Efantu 27
Jakob káalipu ka kiteyoo kaasampan ka kiti Esawu
27
Isaak náamaamanii ñíkinoo iññicok ayinaat hicuku.
Naayonkal añiinoo ácook a Esawu,
naasokoo:
“Añiinam!”
Esawu naañahanoo:
“Eheeyam.”
2 Isaak naasokoo:
“Aacukaamcuk,
inci oopa maamane míit teyme inci nkaakaay eket.
3 Fiye,
coop hiŋaaceen ha hitii nkaayam leema áapumukii efoofa.
4 Iyyik yo payikal pa péesuume pa empa inci íllafiye pa,
íncoopii yo inci pili kati sampani le niŋ inci faket.”
5 Ta Isaak naayeniye ta káakup niŋ añiinoo Esawu,
Rebeka naayeno káasiitan.
Fiye,
Esawu naakaay leemayuu kati ámukii paapaa ateyoo efoofa.
6 Rebeka naasok añiinoo Jakob:
“Inci síyaasi paapaa atii ti káakup niŋ púnuwi Esawu,
naasokoo
7 ámukiyoo efoofa naayikoo yo púsuum;
niŋ apayaa hili naasampanoo hátikin Ateeteyo le niŋ afaaket.
8 Fiye añiinam síitanam,
ínhin eeha inci nkaakaayi ha hisoku.
9 Kaay pati koolee ya íncoopiyam mifil músupak meenape,
inci fayik mo paapaa atii payikal péesuume samat nii fa náalafiye fa.
10 Awe incoopoo payikal pa apili kati asampani le niŋ afaaket.”
11 Jakob naañahan íññaa ateyoo Rebeka:
“Pale púnuwam Esawu ahanataahanat inci hanatut.
12 Niŋ paapaa atoom álikaam áfaameyi nii inci láfiyoolafi kincaakool,
afaañanam atasampanam.”
13 Iññáa ateyoo naañahanoo:
“Pañanal empuu píkey ti inci,
añiinam,
síitanam lamma íncaacoopiyam mifil ma.”
14 Jakob náakaacoopii mifil ma naawufan mo íññaa ateyoo apiyik mo payikal péesuume samat nii fa paapaa ateyoo náalafiye fa.
15 Púful toko,
Rebeka naacoop wañ wa uti Esawu añiinoo ácook a weehaŋe wa pawalle weeyeniye wa ti ekumpaan ya,
náasool wo Jakob kahiineen ka.
16 Naalompo áwufalool sipeesoo niŋ ekunoo la hanatut la niŋ upaŋ mifil ma.
17 Fiye,
naawufan añiinoo Jakob paliyal pa péesuume pa niŋ hímpuul ha eeha naasowe ha.
18 Jakob naakaay pati paapaa ateyoo naasok:
“Paapaa.”
Naañahanoo:
“Eeya añiinam,
awe yem ayme?”
19 Jakob naañahan paapaa ateyoo:
“Inci yem Esawu añiini áyaañ a.
Hínaahin samat nii fa ansokaam fa.
Káluma,
yeno illi efoofa ya etoom ancuk aasampanaam.”
20 Isaak naacakan añiinoo:
“Añiinam,
puume áncasii fiye t’écokii élukuleen?”
Naañahanoo:
“Ateeteyo Pútuun pa pitii pípankine pítinam.”
21 Fiye,
Isaak naasok Jakob:
“Añiinam,
kóliyam ancuk inci kati líki pímeyi pánipani man awe yem añiinam Esawu man akina tom.”
22 Jakob naaloh paapaa ateyoo Isaak,
Isaak náalikoo naasok:
“Hilim ha hiti Jakob pale sipees sa siti Esawu.”
23 Akiiwutoo kaatuko sipeesoo seehanate samat nii siti púnuwoo Esawu.
Pale le niŋ afaasampanoo,
24 nene acakanoo:
“Pánipani,
awe yem añiinam Esawu?”
Naañahanoo:
“Ee,
inci yem akina.”
25 Fiye,
naasok:
“Añiinam,
cóopiyam efoofa ya pili ancuk inci sampanuu.”
Jakob náacoopiyoo yo,
naali;
náacoopiyoo lompo elaan,
naalaan.
26 Paapaa ateyoo Isaak naasokoo:
“Añiinam,
kóliyam insumpoolam.”
27 Fiye,
naakaay teyoo,
naasumpooloo.
Ta Isaak náasiye ta haaw wañ wa uteyoo,
naasampanoo naasok:
“Haaw añiinam
hicukaacuk nii haaw hiti kaakit
enka Ateeteyo naasampane.
28 Alímaati Pútuun pa puwufani haamon ha hiti patiila
niŋ hitaaku ha hiti etaam ya:
hícump uli niŋ pucoma elaan.
29 Alímaati hícump písii píyenoonii pimiikani,
pakan paka nkáñeemi.
Alímaati aayeno ati hikaw ha ti pakani,
nkáñeemi.
Alímaati keeñanuu ka kañanee,
keesampanuu ka kasampanee.”
Jakob niŋ íññaayoo Rebeka nkacaakool Isaak apisampan Jakob niŋ kaasampan ka kiti Esawu.
Alímaati Pútuun pa puwufani haamon ha hiti patiila niŋ hitaaku ha hiti etaam ya:
hícump uli niŋ pucoma elaan.
Jakob niŋ íññaayoo Rebeka nkacaakool Isaak apisampan Jakob niŋ kaasampan ka kiti Esawu.
Alímaati hícump písii píyenoonii pimiikani,
pakan paka nkáñeemi.
Jakob niŋ íññaayoo Rebeka nkacaakool Isaak apisampan Jakob niŋ kaasampan ka kiti Esawu.
Alímaati aayeno ati hikaw ha ti pakani,
nkáñeemi.
Alímaati keeñanuu ka kañanee,
keesampanuu ka kasampanee.
Jakob niŋ íññaayoo Rebeka nkacaakool Isaak apisampan Jakob niŋ kaasampan ka kiti Esawu.
30 Ta Isaak naapayoo ta kaasampan,
Jakob náaful.
Emma náafule ma,
púnuwoo Esawu náafulii leema.
31 Akina lompo naamemanool payikal péesuume náacoopii po paapaa ateyoo.
Fiye naasokoo:
“Paapaa,
yeno illi efoofa ya eyya inci iyyike ya,
ancuk aasampanaam.”
32 Paapaa ateyoo Isaak naacakanoo:
“Awe yem ayme?”
Naañahanoo:
“Inci yem añiini áyaañ a,
Esawu.”
33 Isaak naakikilan meemak naasok:
“Ooto ayme ácoopii efoofa naawufanam?
Féefiye inci mpaye hili insampanoo le niŋ áafacolii.
Antúŋ pánipani afaasampanee!”
34 Ta Esawu náasiye ta hilim paapaa ateyoo,
naaceek niŋ kaawiiluyoo naakooŋ kamma paseeña penfakat,
naasok paapaa ateyoo:
“Sampanam,
inci lompo paapaa!”
35 Pale Isaak naasokoo:
“Atuwi ákeyii naacaakoolam naacoop kaasampan ka kitii.”
36 Esawu naasok:
“Fo caacawoo cineetaat Jakob?a
Acaakoolaam-caakool niŋ ñésupak:
Acoopaacoop híhampaatiinate ha hitoom,
fiye acoopaa lompo kaasampan ka kutoom!”
Naacakan paapaa ateyoo,
“Aatowanutam kikee kaasampan?”
37 Isaak naañahan Esawu,
“Inci hínoohin apiyeno ati hikaw ha atii,
ínhin pakanoo púlooŋ kapiyeno pimiikan pa pakateyoo,
uwwufanoo uli wa niŋ elaan ya.
Añiinam,
fiye weyme inci iyyinuu íhinu?”
38 Esawu naasok paapaa ateyoo,
“Paapaa,
fo kaasampan koonool lamma antaake?
Paapaa,
luumuu sampanam lompo!”
Fiye,
Esawu náacoolan meemak.
39 Paapaa ateyoo Isaak naañahanoo:
“Ekínuma ya etii
éfeelaaŋ hitaaku ha hiti etaam ya,
éfeelaaŋ haamon ha hiti patiila.
40 Eloŋ ya etii efeeyeno eti hikam niŋ káalipu,
aafayeno amiikan a ati atuwi.
Pale niŋ áayokiyoo,
áafaful ti kayine ka kiteyoo.”
41 Esawu naanat Jakob kamma kaasampan ka enka paapaa ateyoo naasampanoo ka.
Naasokoolo,
“Eket ya eti paapaa atoom élaaŋut;
tempo inci famuk atuwam Jakob.”
42 Pale Rebeka naakamanee eeha añiinoo áhampaatiin a Esawu naayem ha ti káamiilool,
náayonkalii añiinoo kahiineen ka Jakob naasokoo:
“Púnuwi Esawu oopa ti kaapuuñanool faŋoo niŋ pámiiloolal piti himukuyi.
43 Fiye añiinam,
hín eeha inci nkaakaayi ha hisoku:
tey mpacas pati ahoopam Laban eeyem ya Halan.
44 Yeno pateyoo fo hátikin,
fo ta púnuwi púsusoo efipumon.
45 Niŋ káñiken ka kiteyoo kumuusaa naafiil eeha ánhinoo ha,
inci fápoñiyi ekooŋan áapuñohoonii.
Weyme uwune inci kati púul taaluu t’ésupak aluu hinoom hoonool?”
46 Fiye,
Rebeka naasok Isaak,
“Eloŋ ya ehookaamhook fiye kamma pakaal paka payenke keesoke ka Het maamaa.
Niŋ Jakob lompo asayaa akee teyii le,
fisakaam piket.”