Ban mɔr Benjamin keŋ Egipt
43
1 Ka kɔ'ɔm la yʋ'ʋn mui wii teŋ la zug. 2 Ban ti di dikanɛ ka ba mɔri yi Egipt la na naae la, ka ba saam yɛli ba ye, “Lɛm keŋi da' diib bi'ela na tisi ti.” 3 Amaa ka Juda yɛl o ye, “Dau la yɛli ti nɛ nimmua ye, ‘Ya ya'a lɛb na ka pʋ dɔlli ya pitʋ la naa, ya kʋ nyɛɛm nindaa.’ 4 Fʋ ya'a na tʋm tinam nɛ ti pitʋ la ti na keŋ da' diib la na tisif, 5 amaa fʋ ya'a kʋ kɛ ka o keŋɛ, li na tɔi bɔzugɔ, dau la yɛli ti ye, ‘Ya kʋ nyɛɛm nindaa, asɛɛ yanamɛ na dɔlli ya pitʋ la na.’ ” 6 Israel da bu'osi ba ye, “Bɔzug kimm ka yanam yɛl dau la ye ya mɔr pitʋ ka zi yɛl kaŋa kɛɛn m zugin na?” 7 Ka ba lɛbis ye, “Dau la bu'osi ti nɛ ti mɛŋ nɛ ti yidim yɛla. O bu'osi ti ye, ‘Ya saam nam bɛɛ? Ya mɔr bier bɛɛ pitʋ ya'asɛɛ?’ Tinam lɛbis nɛ wʋʋ on bu'osi ti si'em la. Tinam ye ti niŋ wala baŋ ye o na yɛl ye ti mɔri ti pitʋ la kena?” 8 Ani ka Juda yɛl o saam Israel ye, “Kɛl ka biig la dɔl mam ka ti duoe keŋ tɔ'ɔtɔ ka lɛb na, ka tinam nɛ fʋn nɛ ti biis la vʋ'ʋg ka kɔ'ɔm da kʋʋ tii. 9 Mam mɛŋ na siaki zi'enɛ o nyɔvʋr yɛla. M ya'a ti pʋ mɔr biig la lɛb na zi'eli fʋ tuon kpɛla naa, fʋn gban'am mam, ka mam mɛŋ na zi taal la hali nɛ m nyɔvʋr bɛn. 10 Din an si'em la, ti ya'a pʋ yuuginɛɛ, anwaa ti keŋin nɔɔra ayi' ka lɛbin na.” 11 Ani ka ba saam Israel yɛl ye, “Li ya'a aan ala, yanam niŋimi anwa: Mɔri la'asʋma dinɛ bɛ teŋin la mɔri keŋ tis dau la ka li aan ya piini; nɔkimi kpaam linɛ an tiim bi'ela, nɛ siind bi'ela, bʋnnyubisa nɛ mir nɛ tiis walsʋma. 12 Ka lɛn nɔk anzurifa ligidi la zin'is ayi' mɔri keŋ, bɔzugɔ anzurifa linɛ ka ba daa nɔki niŋi ya bɔtnamin la anɛ ya nɔki lɛbisi tisi ba, ka daasi'erɛɛ ba daa yidig nɛ. 13 Dɔllini ya pitʋ la keŋi tɔ'ɔtɔ. 14 Wina'am Onɛ Galis la na kɛ ka dau la zɔɔ ya nimbaanlig ka kɛ ka Simeon nɛ Benjamin dɔlli ya lɛb na. Aa tɔ, m ya'a na kɔ'ɔŋi m biis nwaa, m na kɔ'ɔŋi banɛ.”Josef maal o ba'abiis saauŋ
15 Ba da duoe nɔk piini la, nɛ ki la ligidi zin'is ayi', ka dɔl Benjamin ka ba lɛb Egipt tɔ'ɔtɔ keŋ nɔki ba mɛŋi pa'al Josef. 16 Josef n nyɛ ka Benjamin dɔlli ba la ka o yɛl onɛ gɔsidi o yin la ye, “Dɔl dap bama keŋi m yin; kɔdigim bʋnkɔnbʋg ka ba maal diib; man nɛ ban na la'am di nintaŋa.” 17 Dau la da niŋ wʋʋ Josef yɛl o si'em la, ka dɔl dap la keŋ Josef yin. 18 Dabiem da gban'e dap la nɛ ban da mɔri ba keŋi o yin la. Ba tɛn'ɛs ye, “Anzurifa ligidi dinɛ daa bɛɛ ti bɔtnamin la zug ka ba mɔri ti kɛn kpɛla na. O bɔɔd ye o zab nɛ ti nyaŋi ti ka faaɛn ti bʋmis la ka ti lɛbig o sankpan'asnam.” 19 Ka ban dɔl Josef tʋmtʋm la paae Josef yir za'anɔɔrin la, ba da yɛl o ye, 20 “Naa, tinamɛ daa dɛŋin kena ye ti da' diib la, 21 ka daa lɛbidi kun ka paae suor ka yʋ'ʋŋ sɔbi ti ka sɔ' wʋsa yɔ'ɔgi o bɔto nyɛ ka anzurifa ligidi kanɛ ka ti nɔki da' diib la nan kpɛn bɔbig ala bɛɛ ti bɔtnam nɔya ni. Din ka ti mɔri lɛb na. 22 Ti mɛ lɛm mɔr anzurifa ligidi na ye ti da' diib ya'as. Ti zi' onɛ daa nɔk ligidi la niŋi ti bɔtnamin laa.” 23 Ka o yɛli ba ye, “Li siakya, da zɔti dabiem, li anɛ ya Wina'am onɛ aan ya yaanam Wina'am la daa zaŋ ligidi la niŋi ya bɔtnamin la, manɛ daa di'e ya ligidi la.” Ka yʋ'ʋn dɔl Simeon yina tisi ba. 24 Tʋmtʋm la da dɔl dap la kpɛn' Josef yin, ka tisi ba ku'om ka ba pie ba nɔba ka tisi ba bʋmis la yaama ka ba ɔnb. 25 Ka ba ti'ebi ba piini la gur Josef n na ti lɛb nintaŋ na bɔzugɔ ba wʋm ye, ba na ti dii anina. 26 Josef n ti kul na la, ka ba nɔki ba piini linɛ ka ba mɔri kena la tis o, ka igini paae teŋin na'as o. 27 Ka o bu'osi ba niŋgbina an si'em, ka ye, “Ya saam onɛ an bʋnkʋdʋg ka ya daa yɛli mɛ o yɛla la an wala? O nan kpɛn vʋeyaa?” 28 Ka ba lɛbis ye, “Ti saam onɛ an fʋ sankpan'as la nan vʋe ka mɔr laafi.” Ka ba igin teŋin na'as o ya'as. 29 On ti gɔsi nyɛɛ o pitʋ Benjamin, onɛ aan o mɛŋ ma biig la, ka bu'osi ba ye, “Ya pitʋ kanɛ an kpaanr onɛ ka ya daa yɛlimi o yɛla la nwaa? M dakɔɔnrɛ, Wina'am pʋpielim na bɛ nɛf.” 30 Josef sʋnf da san'am o pitʋ la zug, ka o yii su'a zin'isi'a kum. O da kpɛn' o dɔgbɛɛndigin kaasid anina. 31 On ti kum naae ka pie o nindaa la, o da gban'e o mɛŋi yina ka ye, “Pʋdigimi diib la!” 32 Ka ba pʋdigi zi'eli o tuon, ka zi'eli o bieya la diibi ba tuon, ka zi'el Egipt nimbanɛ ka on nɛ ban dit la ba kɔn', bɔzugɔ Egipt dim da pʋ siakid ye ba la'asi di nɛ Hibiru nidiba, din aan ba kisʋg la zug. 33 Ba da kɛnɛ ka ba zin'in kpɛmmir Josef tuon. Kpɛɛm la da zin'in yiiga ka onɛ pa'a o zug la dɔl, ka ba tʋʋn ala hali ti paae onɛ an kpaanr la. Ka ba lidigi gɔsid taaba. 34 Ban da gbin'es diib Josef diib zin'igin la pʋdigi tisi ba la, Benjamin diib da zu'oe gaad sɔ' wʋsa din zin'is anu. Ka ba la'asi di ka nu nɛ o n tig.