Efantu 49
Jakob kaasampan ka kiteyoo epuukoo
49
Púful toko,
Jakob naayonkal epuukoo naasokii:
“Níconcooloyii inci pusok aluu heekaakaay ha pitaako aluu hátikin.
2 Níkey nísiitan,
aluu epuuk Jakob,
nísiitan Israyel paapaa ataaluu.
3 Ruben,
añiinam áyaañ,
awe yem sempeyam,
añiinam áyaañ ti hikampaanateyam.
Epuukam púlooŋ,
aahaŋii sempe inhaŋee káamakiyan.
4 Mpahiñi nii ésaacin,
pale aatinene haŋ an,
kaatuko aahintaahinto niŋ aalam,
uwwas ecunkun ya etoom meeñeeya.
5 Simeyon niŋ Lewi pakoonool paka,
úkuntu wa uteyii uti káapucalool.
6 Alímaati inci timpi tantak ñicukool ña ñiteyii,
álimaati inci timpi yeno nantoonool ti piteŋenool pa piteyii.
Kaatuko ti káñiken ka kiteyii nkamuke pákayiin
nkataak pásuuma ti kaamuunal kíciin.
7 Ñanaa pafet pa piteyii peehiñe pa,
niŋ káñiken ka kiteyii keekance ka.
Keesokii maamaa étikayini piyeno nantoonool,
efikanakanoolo niŋ keesoke Jakob maamaa,
nkahancaloolo pan óo pan ti mah ma miti Israyel.
8 Juda,
ñúnuwi niŋ pakatuwi éfikamuli,
aafacok ñisenku pikamooli,
miin ma miti paapaa atii éfimikilipo hátikini.
9 Juda,
añiinam,
aacukaacuk nii cicata ceepaye hili efoofa etenco,
inciñoho ti káahintuma etenco
inciñakoolo incihinto.
Ayme áfaahaañi co kalitan?
10 Cáwii ca éticiful ti miin ma miti Juda,
hikasap ha hiti cáwii ca étihiful ti máacaasiyoo
taamanta aŋa eeñaŋe ho ya hicoopu ácoliyoot,
aŋa ammeya ya nii púlunta pa púlooŋ éfiputuuloo.a
11 Afaacenk cífali ca citeyoo ti nikenenk,
afaacenk fáli eyyuu ti nikenenk neenape.
Elaan éeciita hinoom eti kikenenk efeemeeŋ
fo añow teyyo wañ wa uteyoo,
fo añow teyyo hísool ha hiteyoo.
12 Ñíkinoo efiñihaŋ elaan eti kikenenk pacaaŋ,
úŋiiŋoo nuuhaŋ miin pahiine.b
13 Sepulun afaakin ti kantant kaatii
keetaake kásik kiti ñiteen ñenfakat,
afaakin puwant Siton.
14 Isakaal acukaacuk nii fáli eetaake sempe
éepahiye ti pututa kukuup kúsupak enka neekancape.
15 Afaacuk nii éyekunooluma ya enapaanap,
etaam ya néesuum.
Naawufan káapantiyoo apikanto pakantiyal peenapa
naacoon páhin piti amiikan.
16 Dan áfaahin kíiti pakanoo
samat nii pikee písii pa piti Israyel.
17 Dan afaacuk nii epululoola ti kanaac pítin,
kaafepa ti pítin pa,
enka nkulum efalinc ti koot
fo efalinc ya ewant ateteyana ya eteyyo naalinkiloolo.
18 Ateeteyo,
inci taakaataak káyinan nii aafafakanam!
19 Gad,
pikancak efikalaakiyoo,
pale náasiiŋoonii apitey neyii.
20 Asel mah ma miteyoo efimmitaak umaañ weenape,
afanamemanool ñaliyal ñiti pumansa.
21 Nafatali acukaacuk nii himisawoot heeyihe
eeha nihipuk mufuun meewalla.
22 Josef acukaacuk nii enuun eewalla eyya nepukool,
néeyemi pukol káapun.
Unaay eteyyo nuumuus hiniŋ ha.
23 Pakati kiŋaaceen kalaahatooloo
nkalaakiyoo nkacenanoo.
24 Pale akina,
sipeesoo seeyanke etisikikilan
niŋ ásikaa hiŋaaceen ha hiteyoo,
kamma sempe sa siti Pútuun pa piti Jakob,
pikina piyem Afaasa ya,
niŋ lompo Enánkiin ya eti Israyel.
25 Pikina piyem Pútuun pa piti paapaa atii empa mpiyankanani pa,
Pútuun pa piti sempe sa púlooŋ empa mpisampani pa:
kaasampan kiti etiil ya eyya néfulii ya patiila,
kiti man emma úmmufulii ma t’etaam,
niŋ kiti kaapukool niŋ káacuuwan.
26 Kaasampan ka kiti paapaa atii
kihaŋaahaŋ pafom pítintiŋ pa peeyem pa le kápiliŋ ti símaama unaa,
kumuusaamuus mítintiŋ ma miti kúcook ka.
Alímaati kúwanoonii ti hikaw Josef,
éeyenoonii ya ati hikaw ti ñúnuwoo niŋ atuwoo.
27 Benjamin acukaacuk nii eyen elampa eyya netaatulool.
Mpucom pa neli élukuleen eyya neeleemaye ya,
Nkániim ka népaacinool aŋa neecoke ya.”
28 Payenkuu púlooŋ kayem sísii sa ŋaasuwan niŋ súsupak sa siti pakati Israyel.
Kilim enkuu paapaa ateyii naasokii ta naayeniyii ta kaasampan,
an óo an niŋ kaasampan ka kiteyoo.
Jakob epuukoo ŋaasuwan niŋ pákasupak paka káyenoonii miin ma ŋaasuwan niŋ músupak ma miti Israyel.
Ruben akina ayem sempe faafoo náaful teyoo.
Simeyon niŋ Lewi pakoonool paka úkuntuyii uti káapucalool.
Juda:
miin ma miti paapaa ateyoo éfimikilipo hátikinoo.
Jakob epuukoo ŋaasuwan niŋ pákasupak paka káyenoonii miin ma ŋaasuwan niŋ músupak ma miti Israyel.
Dan:
aŋe éehine ya pakateyoo samat nii pikee písii pa piti Israyel.
Nafatali:
aŋe eecuke ya nii himisawoot heeyihe nihipuk epuuk keewalla.
Gad:
efikalaakiyoo pale náasiiŋoonii.
Asel:
ati mah ma meetaake ma umaañ weenape.
Jakob epuukoo ŋaasuwan niŋ pákasupak paka káyenoonii miin ma ŋaasuwan niŋ músupak ma miti Israyel.
Isakaal:
ati sempe sa éyekunooluma ya etaamoo néesuum.
Sepulun:
ati kaatii keetaake ka ñiteen ñenfakat ña.
Josef:
eenakoole ya niŋ enuun eewalla.
Benjamin:
aŋe eecuke ya nii eyen elampa eyya netaatulool.
Jakob epuukoo ŋaasuwan niŋ pákasupak paka káyenoonii miin ma ŋaasuwan niŋ músupak ma miti Israyel.
Eket ya eti Jakob
29 Púful toko Jakob naasok epuukoo:
“Etikamp inci ketaa pinanf pakataama,
nihokam la ñífaafam nkahokee la,
ti kaayeen ka kenfakat ka keeyem ka ti kaakit ka kiti Efulon,
eesoke Het maamaa.
30 Kaayeen enkuu unka ti kaakit ka kiti Makapela pukol Mamule ti mah ma miti Kanaan.
Abraham anoome kaakit ka ti Efulon,
eesoke Het maamaa,
kati kiyeno íhokuma ha hiteyoo.
31 Toko Abraham niŋ aaloo Sara nkahokee,
Isaak lompo niŋ aaloo Rebeka toko nkahokee.
Inci himuumam toko inhoke Leya.
32 Kaakit ka niŋ kaayeen ka keeyem ka toko,
ti keesoke Het maamaa nkunoomee.”
33 Ta Jakob naapaye ta káakup niŋ epuukoo,
náaseepin wootoo apinaŋ wo ti ecunkun ya,
naasuuŋut pikelan naaket apinanf pakataama.