Jakob n yii keŋ o ken la yɛla
28
1 Ka Isaak buol Jakob ka kaanb, kaanb sʋŋʋ tis o ka sa'al o ye, “Da di pu'a yi Keenan buudi la nii. 2 Mɛ Laban anɛ fʋ ansiba? Kem Paddan-Aram fʋ ma saam Betuel san'an n di pu'a yi Laban biisin la. 3 Wina'am Onɛ Galis la na niŋif fʋ zug bareka ka kɛ ka fʋ du'am nɔbig ka fʋ yaas na ti an buudi bɛdegʋ. 4 O na niŋ fʋn nɛ fʋ yaas zug albareka wʋʋ on da niŋi fʋ yaab Abraham zug si'em la. Ala ka fʋ na sʋ'oe teŋ kanɛ ka fʋ an saanne li pʋʋgin la, teŋ kanɛ ka Wina'am zaŋi tis Abraham la.”5 Ka Isaak kɛ ka Jakob keŋ Paddan-Aram paae Laban onɛ saamme an Betuel ka o an Aram teŋ nid, ka o taʋn an Rebɛka onɛ an Jakob nɛ Esau ma la san'an. 6 Esau da baŋ ye Isaak kaanb, kaanb sʋŋʋ tis Jakob ka kɛ ka o keŋ Paddan-Aram teŋin ye o di pu'a, ka lɛm baŋ ye on kaanbi tis o naae la o yɛl o ye o da di pu'a Keenan dimin, 7 ka Jakob sid siak o saam nɛ o ma nɔɔr ka keŋ Paddan-Aram teŋin la, 8 ka o duoe Esau yʋ'ʋn da baŋ ye o saam sʋnf pʋ malis nɛ on di Keenan dim pu'ab la. 9 Ka duoe keŋ Isimael onɛ an Abraham biig la san'an dii o bipuŋ Mahalaf onɛ taʋn da an Nebaiof la paas pu'a banɛ ka o pʋn dɛŋi di sa la.
Jakob n zaansim Betel teŋin la yɛla
10 Jakob n da yi Beerseba wa'ae Haran teŋin la, 11 o da paae zin'isi'a ka winnig li, ka o zin'inɛ anina. O da nɔk kugir linɛ bɛɛ anina la yinne digil ka kʋk o zug. 12 O da zaansim nyɛ dadʋg ka li ti' dunia ni keŋ ba'al arezana ni, ka Wina'am maliaknam dɔlisidi lii dʋt ka sigid. 13 Anina ka Zugsɔb la zi'enɛ o baba ka yɛl ye, “Manɛ an Zugsɔb onɛ aan fʋ yaab Abraham Wina'am, nɛ Isaak Wina'am la. M na zaŋ teŋ kanɛ ka fʋ dig la tis fʋn nɛ fʋ yaas. 14 Fʋ yaas na zu'oe nwɛnɛ titanbin'isʋg nɛ, ka fʋ sʋ'ʋlim na yaligi keŋ ya-tuona, nɛ ya-nya'aŋ, la'am nɛ datiuŋ nɛ dagɔbʋg wʋsa. Ka fʋn nɛ fʋ yaas la zug ka dunia nidib wʋsa na nyɛ bareka. 15 M na bɛ nɛf ka gurif fʋn keŋ zin'isi'a wʋsa, ka na mɔri fʋ lɛb teŋ kaŋa ni na. M kʋ basi fɔɔ, asɛɛ m ti maal man pɔɔ zi'el si'em la wʋsa.” 16 Jakob da nie gbɛɛmin ka ye, “Sida, Zugsɔb la sid bɛ kpɛla ka mam pʋ baŋɛ.” 17 Dabiem da mɔr o nɛ, ka o yɛl ye, “Zin'ikaŋa anɛ dabiem zin'ig! Li anɛ Wina'am Yir, ka lɛn an arezana za'anɔɔr.” 18 Bɛogʋ da bɔɔd nier la, ka Jakob nɔk kugkanɛ ka o sa kʋk la ba'a zi'el sappi nwɛnɛ zan'antɔlig nɛ, ka nɔk kpaam kpa'ae niŋi li zug. 19 O da pʋd zin'ig la yʋ'ʋr a Betel. Amaa teŋ la yʋ'ʋr da dɛŋi buon ye Luz. 20 Ani ka Jakob zi'el nɔkaŋa ye, “Wina'am ya'a bɛ nɛ m ka gurimi m ken nwa pʋʋgin, ka tisim diib nɛ fuud, 21 ka lɛm mɔrim laafi lɛbi m saam yir, Zugsɔb la sid na aan m Wina'am. 22 Kugkanɛ ka m ba' zi'el nwɛnɛ zan'antɔlig nwa na lieb Wina'am pʋ'ʋsʋg zin'ig, ka on tisim si'el wʋsa, m na pʋdig piiga ka tis o yinne.”