Jakob n keŋ Laban san'an la yɛla
29
1 Ka Jakob keŋ paae teŋ kanɛ bɛ ya-nya'aŋ la. 2 Anina ka o nyɛ ka bulig bɛ mɔɔgin ka pɛ'ɛs dig gum-gum kpi'e bulig la zin'is atan'. Bulkan la ni ka ba wiid ku'om tisid pɛ'ɛs la. Ka kugtita'ar ligil bulig la nɔɔr. 3 Ban da ɛɛnti niŋ si'em nwa, kɔnbid la wʋsa ya'a la'as na naae, kɔnbkemnib la biligidnɛ kugir la yis bulig la nɔɔrin ka kɔnbid la nu. Ka ba ya'a nuu naae, kɔnbkemnib la na lɛm bilig kugir la lɛbisi ligil bulig la nɔɔr. 4 Ka Jakob bu'os kɔnbkemnib la ye; “M pitiba, yanam yi yaanɛ na?” Ka ba lɛbis ye, “Tinam yinɛ Haran teŋin na.” 5 Ka o lɛm bu'osi ba ye, “Ya mi' Laban onɛ an Nahor yaaŋ laa?” Ka ba lɛbis ye, “Ɛɛn, ti mi' o.” 6 Ka Jakob bu'osi ba ye, “O mɔr laafi?” Ka ba lɛbis ye, “Laafi bɛɛ o. Gɔsima, o bipuŋ Rakɛl nwana dɔl o kɔnbidi kenna.” 7 Ka o ye, “Gɔsimiya, nintaŋ la nam bɛ, saŋa pʋ paae ye ya la'asi kad kɔnbid la kulɛ; kɛl ka ba nu ku'om ka ya mɔri ba lɛb yaama zin'igin.” 8 Ka ba lɛbis ye, “Ayei, ti kʋ nyaŋɛ, ya'a ka' ye kɔnbkemnib la wʋsa kena ka ti la'asi bilig kugir la yis bulig la nɔɔrin ka nyaan kɛ ka kɔnbid la nu ku'om.” 9 Ban nam sɔnsid la ka Rakɛl mɛ paad na nɛ o saam kɔnbid, bɔzugɔ onɛ da kem kɔnbid la. 10 Ka Jakob n nyɛ Rakɛl onɛ aan o ansib Laban pu'ayua la nɛ Laban kɔnbid la, o keŋ nɛ bilig kugir la yis bulig la nɔɔrin ka kɛ ka o ansib kɔnbid la nu. 11 Ka Jakob pʋ'ʋs Rakɛl sʋ'ʋŋa ka o sʋnf ma'ae hali ka o pin'ili kaasid sumalisim zug. 12 Ka yɛl Rakɛl ye o anɛ o saam nid, ka an Rebɛka biig. Ka pu'asadir la zɔɔ kuli yɛl o saam la. 13 Laban wʋm o ansiŋ Jakob yɛla la o duoe yina zɔɔ tʋ'ʋs o. Ka bibig o ka pʋ'ʋs o sʋ'ʋŋa ka mɔr o kul yin. Anina ka Jakob yɛl Laban o ken labaar wʋsa, 14 ka Laban yɛl ye, “Asida fʋ anɛ mam ziim!” Jakob da bɛɛ o san'an paae nwadig yinne.Jakob nɛ o pu'ab yɛla
15 Ka Laban yʋ'ʋn yɛl o ye, “Li pʋ nar ye fʋ tʋmmi tisidim zaalim fʋn aan m nid la zugɔ; yɛlim fʋn na di'e si'el.” 16 Laban da mɔr bipumis ayi', Lea an kpɛɛm ka Rakɛl an biig. 17 Lea nindaa da pʋ nie nyainnɛ, amaa Rakɛl da vɛnl hali. 18 Jakob ya'am da kpɛn' Rakɛl ka o ye, “M na tʋm yʋma ayɔpɔi tisif ka di'e fʋ biig Rakɛl onɛ an Lea pitʋ la.” 19 Ka Laban lɛbis ye, “Li an sʋ'ʋŋa ye m zaŋ o tis fʋ gaad mam na tis dau sɔ'. Zin'inim kpɛla tʋm tisim.”
20 Ka Jakob tʋm yʋma ayɔpɔi Rakɛl yɛla, ka li nwɛnɛ dabisa bi'ela nɛ, on nɔŋ o la zug. 21 Ka Jakob yɛl Laban ye, “M saŋa la naae ya, nɔkim m pu'a tisim!” 22 Ka Laban buol nimbanɛ bɛ zin'ikan la wʋsa ka maal di'ema tisi ba. 23 Amaa yʋ'ʋŋi da sɔb la, o da nɔknɛ o bipuŋ kpɛɛm la kɛ ka o kpɛn' Jakob dɔɔgin. 24 Ka Laban nɔk o sankpan'asnam yinne onɛ yʋ'ʋri buon Zilipa tis o bipuŋ la ye o lieb o tʋmtʋm pu'ak. 25 Ka bɛogʋ da nie la Jakob da baŋ ye li anɛ Lea ka tans Laban ye, “Bɔɔ la ka fʋ maalim wala? M tʋm tisif nɛ Rakɛl zug, bɛɛ ka' ala? Ka bɔ ka fʋ pan'asi ma?” 26 Ka Laban lɛbis ye, “Li ka' tinam malʋŋ ye fʋ nɔk biigi tis sid ka o bier zin'iya. 27 Kʋdim maalim bipuŋ kaŋa pu'adiir malʋŋ la naae, ka m na tisi fʋ o pitʋ la, ka fʋ lɛn tʋm yʋma ayɔpɔi ya'asi yɔ.” 28 Ka Jakob siak ka naae Lea malʋŋ dabisa ka Laban nyaan tis o Rakɛl ka o lieb o pu'a. 29 Ka Laban nɔk o sankpan'asnam yinne onɛ yʋ'ʋr buon ye Biliha tis o bipuŋ la ye o lieb o tʋmtʋm pu'ak. 30 Ka Jakob mɛ digin nɛ Rakɛl ka nɔŋ Rakɛl gaad Lea, ka lɛn tʋm yʋma ayɔpɔi tis Laban.
Jakob biis yɛla
31 Zugsɔb la da nyɛ ka ba pʋ nɔŋ Lea la ka o yɔ'ɔg o du'am amaa Rakɛl on da anɛ kʋndu'ar. 32 Ka Lea nɔk pʋʋgʋ du'a biribiŋ ka pʋd o yʋ'ʋr ye Reuben,a bɔzugɔ o da yɛl ye, “Zugsɔb la nyɛɛm namisʋg; nannanna m sid na nɔŋim.”
33 Ka o lɛn nɔk pʋʋg ya'as du'a biribiŋ ka yɛl ye, “Zugsɔbb baŋ ye ba pʋ nɔŋi ma ka tisim oŋa ya'as.” Ka pʋd on ye Simeon. 34 Ka o lɛn nɔk pʋʋgʋ du'a biribiŋ ka ye, “Nannanna m sid na la'as nɛ mam, bɔzugɔ m du'a biribis atan' tis o.” Ka pʋd on yʋ'ʋr ye Levi.c 35 Ka lɛn nɔk pʋʋg ya'asi du'a biribiŋ ka ye, “Saŋkaŋa m pian' Zugsɔb la yʋ'ʋr!” Ka pʋd on yʋ'ʋr ye Juda. Ka pʋ lɛn du'a ya'asɛ.