Isaak du'am yɛla
21
1 Zugsɔb la da maali tis Sara nwɛnɛ on da pian' zi'el si'em la. 2 Ka Sara nɔk pʋʋgʋ du'a biribiŋi tis Abraham o bʋnkʋttim saŋa. Nwa da tʋm nɛ wʋʋ Wina'am da yɛl ye li na maal saŋa si'a la. 3 Ka Abraham pʋd biig la yʋ'ʋr ye Isaak. 4 Abraham da kpɛn'ɛs biig la baŋʋ daba anii daar, nwɛnɛ Wina'am da zi'el si'em la. 5 Saŋkan la Abraham da anɛ yʋma kɔbiga. 6 Ka Sara yɛl ye, “Wina'am kɛ ka m la', ka onɛ wʋm nɛ' mɛ na la'ad nɛ m. 7 Anɔ'ɔn na yɛl ye man Sara na du'a biiga? Nɛ wala wʋsa man du'a biribiŋi tis Abraham o bʋnkʋttim saŋa.”Ban kad Haga nɛ Isimael yis la yɛla
8 Ka Isaak nɔbig ka tuk bin'isir. Biig la daa tuk bin'isir daasi'el la, Abraham da maal sumalisim di'ema. 9 Ka daar yinne ka Sara nyɛ ka bikanɛ ka Haga onɛ an Egipt pu'a la du'a tis Abraham la la'ad Isaak. 10 Ka o yɛl Abraham ye, “Kadim pu'a kanɛ an yammʋg la nɛ o biig la ya'a ka' alaa o biig la na ti pʋdig faar la nɛ mam biig Isaak.” 11 Ka nɛ'ɛŋa san'am Abraham sʋʋnr hali, o biig Isimael zug. 12 Amaa Wina'am da yɛl Abraham ye, “Da kɛ ka fʋ sʋʋnr san'am biig la nɛ o ma la zugɔ. Amaa maalim linɛ wʋsa ka Sara yɛlif ye fʋ niŋ la, ka li anɛ Isaak tuŋʋn ka fʋ yaas amɛŋa na yina. 13 Amaa man na kɛ ka yammʋg biig la buudi mɛ lieb bɛdegʋ bɔzugɔ o anɛ fʋ biig mɛn.” 14 Ka Abraham isigi maal diib, ka nɔk ku'om su gan'arine tis Haga ye o mɔri dɔl biig la keŋ. 15 Ka ku'om la da naae la ka o nɔk Isimael n digil tutuud ma'asim, 16 ka keŋ lalig bi'ela ka ye, “Mam kʋ nyaŋi gɔti m biig ka o kpiida!” Ka zin' lallisa ka kum. 17 Ka Wina'am daa wʋm biig la kaasig la, Wina'am maliak daa naam saazug ka buol Haga bu'os o ye, “Haga! Bɔɔ maalɛ? Da zɔt dabiem bɔzugɔ Wina'am wʋm biig la dig tutuud ma'asim kaasid la. 18 Duom nɔk biig la; ka m na kɛ ka o buudi nɔbigi lieb bɛdegʋ.” 19 Ka Wina'am nie o nini ka o nyɛ bulig, ka keŋ wik ku'om liie pɛ'ɛl gan'ar la m mɔri keŋ tis o biig la ka o nu. 20 Ka Wina'am da bɛ nɛ biig la. O da bɛ mɔɔgin la nɔbigi lieb tɔn'ɔs. 21 O da zin'inɛ Paran sian'arin ka o ma bɔ pu'a Egipt teŋin na n tis o.
Abraham nɛ na'ab Abimelek n naal Nɔɔr si'em
22 Saŋa kan la Na'ab Abimelek nɛ Fikol onɛ an o soogianam kpɛɛm la da kena yɛl Abraham ye, “Wina'am bɛ nɛf ka sʋŋidif fʋn tʋm si'el wʋsa. 23 Alazug, pɔɔm Wina'am ye fʋ kʋ maal mam bɛɛ m biis bɛɛ m yaas bɛ'ɛdɛ. Mam maalif sʋ'ʋŋa, pɔɔm ye fʋ mɛ na maal sʋ'ʋm tis mam nɛ m teŋgbauŋ kanɛ ka fʋ zin' la.” 24 Ka Abraham ye, “Tɔ, m pɔya.” 25 Ka Abraham fabili tisi Na'ab Abimelek bulig kanɛ ka Na'ab yammis la faaɛn la yɛla. 26 Ka o lɛbis ye, “Man zi' onɛ tʋm nwaa, fʋ mɛ pʋ yɛli ma. Zina ma'aa ka m wʋm.” 27 Ka Abraham mɔr pɛ'ɛs nɛ niigi na tisi Na'ab Abimelek ka babayi' la maal nɔnaar nɛ taaba. 28 Ka Abraham yis pɛsa'as ayɔpɔi o pɛ'ɛs la ni zi'eli ba kɔn'. 29 Ka Na'ab Abimelek bu'os o ye, “Fʋ gaans pɛsa'as ayɔpɔi la ye fʋ maal bɔ?” 30 Ka Abraham lɛbis ye, “M bɔɔd ye fʋ di'e pɛsa'as ayɔpɔi la ka li pa'al ye manɛ tu bulig la.” 31 Alazug ka ba buon zin'ig la ye Beersebaa bɔzugɔ anina ka nidiba ayi' nwa pɔɔ tis taaba. 32 Nɔnaar la nya'aŋ la ka Abimelek nɛ Fikol onɛ an o soogianam kpɛɛm la lɛbi kul Filistia sʋ'ʋlimin. 33 Abraham da sɛ tima'asir Beerseba teŋin ka pʋ'ʋs Wina'am Kanɛ Ka' Naar la. 34 Ka Abraham zin'in Filistia teŋin yuug hali.