Pin'ilʋg 46

Jakob n yii keŋ Egipt teŋin la yɛla

1 Alazug ka Israel da nɔk on sʋ'oe si'el wʋsa yii keŋ Egipt, ka on paae Beerseba teŋin la, o maal maan nɛ tis o ba' Isaak Wina'am. 2 Ka Wina'am pian' tis Jakob zaansʋŋin ka buol o ye, “Jakob, Jakob!” Ka o lɛbis ye, “Naa, manɛ nwa!” 3 Ka Wina'am yɛl o ye, “Mam anɛ Wina'am onɛ aan fʋ ba' Isaak Wina'am.” Ka lɛn yɛl o ye, “Da zɔt dabiem fʋn ken Egipt la zugɔ. M na kɛ ka fʋ buudi an bɛdegʋ anina. 4 M na mɔri fʋ keŋ Egipt, ka lɛn mɔri fʋ lɛb na. Ka Josef mɛŋ na gban'af ka fʋ kpi.” 5 Jakob duoe Beerseba, ka o biis la nɔk o niŋ tɛreko ni, nɛ ba bibibis nɛ ba pu'ab, ka ba zin' tɛrekonam banɛ ka Faaro tis ye ba mɔr o na la. 6 Ba mɛ da mɔri ba bʋnkɔnbid nɛ ban mɔr si'el Keenan teŋin la, ka Jakob nɛ o nya'aŋ dim wʋsa keŋ Egipt. 7 O da mɔr o biribis nɛ o bipumis nɛ o yaas banɛ an dap nɛ pu'ab hali nɛ o nya'aŋ wʋsa keŋ Egipt.

Jakob yidim yʋda nwa

8 Jakob yidim banɛ keŋ Egipt la yʋda nwa: Reuben n aan o bikpɛɛm, 9 ka Reuben biis yʋda an Hanok nɛ Pallu nɛ Heziron nɛ Karmi. 10 Simeon biis yʋda nwa: Jemuel nɛ Jamin nɛ Ohad nɛ Jakin nɛ Zohar nɛ Sauul onɛ an Keenan pu'a sɔ' biig. 11 Levi biis yʋda nwa: Gerson nɛ Kohat nɛ Merari. 12 Juda biis yʋda nwa: Er nɛ Onan nɛ Sela, nɛ Perez nɛ Zera (amaa Er nɛ Onan da pʋn kpinɛ Keenan teŋgbauŋʋn). Perez biis mɛ da anɛ Heziron nɛ Hamul. 13 Isaka biis yʋda nwa: Tola nɛ Pua nɛ Jasub nɛ Simiron. 14 Zebulun biis yʋda nwa: Sered nɛ Elon nɛ Jaalee.

15 Bama an banɛ ka Lea da du'a tis Jakob on da bɛ Paddan-Aram la, paas nɛ o bipuŋ onɛ yʋ'ʋr buon Daina. O biis nɛ o yaas, biribis nɛ bipumis, da anɛ pistan' nɛ atan'.

16 Gad biis yʋda nwa: Zefon nɛ Hagi nɛ Seuni nɛ Ezibon nɛ Eri nɛ Arodi nɛ Areli. 17 Aser biis yʋda nwa: Imnah nɛ Isiva nɛ Isivi nɛ Beria. Ba taʋn yʋ'ʋr buon Sera. Ka Beria biis an Heber nɛ Malkel.

18 Zilipa da du'a bibama n tis Jakob, onɛ ka Laban nɔk tis o pu'ayua Lea la. Ba wʋsa la'as taaba anɛ pii nɛ ayuobʋ.

19 Jakob pu'a Rakɛl biis anɛ: Josef nɛ Benjamin. 20 Egipt teŋin ka Josef di Asenat onɛ an Potifera pu'ayua. Potifera da anɛ maanmaan Oon teŋin. Ka Asenat du'a Manase nɛ Efiram tis Josef.

21 Benjamin biis yʋda nwa: Bela nɛ Bekɛr nɛ Asibɛl nɛ Gera nɛ Naaman nɛ Ehi nɛ Roos nɛ Muppim nɛ Huppim nɛ Arid.

22 Jakob nɛ Rakɛl biis nɛ ba yaas da la'as taaba anɛ pii nɛ anaasi.

23 Dan biribiŋ da anɛ: Husim 24 Naftali biis yʋda: Jahziel nɛ Guni nɛ Jezer nɛ Sillem. 25 Jakob nɛ Biliha onɛ ka Laban nɔki tis o pu'ayua Rakɛl la biis da la'as taaba anɛ ayɔpɔi.

26 Nimbanɛ da an Jakob mɛŋ yaas ka dɔlli ba keŋ Egipt da anɛ pisyuobʋ nɛ ayuobʋ. O bipu'ab kal da pʋ paasɛ. 27 Josef biis ayi' banɛ ka ba da du'a Egipt da paas, ka kal la la'as pisyɔpɔi.

Josef di'e o saam Jakob Egipt teŋin

28 Jakob da dɛŋi tʋm Juda ye o gaad tuonnɛ paae Josef san'an ka o pa'al o Gosen teŋ la suor, ka ba nyaan paae Gosen teŋin la. 29 Josef da nɔk o tɛreko keŋ Gosen teŋin ye o tʋ'ʋs o ba' Jakob, onɛ yʋ'ʋri lɛm buon Israel la. Ka Josef n da paae o ba' tuon la, o nɔk o nu'usi kuak o ba' la ka kaasi yuug hali. 30 Ka Israel yɛl Josef ye, “Nannanna m yʋ'ʋn na kpi, bɔzugɔ man nyɛɛf nɛ m nini, ka fʋ kpɛn vʋe la.” 31 Ka Josef yɛl o ba'abiis nɛ o ba' yidim la ye, “M na keŋ pian' tis Faaro ka yɛl o ye m ba'abiis nɛ m ba' yidim banɛ da bɛ Keenan la kena. 32 Ye, nidib la anɛ kɔnbkemnib ka gʋ'ʋn bʋnkɔnbid, ka ba mɔri ba kɔnbid nɛ ba niigi kena nɛ ban mɔr si'el wʋsa. 33 Ka Faaro ya'a buoli ya bu'os ye, ‘Ya tʋʋma an bɔ?’ 34 Yanam lɛbisim o ye, ‘Ti gʋ'ʋnnɛ bʋnkɔnbid. Ti saamnam mɛ da gʋ'ʋnnɛ.’ Ya ya'a yɛl o ala, o na kɛ ka ya bɛ Gosen teŋin la.” Josef da bɔɔd ye ba yɛl nwa tis Na'ab la bɔzugɔ Egipt nidib da kis onɛ gʋ'ʋn wʋsa.