Sodom nɛ Gomora san'auŋ yɛla
19
1 Maliaknam ayi' la da paae Sodom teŋin zaamnɔɔr, ka Lot zin' Sodom teŋ za'anɔɔrin. On da nyɛɛ ba la, o da duoe tʋ'ʋsi ba ka vanbin teŋin na'asi ba, 2 ka yɛli ba ye, “M zugdaannama, m sɔsidi ya nɛ ye ya paae m yin na wabisi ya nɔba ka gbɛn ka bɛog nie ka ya gaad.” Ka ba lɛbis o ye, “Ayei, tinam na digin da' pʋʋgin la.” 3 Ka o pian' hali, ka ba nyaan ti siak ka dɔl o kul o yin, ka o maal disʋma, ka sɛn' bodobodo dinɛ ka danbin pʋ gɛndigɛ, ka ba di.4 Ban da nan zin' sɔnsid la, Sodom dasam nɛ bʋnkʋt wʋsa da yi teŋin la na la'asi gilig yir la. 5 Ba da buol Lot n bu'os o ye, “Dap banɛ sigi fʋ yin yʋ'ʋŋa la bɛ yaanɛ? Yisimi ba na ka ti digin nɛ ba!” 6 Ka Lot yii ba san'an ka yɔ' za'anɔɔr la lɛbis 7 ka yɛli ba ye, “Ayei, n zuanama! Da tʋmmi tʋʋmbɛ'ɛd kaŋaa! 8 Gɔsima, mam mɔr bipumis ayi' banɛ nam pʋ digin nɛ dau; kɛl ka m yisi ba na tisi ya ka ya ya'a bɔɔd ye ya maali ba si'em yanam maal. Amaa da maal dap bama si'ela, bɔzugɔ ba sig nɛ mam yin na.” 9 Ka ba lɛbis ye, “Kem sa! Fʋ aan anɔ'ɔnɛ? Fʋn an saan la bɔɔd ye fʋ pa'al tinam ya'am? Ti na tʋmif nyɔbidi gaad dap la!” Ka ba tɛbig Lot nɛ paŋi bɔɔd ye ba kɔ' za'anɔɔr la kpɛn'.
10 Ka dap la tiɛn ba nu'usi vɛ'ɛg Lot n kpɛn'ɛs yin la ka kpar za'anɔɔr la. 11 Ka kɛ ka dasam nɛ bʋnkʋt la wʋsa zu'om ka babinnɛ ieed za'anɔɔr la ka pʋ nyɛta.
12 Ka dapa ayi' la bu'os Lot ye, “Fʋ mɔr nidib teŋ nwa pʋʋgin banɛ aan fʋ diemnam bɛɛ fʋ biribis bɛɛ fʋ bipumis bɛɛ fʋn kpin sieba? Mɔri ba yis teŋ nwa ni! 13 Ti na san'am teŋ la wʋsa. Bɔzugɔ ba kaas teŋ la tʋʋmbɛ'ɛd yɛla hali ka li paae Zugsɔb san'an, ka o tʋmmi ti ye ti kena san'am teŋ la wʋsa.” 14 Ka Lot yii zɔ tɔ'ɔtɔ paae o bipumis sabuos la san'an yɛli ba ye, “Duom yii teŋin nwa tɔ'ɔtɔ, ka Zugsɔb ye o san'am teŋ la nɛ!” Amaa dasam la da tɛn'ɛs ye o di'emidnɛ. 15 Ka bɛogʋ da bɔɔd nier la ka maliaknam tans Lot ye, “Duom nɔki fʋ pu'a nɛ fʋ bipumis banɛ bɛ kpɛla la yi ka bas teŋ la, ka san'auŋ da paae ya.” 16 On da nam yuugid la ka dap la gban'e o nu'ug nɛ o pu'a la nɛ o bipumis ayi' la mɔri ba yis teŋ la yiŋ sa bɔzugɔ, Zugsɔb la da zɔɔ ba nimbaanlig.
17 Ban yisi ba naae la ka ba yinne yɛl Lot ye, “Zɔm tiligi fʋ mɛŋ ka da gi'e nya'aŋ bɛɛ zi'en bɔn'ɔgin laa. Zɔm paae zuorin la, ya'a ka' alaa fʋ na kpi!” 18 Ka Lot sɔsi ba ye, “Ayei, m zugdaannama! 19 Gɔsima, ya zɔɔ m nimbaanlig bɛdegʋ ka faanmi bas. Amaa m kʋ nyaŋi zɔɔ paae hali zuor la ka san'auŋ la da paae ma, lin lal la zug. 20 Gɔsima, tembili nwa kpɛla yamma ka m na nyaŋi zɔɔ paae. Anina ka m na nyaŋi zɔɔ paae ka pɔns.” 21 Ka maliak la ye, “Tɔ, li an sʋm, m siakya. M kʋ san'am teŋ kan la. 22 Kpɛ'ɛŋimi ya mɛŋi zɔ tɔ'ɔtɔ paae anina, bɔzugɔ m kʋ maal si'ela hali nɛ fʋn na ti paae anina.” Dinzug ka ba pʋd teŋ la ye Zoar.a 23 Lot da paae teŋ la ni ka winnig tans. 24 Ka Zugsɔb kɛ ka bugum nɛ kidibir yi saazugin sig Sodom nɛ Gomora zug nwɛnɛ saa niidnɛ. 25 O da san'am tɛɛns nwa, la'am nɛ teŋ titada nɛ tembibis banɛ kpi'e anina la ka nidib nɛ mɔɔd nɛ bʋnkɔnbid kanb. 26 Amaa ka Lot pu'a on gi'e gɔs nya'aŋ ka lieb yaarkugiri zi'e. 27 Bɛogʋ da nie la Abraham da isig nɛ tɔ'ɔtɔ keŋ zin'ikan ka o sa zi'en Zugsɔb tuon la, 28 ka gɔs Sodom nɛ Gomora tɛɛns la baba wʋsa, ka nyɛ ka bugum nyɔ'ɔs duod teŋ la ni wʋʋ mɔɔg ka ba nyu'oe nɛ. 29 Wina'am da san'am tembanɛ ka Lot da bɛ la, amaa ka da tɛn'ɛs Abraham yɛla ka yis Lot tɛɛnsin la.
30 Lin da niŋi ala la, dabiem da kpɛn' Lot ka o pʋ lɛm bɔɔd ye o zin' Zoar teŋin la, ka on nɛ o bipumis ayi' la yii gaadi keŋ zuoya la nii bɛ tampinlɛma ni. 31 Daar yinne ka o bipuŋ kpɛɛm la yɛl o pitʋ la ye, “Li kʋ yuugɛ ka ti saam la kʋdigi tadig, ka dau mɛ ka' kpɛla ka ti na kuli du'a biis wʋʋ lin nar si'em la. 32 Kɛl ka ti tis o daam ka o nuu bug ka ti digin nɛ o n du'a biis ka ti tuŋ la tɔ'ɔŋi yii ti saam la san'an na.” 33 Yʋ'ʋŋ kan ka ba kɛ ka ba saam la nu daam bug ka bipuŋ kpɛɛm la kpɛn' digin nɛ o. Lot da pʋ baŋ on digin o ka duoe saŋa si'a. 34 Bɛogʋ da nie la bipuŋ kpɛɛm la da yɛl o pitʋ la ye, “Mam sa digin nɛ m saam su'os yʋ'ʋŋ. Kɛl ka ti lɛn tis o daam ka o nuu bug yʋ'ʋŋa ka fʋn mɛ digin nɛ o ala, ka ti na paam buudi ti saam san'an.” 35 Ka ba lɛn kɛ ka o nu daam bug yʋ'ʋŋ kan la ya'as, ka pit la digin nɛ o. Anina ya'as o da pʋ baŋ on digin ka duoe saŋa si'a. 36 Anina ka Lot bipumis ayi' la gban'e pʋʋs n yii ba saam la ni. 37 Bipuŋ kpɛɛm la da du'a biribiŋ ka pʋd o yʋ'ʋr ye Moab. On buudi la lieb Moab nidib hali nɛ zina la. 38 Ka o pitʋ la du'a biribiŋ ka pʋd o yʋ'ʋr ye Ben-Ammi, on buudi lieb Ammon nidib hali nɛ zina la.