Levi dim yɛla
3
1 Nwa' pa'an Aaron nɛ Moses yaas yɛla, saŋa kan ka Zugsɔb la da pian' tis Moses Sinai Zuor zug la.2 Aaron biis la yʋda nwana: Nadab ka o du'a yiiga, ka onɛ tia'al la an Abihu nɛ Eleazar nɛ Itamar. 3 Aaron bibanɛ ka ba da nɔk malʋŋ kpaam bu'oe niŋi ba ka tisi ba suor ka ba lieb maanmaannibi la. 4 Amaa Nadab nɛ Abihu da pʋn kpi Zugsɔb la tuon, ban da maal tudaar maan linɛ pʋ dɔl suor, Sinai mɔɔgin la zug. Ba da ka' biribisɛ, ka Eleazar, nɛ Itamar ma'aa da kpɛlim tʋm maanmaannib tʋʋma ba saam Aaron bɛllim saŋa la.
5 Zugsɔb la da yɛl Moses ye, 6 “La'asim Levi dɔɔg dim wʋsa mɔri ba naa tis Aaron onɛ an Maanmaan la ka ba tʋmmi tisid o. 7 Ba na bɛ La'asʋg Fuug Sʋgʋrin tʋm Fuug Sʋgʋr la tʋʋma tis Aaron nɛ nidib la wʋsa. 8 Ba na gɔsid la'abanɛ bɛ La'asʋg Fuug Sʋgʋrin la ka tʋm La'asʋg Fuug Sʋgʋr la tʋʋma wʋsa tisid Israel dim la. 9 Gaŋim Levi dɔɔg dim wʋsa Israel dim wʋsa sʋʋginɛ tis Aaron nɛ o biis la ye ba tʋmmi tisidi ba. 10 Ka kɛ ka Aaron nɛ o biis la ma'aa tʋm maanmaannib tʋʋma. Ninsɔ' ya'a ka' ba kallinɛ ka ye o kpɛn' Pʋ'ʋsim Sʋgʋrin la, asɛɛ ba kʋʋ o.”
11 Zugsɔb la da lɛn yɛl Moses ye, 12 “Manɛ gaŋ Levi dim la Israel dim sʋʋgin ye ba zi'en Israel pu'a wʋsa bikpɛŋ nɔba zug, dinzugɔ Levi dim la anɛ man din, 13 bɔzugɔ ba bikpɛɛmnam la wʋsa anɛ manɛ sʋ'oe ba. Man da kʋʋd Egipt dim bikpɛɛmnam la, m da bas Israel saalib nɛ bʋnkɔnbid bikpɛɛmnam wʋsa. Ba anɛ man din. Manɛ an Zugsɔb la.”
Ban da kaal Levi dim la yɛla
14 Zugsɔb da lɛn yɛl Moses Sinai zuorin la ye, 15 “Kaalim Levi nidib la dɔlis nɛ ba tuŋ nɛ ba za'asi an si'em. Kaalim biribiŋ kanɛ wʋsa an wʋʋ lin yi nwadig yinne ken sa.” 16 Alazug Moses da kaali ba nwɛnɛ Zugsɔb la pian' pa'al o si'em la. 17 Levi biis la yʋda nwa: Gerson, nɛ Kohat, nɛ Merari. 18 Gerson biis tuŋ dim yʋda nwa: Libni nɛ Simie. 19 Kohat biis tuŋ dim yʋda nwa: Amram nɛ Izar nɛ Hebron nɛ Uziel. 20 Merari biis tuŋ dim yʋda nwa: Mahli nɛ Musi. Levi dim za'asi la, ka li dɔlli ba tuŋʋ na an si'em. 21 Za'as banɛ da la'asi an Gerson tuŋ la da anɛ Libni nɛ Simie; bama da an Gerson tuŋ la dim. 22 Biribis banɛ da paae nwɛnɛ nwadig bɛɛ gaad ala ka ba da kaal la da anɛ tusa pisyɔpɔi nɛ kɔbisnu (7,500). 23 Gerson tuŋ la da anɛ ye ba la'as Fuug Sʋgʋr nya'aŋi lɛbis ya-tuona. 24 Gerson tuŋ la tuongat da anɛ Eliasaf onɛ an Lael biig la. 25 Ba tʋʋm da anɛ ba gɔt La'asʋg Fuug Sʋgʋr la mɛŋ, nɛ linɛ ligili li yiŋ la, nɛ linɛ ligil za'anɔɔr kanɛ ka ba dɔlli kpɛn'ɛd La'asʋg Fuug Sʋgʋrin la, 26 nɛ fuud linɛ bɛŋ zak la nɛ za'anɔɔr linɛ kpɛn'ɛd zakin linɛ gilig Fuug Sʋgʋr la nɛ maan zin'ig la, nɛ nwiis la, la'am nɛ la'abanɛ ka ba mɔri tʋmmi li tʋʋma la wʋsa. 27 Kohat tuŋ la da anɛ Amram dim nɛ Izar dim, nɛ Hebron dim nɛ Uziel dim: Kohat tuŋ za'asi la. 28 Ba biribis banɛ da an nwɛnɛ nwadig yinne bɛɛ gaad ala la da anɛ tusa anii nɛ kɔbisyuobʋ (8,600). Kohat tuŋ la tʋʋm da anɛ ye ba gɔs Wina'am Pʋ'ʋsim Sʋgʋr la yɛla. 29 Kohat tuŋ la da anɛ ye ba la'as Fuug Sʋgʋr la lʋgirin lɛbis dagɔbʋg baba. 30 Kohat tuŋ la tuongat da anɛ Elizafan onɛ an Uziel biig la. 31 Ban tʋʋma da anɛ ye ba gur Nɔnaar Daka la, nɛ teebul, nɛ fita zi'esir, nɛ maan dakanam la nɛ la'abanɛ bɛ Pʋ'ʋsim Sʋgʋrin ka ba mɔri pʋ'ʋsid la, nɛ fuug linɛ lɔɔ yuli bɛŋ la, nɛ linɛ wʋsa pɛ'ɛs ka ba mɔri tʋm Pʋ'ʋsim Sʋgʋr la tʋʋma wʋsa. 32 Onɛ da an Levi dɔɔg tuongatib la wʋsa kpɛɛm da anɛ Elieza onɛ da an Aaron biig la, ka lɛn an maanmaan la. Ba da gaŋnɛ on ye o gaad banɛ tʋm Fuug Sʋgʋr tʋʋma la wʋsa tuon.
33 Merari tuŋ la da anɛ Mahli dim nɛ Musi dim: Merari tuŋ wʋsa la. 34 Ba biribis banɛ da an wʋʋ nwadig yinne bɛɛ gaad ala da anɛ tusa ayuobʋ nɛ kɔbisyi' (6,200) 35 Merari dim tuŋ la tuongat da anɛ Zuriel onɛ an Abihel biig la. Ba da anɛ ye ba la'as Fuug Sʋgʋr la lʋgirin lɛbisid datiuŋ baba. 36 Ba da gaŋi ba nɛ ye ba gɔt Fuug Sʋgʋr la yɛla, li kʋlis nɛ li dawa'a la, nɛ bʋnam linɛ zi'e sappi la, nɛ li zi'esa, nɛ linɛ wʋsa sʋŋid Fuug Sʋgʋr la ka li zi'e la, nɛ li la'ad wʋsa. 37 La'am nɛ zak linɛ gilig Fuug Sʋgʋr la bʋnam linɛ zi'e sappi la, nɛ li zi'esa, nɛ li kpada nɛ nwiis. 38 Moses nɛ Aaron nɛ o biis da anɛ ye ba zin'in Fuug Sʋgʋr la samannin, lɛbis ya-nya'aŋ, winnigi yit zin'isi'a na la. Ba tʋʋma da anɛ ba gɔs Kasi Wʋsa Kasi zin'ig la tis Israel dim la. Sɔ' ya'a li'el ani li anɛ ye ba kʋʋ o.
39 Wina'am da tis nɔɔr ka Moses nɛ Aaron kaal Levi dim nwa wʋsa tuŋ-tuŋ. Ba biribis banɛ an wʋʋ nwadig bɛɛ gaad ala la, da anɛ tusa pisi nɛ ayi' (22,000).
40 Zugsɔb la da yɛl Moses ye, “Kaalim Israel biribiŋ kpɛɛmnam la wʋsa banɛ an wʋʋ nwadig bɛɛ gaad ala sɔbi ba yʋda tuunl taaba digil. 41 Nɔkim Levi dim la tisim ka ba di'e Israel dim bikpɛɛmnam la zin'ig, ka nɔki ba bʋnkɔnbid la ka ba di'e Israel dim bʋnkɔnbid bikpɛma zin'ig. Ka manɛ an Zugsɔb la.” 42 Alazug Moses da kaal Israel bikpɛɛmnam la wʋsa wʋʋ Zugsɔb la tis o nɔɔr si'em la. 43 Bikpɛɛmnam banɛ da an wʋʋ nwadig bɛɛ gaad ala la ba da sɔbi ba yʋda tuunl taaba ka ba kal an wʋʋ tusa pisi nɛ ayi' nɛ kɔbisyi' nɛ pisyɔpɔi nɛ atan' (22, 273). 44 Zugsɔb la mɛ da yɛl Moses ye, 45 “Nɔkim Levi dim la ka ba lɛdig Israel dim bikpɛɛmnam la zin'ig, ka ba kɔnbid la mɛ lɛdig Israel dim bʋnkɔnbid bikpɛma la zin'ig: Levi dim la anɛ ye ba an man nidib. Manɛ an Zugsɔb la. 46 Israel dim bikpɛɛmnam la sadigim gat Levi dim la nɛ nidib kɔbisyi' nɛ pisyɔpɔi nɛ atan' la (273), 47 alazug yɔɔmi sɔ' wʋsa zugin anzurifa ligidi anu. Ligidkan ka ba na zaŋi yɔ la na an Wina'am Sʋgʋr ligidi, ka ka' daar wʋsa ligidii. 48 Nɔkimi ligidi la tis Aaron nɛ o biis la.”