. 39 Ba da kaal dap banɛ wʋsa an yʋma pistan' keŋ paae yʋma pisnu, ban banɛ da kena ye ba tʋm La'asʋg Fuug Sʋgʋr tʋʋma la. 40 Ban da kaali dɔlisi ba za'as la ba kalli an si'em nwa: tusa ayi' nɛ kɔbisyuobʋ nɛ pistan' (2,630). 41 Gerson tuŋ la dim banɛ da tʋm La'asʋg Fuug Sʋgʋr la tʋʋma kalli la. Moses nɛ Aaron da kaali ba wʋʋ Zugsɔb la da zi'eli tis Moses si'em la.
42 Ba mɛ da kaal Merari tuŋ la dimi dɔlisi ba za'as nɛ ba ya'. 43 Ba da kaal dap banɛ wʋsa an yʋma pistan' keŋ paae yʋma pisnu, ban banɛ da kena ye ba tʋm La'asʋg Fuug Sʋgʋr tʋʋma la. 44 Ban da kaali dɔlisi ba za'as la ba kalli an si'em nwa: tusa atan' nɛ kɔbisyi' (3,200). 45 Merari tuŋ la dim kalli la. Moses nɛ Aaron da kaali ba wʋʋ Zugsɔb la da zi'el si'em tis Moses la.
46 Ala ka Moses nɛ Aaron nɛ Israel dim kpɛɛmnam da kaal Levi dɔɔg dimi dɔlisi ba za'as nɛ ba ya'. 47 Ba da kaal dap wʋsa ban banɛ an yʋma pistan' keŋ paae yʋma pisnu, ban banɛ da kena ye ba tʋm La'asʋg Fuug Sʋgʋr tʋʋma la, ka zi La'asʋg Fuug Sʋgʋr la saŋkan wʋsa ka li nar ye ba tɔɔm zin'ig. 48 Ba kal da anɛ tusa anii nɛ kɔbisnu nɛ pisnii (8,580). 49 Zugsɔb la da zi'el nɔɔri tis Moses ye o pa'al sɔ' wʋsa o tʋʋma, nɛ sɔ' wʋsa na zi la'asi'a.
Ala ka ba da kaali ba, wʋʋ Zugsɔb la zi'el si'em tis Moses la.