30
1 Rakɛl n da nyɛ ka on nɛ Jakob pʋ du'ad biis la o da nɛnni o bier la nɛ, ka yɛl Jakob ye, “Tisim biis ka ya'a ka' ala, m na kpi!” 2 Ka Jakob sʋʋnr pɛlig ka o bu'os o ye, “Manɛ an Wina'am kɛ ka fʋ pʋ du'a biisɛ?” 3 Ka o lɛbis ye, “M tʋmtʋm pu'ak Biliha nwa, dim o ka o du'a biisi tisim, ka anina ka m yʋ'ʋr mɛ saa na pʋdig.” 4 Ka o nɔk Biliha onɛ aan o tʋmtʋm pu'ak la tis o ka o lieb o pu'a. Ka Jakob digin nɛ o 5 ka o tʋk pʋʋgʋ du'a biribiŋ. 6 Ka Rakɛl ye, “Wina'am tisim bʋʋd; o wʋmi m fabʋlʋg ka tisim biribiŋ!” Ka dinzug ka o pʋd o ye Dan. 7 Rakɛl tʋmtʋm pu'ak Biliha da lɛn nɔk pʋʋgʋ du'a biribiŋi tis Jakob ya'as, 8 ka Rakɛl ye, “M mɔ nɛ m bier la ka paam nyaŋir!” Ka o pʋd on ye Naftali. 9 Lea nyɛ ka o gu'oe du'am la ka o mɛ nɔk o tʋmtʋm pu'ak Zilipa tis Jakob ye o lieb o pu'a. 10 Ka Lea tʋmtʋm pu'ak Zilipa du'a biribiŋi tis Jakob. 11 Ka Lea yɛl ye, “Li anɛ zusʋŋ!” Ka pʋd o yʋ'ʋr ye Gad. 12 Ka Lea tʋmtʋm pu'ak Zilipa lɛn du'a biribiŋi tis Jakob ya'as, 13 ka Lea ye, “M sʋʋnr ma'aya. M pu'a taab na buon mam ye sumalisim sɔb!” Ka pʋd o yʋ'ʋr ye Aser. 14 Ka li ti paae ki bunib saŋa ka Reuben keŋ pɔɔgin ka nyɛ du'am tiim nya'a mɔr na tis o ma Lea, ka Rakɛl yɛl o ye, “M bierɛ, nɔkimi fʋ biig du'am tiim nya'a la tisim.” 15 Ka Lea lɛbis o ye, “Fʋn faanm sidi m san'an la pʋ siakɛ, ka fʋ lɛn ye fʋ faanm du'am tiim pɛ'ɛsɛɛ?” Ka o lɛbis ye, “Tɔ! Fʋn ya'a na siaki tisim ti-nya'a la, mam mɛ na siak ka Jakob kpɛn' fʋ san'an yʋ'ʋŋ kaŋa nwa.” 16 Zaam da ma'aya ka Jakob yi pɔɔgine kunna ka Lea yii tʋ'ʋs o ka yɛl o ye, “Asɛɛ fʋ digin nɛ m yʋ'ʋŋa bɔzugɔ m nɔki m biig du'am ti-nya'a la tiaki m nintaa dabisir la ye fʋ kpɛn' man san'an na.” Ka o da digin nɛ o yʋ'ʋŋ kan, 17 ka Wina'am wʋm Lea sɔsʋg ka o nɔk pʋʋg du'a biribiŋ onɛ pɛ'ɛsi anu n tis Jakob. 18 Ka Lea yɛl ye, “M nɔki m tʋmtʋm pu'ak la tisim sid ka Wina'am yɔɔm linzug!” Ka o pʋd o ye Isaka. 19 Ka Lea lɛn nɔk pʋʋgʋ du'a biribiŋ onɛ paas ayuobʋ tis Jakob. 20 Ka Lea yɛl ye, “Wina'am tisim bʋnsʋŋ hali. Nannanna m sid na tisim girima bɔzugɔ m du'a biribis ayuobʋ tis o!” Ka pʋd o yʋ'ʋr ye Zebulun.21 Lin nya'aŋ ka o du'a bipuŋ ka pʋd on ye Daina. 22 Ka Wina'am mɛ tɛn'ɛs Rakɛl yɛla ka wʋm tis o ka yɔ'ɔgi o du'asiŋ 23 ka o nɔk pʋʋgʋ du'a biribiŋ ka ye, “Wina'am yisim nyannin!” 24 Ka o pʋd o ye Josef. Ka yɛl ye, “Wina'am paasim biribiŋ ya'as!”
Jakob kɛ ka o kɔnbid zu'oe si'em
25 Lin nya'aŋ ka Jakob yɛl Laban ye, “Basim ka m lɛbi kul m mɛŋ teŋin. 26 Nɔkimi m pu'ab nɛ m bibanɛ yɛla ka m tʋm tisif la tisim ka m kul. Fʋ mɛŋ mi' mam tʋm tʋʋm si'a tisif.” 27 Amaa ka Laban yɛl ye, “M ya'a pʋ maalif bɛ'ɛdɛ fʋn da kulɛ, bɔzugɔ m gɔsi baŋ ye Zugsɔb niŋim bareka ka li anɛ fʋ zug.” 28 Ka o bu'os ye, “Bɔ ka fʋ bɔɔd ye m tisi fɔ?” 29 Ka Jakob lɛbis o ye, “Fʋ mɛŋ mi' mam tʋm tisif ka gɔsi fʋ bʋnkɔnbid sʋ'ʋŋa si'em. 30 Fʋn da mɔr bi'ela ka m kena ka ba yʋ'ʋn nɔbig bɛdegʋ, ka Zugsɔb niŋi fʋ zug bareka zin'is wʋsa, man paae kpɛla hali nɛ zina. Amaa bʋndaar ka m na tʋm si'eli tisim mɛŋ yidima?” 31 Ka o bu'os o ye, “Bɔ ka fʋ bɔɔd ye m tisi fɔ?” Ka Jakob lɛbis ye, “Da tisim si'ela, amaa fʋ ya'a na maal bʋnkaŋa ma'aa tisim, m na keŋ gɔsi fʋ kɔnbid la ka guri ba ya'as. 32 Kɛl ka m keŋi fʋ kɔnbidin la zina gaans pɛpʋpɔnra la ba kɔn', nɛ pɛbil sabilis, nɛ bʋpʋpɔnra la ba kɔn', ka ba na aan m yɔɔd. 33 Ka bɛog sa fʋ ya'a ti kena ye fʋ vɛɛnsi gɔs m bʋnkɔnbban ka fʋ tisim la, m na an sida sɔb; ka bʋnkɔnbʋg kanɛ ka' pʋpɔnrʋg bɛɛ sabilig la fʋ na baŋ ye m zu nɛ.” 34 Ka Laban yɛl ye, “Tɔ, m siakya!” 35 Daakan la ka o yis bʋraad nɛ bʋnya'as banɛ an pʋpɔnra la ka lɛn gɛndig pielim, nɛ pɛrasabilis la, nɔki ba tis o biis ye ba gur. 36 O da kɛnɛ ka o biis la mɔri ba keŋ lalli wʋʋ daba atan' ken, ka basi ba anina, ka Jakob on nan kpɛn gɔsid Laban kɔnbbanɛ kpɛlim la. 37 Amaa Jakob da nwaae tiis sieba wila pigisi li pa'ad la sieba ka bas sieba ka li an pʋpɔnra-pʋpɔnra 38 ka nɔki li sɛɛl zin'ibanɛ ka kɔnbbanɛ bɔɔd dʋʋb la kenna ye ba nu ku'om ka li sɛɛ ba tuon. 39 Kɔnbid la ya'a da dʋ taaba dapʋpɔnra la tuon, li da kɛt ka ban du'a bisieba la an pʋpɔnra ka ba sieba lʋʋm-lʋʋm ka sieba an lasa-lasa. 40 Jakob da bak bʋʋs la nɛ pɛbibis nwa ka bas Laban bʋnam la. O da niŋnɛ ala ye o bʋnam la da la'as nɛ Laban kɔnbid la. 41 Saŋkanɛ wʋsa ka kɔnbnya'aŋ sʋma ti siak dʋʋb, Jakob da ɛɛn nɔk nɛ dapʋpɔnra la sɛ, ka ba gɔsidi li ka dʋt. 42 Amaa li ya'a anɛ kɔnbnya'as banɛ tadig la siak dʋʋb o pʋ sɛɛd daad la. Ka lin kɛ ka bʋnkɔnbid banɛ tadig la an Laban din ka banɛ kpi'em la lieb on din. 43 Di da niŋnɛ la ka Jakob lieb arezak daan hali. O da mɔr kɔnbid bɛdegʋ nɛ yammis nɛ yʋgʋma nɛ bʋmis.