Ban na ti' ba fuud sʋga la bɛn-bɛn si'em
2
1 Zugsɔb la da yɛl Moses nɛ Aaron ye, 2 “Israel dim la zin'inim gilig La'asʋg Fuug Sʋgʋr la ka lɛɛ lal nɛ li bi'ela. Dau wʋsa na ti' o Fuug Sʋgʋr nɛ o yir tuuta nɛ o tuŋ zanbina.”3 Juda dim nɛ ba tuŋ wʋsa na ti' ba dɔɔd la lɛbis ya-nya'aŋ winnigi yit si'el la dɔlisi ba tuuta banɛ aan ba zanbina la zin'isin. Ba tuongat anɛ Nason onɛ an Aminadab biig la. 4 O nidib la kal da anɛ tusa pisyɔpɔi nɛ anaasi nɛ kɔbisyuobʋ (74,600).
5 Isaka dɔɔg la na zin'ini tia'al Juda dim la. Ban tuongat anɛ Netanɛl onɛ an Zuar biig la. 6 O nidib la kal da anɛ tusa pisnu nɛ anaasi nɛ kɔbisnaasi (54,400).
7 Zebulun dɔɔg la na zin'ini tia'al Isaka dɔɔg la. Ban tuongat da anɛ Eliab onɛ an Helon biig la. 8 O nidib kal da anɛ tusa pisnu nɛ ayɔpɔi nɛ kɔbisnaasi (57,400).
9 Juda nya'andɔlib nwa wʋsa kal da la'as nɛ tusa kɔbiga nɛ pisnii nɛ ayuobʋ nɛ kɔbisnaasi (186,400). Banɛ na gaadi ba tuon.
10 Reuben dɔɔg la na la'as nɛ ba tuŋ wʋsa ka ti' ba dɔɔd la lɛbis dagɔbʋg baba la dɔlisi ba tuutanam linɛ an ba zanbina la zin'isin. Ban tuongat anɛ Elizu onɛ an Sediu biig la. 11 O nidib la kal da anɛ tusa pisnaasi nɛ ayuobʋ nɛ anu (40,605).
12 Simeon dɔɔg la na zin'ini tia'al Reuben dɔɔg la. Ban tuongat da anɛ Selumiel onɛ an Zurisiadai biig la. 13 O nidib la kal anɛ tusa pisnu nɛ awai nɛ kɔbistan' (59,300).
14 Gad dɔɔg la da tia'al. Ban tuongat da anɛ Eliasaf onɛ an Duodi biig la. 15 O nidib la kal da anɛ tusa pisnaasi nɛ anu nɛ kɔbisyuobʋ nɛ pisnu (45,650).
16 Reuben nya'andɔlib nwa wʋsa kal da la'as nɛ tusa kɔbiga nɛ pisnu nɛ yinne nɛ kɔbisnaasi nɛ pisnu (151, 450). Banɛ na tia'al banɛ gat tuon la.
17 Linɛ tia'al anɛ La'asʋg Fuug Sʋgʋr la nɛ Levi dim la na bɛ Israel dim la wʋsa teŋsʋk. Ban la'as si'em la gumm, ala nɔɔ ka ba na ken, sɔ' wʋsa na bɛɛ o zin'igin kpi'e nɛ tuuta linɛ pa'annɛ o zanbin la.
18 Efiram dɔɔg la na la'as nɛ ba tuŋ wʋsa ka ti' ba dɔɔd la lɛbis ya-tuona baba dɔlisi ba tuutanam linɛ an ba zanbina la zin'isin. Ban tuongat anɛ Elisama onɛ an Ammihud biig la. 19 O nidib la kal anɛ tusa pisnaasi nɛ kɔbisnu (40,500).
20 Manase dɔɔg la na tia'al Efiram dim la. Ba tuongat anɛ Gamaliel onɛ an Pedazu biig la. 21 O nidib la kal anɛ tusa pistan' nɛ ayi' nɛ kɔbisyi' (32,200).
22 Benjamin dɔɔg la na tia'al. Ban tuongat anɛ Abidan onɛ an Gideon biig la. 23 O nidib la kal anɛ tusa pistan' nɛ anu nɛ kɔbisnaasi (35,400).
24 Efiram nya'andɔlib nwa wʋsa kal da la'as nɛ tusa kɔbiga nɛ anii nɛ kɔbiga (108,100). Banɛ na tia'al atan' n gat tuon.
25 Dan dɔɔg la na la'as nɛ ba tuŋ ka ti' ba dɔɔd la lɛbis datiuŋ baba dɔlisi ba tuutanam linɛ aan ba zanbina la zin'isin. Ba tuongat anɛ Ahieza onɛ an Amisiadai biig la. 26 O nidib la kal anɛ tusa pisyuobʋ nɛ ayi' nɛ kɔbisyɔpɔi (62,700).
27 Aser dɔɔg la na tia'al. Ban tuongat anɛ Pagiel onɛ an Okiran biig la. 28 O nidib la kal anɛ tusa pisnaasi nɛ yinne nɛ kɔbisnu (41,500).
29 Naftali dɔɔg la na tia'al. Ban tuongat anɛ Ahira onɛ an Enan biig la. 30 O nidib la kal da anɛ tusa pisnu nɛ atan' nɛ kɔbisnaasi (53, 400).
31 Dan nya'andɔlib nwa wʋsa kal da la'as nɛ tusa kɔbiga nɛ pisnu nɛ ayɔpɔi nɛ kɔbisyuobʋ (157,600). Banɛ na kpɛlim nya'aŋi dɔl.
32 Bama an Israel dim banɛ ka ba kal dɔl wʋʋ ba tuŋʋ an si'em la. Ba wʋsa kal da la'as nɛ tusa kɔbisyuobʋ nɛ atan' nɛ kɔbisnu nɛ pisnu (603,550). 33 Ba lɛɛ daa pʋ kaal Levi dim la pɛ'ɛs nɛ Israel dim la, wʋʋ Zugsɔb la yɛl Moses si'em la.
34 Israel dim la da maal si'el wʋsa nɛ wʋʋ Zugsɔb la pa'al Moses si'em la, ala nɔɔ ka ba da la'as ka mɛ yii ala nɔɔ, sɔ' wʋsa nɛ o tuŋ nɛ o zak dim.