Josef bieya keŋ Egipt teŋin ieed diib
42
1 Jakob n da baŋ ye diib bɛ Egipt teŋin la, o yɛl o biis ye, “Bɔ ka ya nan kpɛn zin' gɔsid taaba?” 2 Ka lɛn yɛli ba ye, “M wʋm ye diib bɛ Egipt teŋin, kem da'ae na ka ti di ka nyaŋi yi kumin.” 3 Josef bieya piiga da keŋ Egipt teŋin ye ba da' diib. 4 Amaa Jakob da pʋ kɛ ka Josef pitʋ Benjamin dɔlli o bieya la keŋɛ, bɔzugɔ o da zɔti dabiem ye o na ti nyɛ dɛŋ. 5 Lin niŋ si'em la ka Israel biis la mɛ da la'as nɛ banɛ keŋ ye ba da' diib la, bɔzugɔ, kɔ'ɔm la mɛ da li Keenan teŋin.Josef kpans o bieyanam piiga
6 Josef da an teŋ la gɔmena, onɛ kuosid diibi tisid nidib la wʋsa. Josef bieya la da paae la ba da vanbini o tuon ka ba nindaas kpa' teŋin. 7 Josef da nyɛɛ o bieya la ka baŋi ba, amaa ka niŋ wʋʋ o zi' baa, ka nyiidi ba yɔri-yɔri. Ka bu'osi ba ye, “Ya yi yaanɛ na?” Ka ba lɛbis ye, “Ti yinɛ Keenan teŋin na ye ti da' diib.” 8 Josef da baŋi o bieya la, amaa ban da pʋ baŋ o. 9 Ani ka o tiɛn on da zaansim ba yɛla la, ka yɛl ye, “Ya pigidnɛ teŋ la! Ya kena ye ya labisi gɔsi ti teŋ la zin'ikanɛ ka ti pʋ gura.” 10 Ka ba lɛbis ye, “Ayei, ti zugdaana, fʋ tʋmtʋmnib kena ye ti da' diib. 11 Ti wʋsa anɛ dau yinne biis. Tinam banɛ aan fʋ tʋmtʋmnib nwa anɛ sida dim ka ka' banɛ kena ye ba labisi gɔs teŋ la.” 12 Ka o yɛli ba ye, “Ayei, ya kena ye ya labisi gɔs teŋ la zin'ikanɛ ka ti pʋ gura.” 13 Amaa ka ba lɛbis ye, “Ayei, ti zugdaana, ti da anɛ pii nɛ ayi', an dau yinne biisi bɛ Keenan teŋin. Kpaanr la kpɛlimnɛ ti saam san'an, amaa ayinne lɛn kae.” 14 Ka Josef yɛli ba ye, “Man yɛli ya si'em la kpɛn bɛ, ya kɛnɛ na ye ya labisi gɔs teŋ la. 15 Man na kpansi ya si'em nwa, m pɔ nɛ Na'ab Faaro yʋ'ʋr ye ya kʋ yi kpɛla kulɛ asɛɛ ka ya mɔri ya pitʋ onɛ an kpaanr la kɛn kpɛla na. 16 Tʋmmi ya nid yinne ka o keŋ mɔri ya pitʋ la na. Yanam banɛ kpɛlim la na bɛ sanrega ni, ala ka m na kpansi baŋ ye ya pian'ad la anɛ sida bɛɛ ziri. M yɛti ya nɛ sida ye, ya ya'a pʋ mɔr o naa, alaa ya sid anɛ banɛ kena ye ya labisi gɔs teŋ la.” 17 Ka o nɔki ba niŋ sanrega ni daba atan'. 18 Daba atan' la daar ka Josef yɛli ba ye, “Niŋimi na anwa ka ya na vʋe, bɔzugɔ mam anɛ onɛ zɔt Wina'am. 19 Ya ya'a sid anɛ sida dim, kɛlli ka ya nid yinne kpɛlim sanrega ni ka o taaba la mɔr diibi kuli tisi ya yidim banɛ kpiid kɔ'ɔm la. 20 Amaa asɛɛ ka ya mɔri ya pitbil la na, ka m baŋ ye ya anɛ sida dim ka lin na kɛ ka ya kʋ kpii.” Ka ba siak ye ba na niŋ ala.
Simeon ba'abiis la kul ka o kpɛlim la yɛla
21 Ba da yɛl taaba ye, “Sida ti namisʋg la anɛ ti pitʋ la yɛla. Ti nyɛ on da namis si'em ka bɛlimi ti o nyɔvʋr yɛla, amaa ka ti zan'as ka pʋ kɛlisɛ; dinɛ kɛ ka namiskaŋa kennɛ ti zugin na.” 22 Reuben da lɛbisi ba ye, “M da pʋ yɛli ya ye ya da tʋm tʋʋmbɛ'ɛd kaŋa tis biig laa, ka ya pʋ kɛligɛ? Nannanna, asɛɛ ka ti yɔɔ o ziim kanɛ da yi la sam.” 23 Ba da pʋ baŋ ye Josef na wʋm ban pian'ad si'el la, bɔzugɔ sɔ' da di'esid pian'ad la. 24 O da fɛndigi o nindaa ba san'an ka kum, ka lɛn fɛndigi ba san'an na ka pian'ad nɛ ba ya'as. Ka o kɛ ka ba nɔk Simeon n yɔɔ ba nini ni. 25 Josef da tis nɔɔr ye o nidib la pɛ'ɛli ba bɔtnam la nɛ diib ka nɔk sɔ' wʋsa ligidi lɛbisi sʋʋ o bɔto la ni, ka tisi ba dinɛ ka ba na di suor zug. Ban maal nɛ' wʋsa tisi ba naae la, 26 ba da lɔɔ ba bʋmis nɛ ba diibi duoe yii kun. 27 Ba da paae zin'isi'a ka yʋ'ʋŋ sɔb ka ba zi'en, ka yinne yidigi o bɔto ye o gbin'e diib bi'ela tis o bʋŋ ka nyɛ ka o ligidi la bɛɛ o bɔto nɔɔrin. 28 Ka o yɛl o ba'abiis la ye, “Ba lɛbisi m ligidi m bɔto la ni.” Ka ba ya'am iank ka ba fɛndigi gɔsid taaba nɛ dabiem ka ye, “Yɛl bɔɔ nwa ka Wina'am kɛ ka li paae ti?”
29 Ban paae ba saam san'an Keenan teŋin la, ba tu'as o linɛ niŋi ba la wʋsa. Ba yɛl o ye, 30 “Dau kanɛ an zugdaani sʋ'oe teŋ la pian' ti nɛ yɔri-yɔri, ka niŋi ti wʋʋ ti anɛ banɛ kena ye ti labisi gɔsi ba teŋ la. 31 Amaa tinam yɛl o ye ti anɛ pʋpielim dim, ti ka' banɛ labisid ye ti gɔsi ba teŋ la. 32 Ye ti da anɛ biribis pii nɛ ayi' an saam yinne biis. Yinne la lɛn kae ka kpaanr la kpɛlimi ti saam san'an Keenan teŋin. 33 Ka onɛ an zugdaani sʋ'oe teŋ la yɛli ti ye, ‘Man na niŋ si'em baŋ ye ya anɛ sida dimi nwa, basimini ya nid yinne kpɛla ka mɔr diib la kuli tisi ya yidim banɛ namisid nɛ kɔ'ɔm la. 34 Amaa ka mɔri ya pitbil la na, ka m nyɛɛ o ka baŋ ye ya anɛ sida dim. Ani ka m na lɛbisi ya nid la tisi ya, ka ya yʋ'ʋn na nyaŋi kpiisid teŋin la.’ ” 35 Ka ban ti kpa'asid diib bɔtnamin la, ka sɔ' wʋsa ligidi lɔɔ bɛɛ o bɔto la pʋʋg. Ban nɛ ba saamme nyɛ ligidi la lɔɔ bɛɛ ani la, dabiem kpɛn' ba nɛ ka ba ya'am iank. 36 Ka ba saam Jakob yɛli ba ye, “Ya kɛya ka m kɔ'ɔŋi m biis. Josef lɛn kae, ka Simeon mɛ lɛn kae. Nannanna, ya lɛm bɔɔd ye ya mɔr Benjamin keŋ ya'as. Si'el wʋsa yʋ'ʋn anɛ bɛ'ɛdi tisim!” 37 Ani ka Reuben yɛl o saam ye, “M ya'a pʋ mɔr o lɛb na tisi fɔ, fʋn kʋʋm man biribis ayi' la wʋsa. Nɔkim o niŋi m nu'usin ka man na mɔr o lɛb na.” 38 Amaa Jakob yɛl ye, “Mam biig la kʋ dɔlli ya keŋ aninaa. O bier kpiya ka on ma'aa kpɛlim. Ya ya'a mɔr o keŋ ka si'el ti niŋ o suor zug, m zuobpielim nwa na sig yaʋgʋn nɛ sʋnsa'aŋ.”