Abraham bɛ na'ab Abimelek san'an la yɛla
20
1 Ka Abraham duoe keŋ Negef sʋ'ʋlimin zin'in Gera linɛ bɛ Kades nɛ Seur teŋsʋk la. 2 Ka Abraham yɛl nidib la ye Sara anɛ o taʋn. Ka Abimelek onɛ an Gera Na'ab la tʋm nɔk Sara. 3 Ka Wina'am keŋ Na'ab Abimelek san'an zaansʋŋin yɛl o ye, “Fʋ na kpi, bɔzugɔ pu'a kanɛ ka fʋ nɔk la mɔr sid!” 4 Amaa Na'ab Abimelek da nam pʋ digin nɛ pu'a la ka bu'os ye, “M Zugsɔba, fʋ na san'am nimbanɛ pʋ maal taalɛɛ? 5 Ka' Abraham yɛl ye, ‘Sara anɛ m taʋn’ ka Sara mɛ ye, ‘Abraham anɛ m taʋn?’ Bɛɛ li ka' ala? Mam pʋ maal taalɛ, pʋpielim zug ka m tʋm nɛ'.” 6 Ka Wina'am yɛl o zaansʋŋin ye, “M mi' ye fʋ tʋmnɛ pʋpielim, fʋ pʋ tʋm taalɛ, linɛ kɛ ka m gu'uf ka fʋ pʋ si'is o la. 7 Nannanna nɔkim dau la pu'a lɛbisi tis o, ka o na pʋ'ʋsi tisif ka fʋ kʋ kpii. Baŋim ka o anɛ nɔdi'es. Amaa fʋ ya'a pʋ lɛbis pu'a la tis o, baŋim ye fʋn nɛ fʋ yidim wʋsa na kpi.”8 Bɛogʋ da nie la, Na'ab da isigi la'as o na'ayikpɛm ka yɛli ba on nyɛ si'el wʋsa, ka dabiem kpɛn' ba pamm. 9 Ka Na'aba Abimelek buol Abraham bu'os o ye, “Bɔɔ kɛ ka fʋ maal nwa tisi ti? Mam maalif bɔ ka fʋ kɛ ka taal tita'ar kaŋa lu m sʋ'ʋlim nwa zugɔ? Fʋ pʋ maal mam linɛ dɔl suor baa bi'elaa.” 10 Ka Abimelek daa lɛm bu'os o ye, “Fʋ tɛn'ɛs bɔ ka maal yɛl kaŋa?” 11 Ka Abraham lɛbis ye, “M tɛn'ɛs nɛ m sʋʋnrin sa, ye Wina'am zɔtim kae teŋgbauŋ kaŋa nwa nii, alazug, ba na kʋʋmi m pu'a la zug. 12 Ka li mɛ pʋn anɛ sida ye o anɛ m taʋn, bɔzugɔ ti anɛ ba'abiis ka lɛɛ ka' mabiisɛ, ka m da di o ka o liebi m pu'a. 13 Wina'am da kɛ ka m basi m ba' yir ka ken teŋ zʋŋ la, m da yɛl o ye, ‘Fʋn na niŋ si'em nwa ka li pa'al ye fʋ nɔŋim; zin'ikanɛ wʋsa ka ti keŋ fʋn yɛlim ye fʋ anɛ m taʋn.’ ” 14 Ka Abimelek zaŋ pɛ'ɛs nɛ niigi, nɛ yammis banɛ an dap nɛ pu'ab na tis Abraham, ka nɔk Sara lɛbisi tis o. 15 Ka Abimelek daa lɛn yɛl o ye, “Gɔsimi m sʋ'ʋlim la wʋsa gaŋ zin'ikanɛ ka fʋ bɔɔd ye fʋ zin'in.” 16 Ka o yɛl Sara ye, “Gɔsima! M tisi fʋ taʋn la anzurifa ligidi tusir dinɛ na pa'al nimbanɛ bɛ kpɛla la ye fʋ pʋ maal bɛ'ɛdɛ; fʋ ka' gba'arɛ. Ayei! Taal si'a kae.” 17 Ka Abraham sɔs Wina'am ka Wina'am ti'eb Abimelek nɛ o pu'a nɛ yammis banɛ an pu'ab ka ba na lɛn nyaŋi du'a ya'as, 18 bɔzugɔ, Zugsɔb da kɛ ka Abimelek yipu'ab la wʋsa lieb kundu'ada, Abraham pu'a Sara zug.