Efantu 48
Kaasampan ka kiti Jakob epuuk Josef
48
Eehuu hipimuus,
nkasok Josef:
“Paapaa atii ákuuñaakuuñ!”
Mpásiyaloo eehuu,
naacoop pikampaani pa pakateyoo pákasupak paka,
Manase niŋ Efreem,
nkakaayoo hiyoop.
2 Fiye nkasok Jakob:
“Añiini Josef ácoliyoo hiyoopuyi.”
Jakob,
aŋa nkasok ya lompo Israyel,
náahin kata apilito,
naayeno ti ecunkun ya eteyoo.
3 Jakob naasok Josef:
“Pútuun pa piti sempe sa púlooŋ púfuliyooful ti inci Lus eeyem ya ti mah ma miti Kanaan,
mpisampanam.
4 Mpusokam:
'Inci fawufani epuuk keemeeŋe aakati yeno maamaa ati hícump písii.
Fawufan mah emme epuuki niŋ keesokuu maamaa,
éfimiyenoonii miteyii fo eket maama.'”
5 Jakob nene asokoo:
“Pikampaani pa pákasupak paka pakatii keepukee ka ti mah ma miti Esipt le niŋ inci fákey pukoli,
cokiicok nii epuukam.
Efreem niŋ Manase pakatoom samat nii Ruben niŋ Simeyon.
6 Pale pakatuwii efikayeno pakatii.
Ti etaam ya eti ñúnuwii efikasa hitoonu ha hiteyii.
7 Kaatuko ta inci ínfulii ta Mesopotami cólumii Efalata ti mah ma miti Kanaan,
Rasel,
íññaa atii,
naaket ti pítin pa,
ínciitiyam meemak.
Inci inhokoo ti pítin pa piti Efalata (ekina nkasok fiye Betelehem).”
8 Israyel naacuk pikampaani pa pakati Josef naacakan:
“Payenkuu pakayme?”
9 Josef naañahanoo:
“Payenkuu pikampaani pa payenka Pútuun pa mpuwufanaam ka le Esipt.”
Jakob naasokoo:
“Káluma,
cóopiyii pukolam kati sampanii.”
10 Ti oom caanak,
Israyel amaamanaa-maaman,
ñíkinoo íññitaah acukantoo pinap.
Fiye,
Josef naacoop pikampaani pa pakateyoo pukol Israyel.
Israyel naaŋoonii naasumpoolii.
11 Púful toko naasok Josef:
“Taapala míilool nii fanene cuk puhooŋuyi pale Pútuun pa mpíhin pucuk focaa epuuki.”
12 Josef náafulan epuukoo ti hipoŋ Jakob,
náakilipo hátikinoo puhooŋuyoo t’etaam.
13 Josef naasiiŋan epuukoo,
Efreem ti epeesoo yáali ekina eyem Israyel epeesoo yaamay,
Manase ti epeesoo yaamay ekina eyem Israyel epeesoo yáali,
náahinii kapulohoo.
14 Pale Israyel naafiitanool sipeesoo,
naanaŋ yáaliyoo ti hikaw Efreem eeyem ya kahiineen ka,
naanaŋ yaamayoo ti hikaw Manase eeyem ya áhampaatiin a.
15 Fiye naasampan Josef,
naasokoo:
“Alímaati Pútuun pa empa maamaa atoom Abraham
niŋ paapaa atoom Isaak nkátuule pa,
Pútuun pa peefaasaam pa
kápiliŋ emma inci mpukee ma fo fiye,
16 Pútuun pa peeyem pa Maleekoo ya eefakanaam ya
ti heenaput ha púlooŋ,
álimaati pisampan pikampaani pa payenke!
Alímaati pínapii teyii caacawam inciluwee
niŋ lompo caacaw maamaa atoom Abraham
niŋ citi paapaa atoom Isaak,
nkataak hícump miin ti etaam ya!”
17 Josef súumutoo fa naacuke fa paapaa ateyoo naanaŋe fa epeesoo yáali ti hikaw Efreem;
fiye,
naacok epees faafoo kati áfulan yo ti hikaw Efreem apinaŋ yo ti hikaw Manase.
18 Naasok paapaa ateyoo:
“Haani paapaa,
fiyuu tom.
Aŋe ayem áhampaatiin a,
naŋ epeesi yáali ti hikawoo.”
19 Paapaa ateyoo naapook,
naasokoo:
“Añiinam,
inci méyimeyi,
Manase lompo keesokoo maamaa éfikayenoonii síi eemaka.
Pale atuwoo afaahaŋoo hamake,
keesokoo maamaa éfikayenoonii písii peemaka.”
20 Fiye,
naasampanii oom hinoom,
naasok:
“Ti ucaw aluu pakati Israyel éfinkasik niŋ kayeniyaa kaasampan.
Efinkasok:
'Alímaati Pútuun pa píhin aluu nípiful Efreem niŋ Manase.'”
Fiyuu Jakob naanaŋe Efreem hátikin Manase.