47
1 Josef da keŋ Na'ab la san'an ka yɛl o ye, “M ba' nɛ m ba'abiis yi Keenan kena, ka mɔri ba bʋnkɔnbid nɛ la'ad wʋsa na ka yʋ'ʋn bɛ Gosen teŋin.” 2 O da gaŋnɛ o ba'abiis anu n dɔlli ba paae Faaro san'an. 3 Ka Faaro bu'os Josef ba'abiis la ye, “Ya nu'ug tʋʋm an bɔ?” Ka ba lɛbis ye, “Naa! Ti anɛ kɔnbkemnib nwɛnɛ ti saamnamɛ da gʋ'ʋn si'em la.” 4 Ba mɛ da yɛl ye, “Na'aba, ti kena ye ti bɛ kpɛla saŋa bi'ela, kɔ'ɔm la bɛ Keenan ka ti bʋnkɔnbid kʋ nyɛ yaama la zug. Kɛl ka ti zin'in Gosen teŋin.” 5 Faaro yɛl Josef ye, “Fʋ ba' nɛ fʋ ba'abiis la kɛɛn fʋ san'an na, 6 ka Egipt teŋgbauŋ paalʋ wʋsa bɛɛ fʋ nu'usin. Kɛl ka fʋ ba' nɛ fʋ ba'abiis la zin'in zin'ikanɛ an sʋm la. Kɛl ka ba zin'in Gosen teŋin, ka fʋ ya'a baŋ banɛ mi' bʋnkɔnbid tʋʋma sʋ'ʋŋa, fʋn kɛl ka ba gɔsidi m bʋnkɔnbid la tisim.” 7 Ka Josef mɔr o saam Jakob na pa'al Na'ab Faaro. Ka Jakob da sɔs Wina'am albareka tis Faaro. On da naae la, 8 Faaro bu'os o ye, “Fʋ yʋma aan ala?” 9 Ka Jakob lɛbis ye, “M yʋma anɛ kɔbiga nɛ pistan' (130). M giligidnɛ wʋʋ m saamnamɛ da giligid si'em la. M yʋma pʋ zu'oe paae m yaanam yʋma, ka lɛɛ kpi'emi tisim.” 10 Ka Jakob lɛn niŋ Faaro zug albareka ka nyaan yi. 11 Ka Josef nɔk o ba' nɛ o ba'abiis la ka ba zin'in zin'ikanɛ an sʋm hali Egipt teŋin. Li da anɛ Rameses sʋ'ʋlimin la nwɛnɛ Faaro pa'al si'em la. 12 Josef da tis o ba' nɛ o ba'abiis nɛ o ba' yidim wʋsa diib ka li sia'ali ba kalli an si'em.Egipt teŋin kɔ'ɔm la yɛla
13 Diibi da ka' la kɛ ka kɔ'ɔm la maligim paasid ka Egipt nɛ Keenan dim wʋsa namisid. 14 Ka Josef kuos dikanɛ ka ba digil la, ka la'as tɛɛns la ligidi wʋsa nɔki digil Na'ab Faaro yin. 15 Ka ligidii da pɔ'ɔg Egipt nɛ Keenan dim wʋsa la, Egipt dim wʋsa da kɛɛn Josef san'an na ka yɛl o ye, “Tisimi ti diib ka ti na kpi kɔ'ɔm! Ti dii ti ligidi la wʋsa naae.” 16 Josef da yɛli ba ye, “Mɔrini ya niigi la na tiak nɛ diib, yanamɛ ka' ligidi la zug.” 17 Ka nidib la mɔri ba bʋnkɔnbidi kɛɛn Josef san'an na, ka nɔki ba widi nɛ ba pɛ'ɛs nɛ bʋʋs nɛ ba niigi nɛ bʋmis wʋsa tiak nɛ diib.
18 Yʋʋm kan la da gaad la, ba da kɛn Josef san'an yʋʋm kanɛ dɔlli li nya'aŋ la na ka yɛl ye, “Ti zugdaana, ti kʋ su'a fɔ; ti ligidi naae nɛ ka bʋnkɔnbid lɛn kae. Ti pʋ mɔr si'ela ya'a kae ti mɛŋ nɛ ti pɔɔd la. 19 Da kɛ ka ti kpi kɔ'ɔm ka ti teŋ la san'am. Fʋ ya'a na tisi ti diib ka ti di, nɛ bʋmbʋʋda ka ti bʋd, ti na kuosi ti mɛŋ nɛ ti pɔɔd wʋsa tis na'ab la, ka lɛbig o sankpan'asnam.” 20 Kɔ'ɔm la da mu'oenɛ hali, ka Josef ti ba'asi da' Egipt teŋgbauŋ la wʋsa tis Na'ab Faaro ka teŋ la wʋsa lieb o din, 21 ka kɛ ka Egipt nidib wʋsa lɛb tempʋʋdin, ka tʋmmi tisid Na'ab Faaro. 22 O lɛɛ da pʋ da' maanmaannib la paalʋʋ, bɔzugɔ Faaro da tisid maanmaannib la ligidi ka ba mɔri da'ad diib ka pʋ kuosi ba paalʋ laa.
23 Ka Josef yɛl nidib la ye, “Gɔsimiya, man sadigim da' yanam nɛ ya pɔɔd wʋsa tis Faaro la, asɛɛ ka ya di'e bʋmbʋʋda nwa bʋd pɔɔd la. 24 Amaa ya ya'a ti buni li, yanam pʋdigimi li zin'is anu nɔki yinne tis Faaro. Ka pʋdigir anaasi dinɛ kpɛlim la na an bʋmbʋʋda nɛ diibi tisi ya mɛŋ nɛ ya yidim.” 25 Ka ba yɛl ye, “Fʋ faaɛn ti bas! Li ya'a tigi fʋ nini, ti na an sankpan'asnam tis Na'ab Faaro.” 26 Ka Josef nɔki li ka li an nɔzi'elʋg hali nɛ zina ye sɔ' ya'a bun zʋʋdi pɛ'ɛl bɔto anu, yinne anɛ Faaro din. Maanmaannib la ma'aa paalʋ ka Faaro da pʋ di'ee.
27 Israel dim la da zin'inɛ Egipt teŋ kanɛ buon Gosen sʋ'ʋlim la. Ba da paam kpan'am nɛ diib bɛdegʋ ka mɛ nɔbigi zu'oe hali. 28 Jakob da bɛ Egipt nɛ yʋma pii nɛ ayɔpɔi, ka o yʋma wʋsa la'as kɔbiga nɛ pisnaasi nɛ ayɔpɔi (147). 29 Lin da paae o kum saŋa la, o buol o biig Josef ka yɛl o ye, “Fʋ ya'a nɔŋim, fʋn nɔkimi fʋ nu'ugi si'isi m gbɛr ka li pa'ali fʋ nimmua, ka kaanbi zi'el ye fʋ kʋ mumim Egipt kpɛla. Mumim zin'ikanɛ ka ba mumi m saamnam la.” 30 Ka Josef yɛl o ye, “Naa, m ba', m na niŋi ala.” 31 Ka Jakob yɛl o ye, “Pɔɔm!” Ka Josef pɔɔ zi'el. Ka Jakob zaŋ o duori tik ka su'uni o zugʋ pian' Wina'am.