Efantu 26
Isaak niŋ Apimelek
26
Epánkul neeyeno ti mah ma eekufut nii eetaakiye ya ti caanak ca citi Abraham.
Fiye,
Isaak naatoos Kelal pati Apimelek amansa ya ati pakati Filistin.
2 Ateeteyo náafulii teyoo naasokoo:
“Timpi wano Esipt pale caakin ti mah emma inci nkaakaayi ma káyisan.
3 Yeno ti mah emmuu samat nii akaawoola,
inci fayeno niŋ awe insampani.
Inci fawufani pitaam empe púlooŋ,
awe niŋ keesokuu maamaa.
Fáhin eeha inci insintooliye ha faafi Abraham.
4 Inhín keesokuu maamaa kapimeeŋ samat nii picaaŋaŋ pa uwwufanii pitaam empe púlooŋ,
pínapii teyii písii pa púlooŋ piti etaam ya efipisampanee.
5 Kaatuko Abraham ásiitanaam-síitan náahin eeha inci insokoo ha naacok kilim ka kutoom niŋ pítin pa putoom niŋ kilim ka keesiiŋanee ka kutoom.”
6 Fiye,
Isaak naakin Kelal.
7 Pakan paka pakati mah ma nkacakanooloo ti pututayoo niŋ Rebeka.
Naañahanii:
“Aŋe ahoopam.”
Aháañiit hisoku nii Rebeka aaloo kaatuko afeyaafe timpi kamukoo kamma aaloo naayem ecuumaka.
8 Isaak naakampan po.
Hikee hinoom,
Apimelek amansa ya ati pakati Filistin náacuuhan ti epalloolu ya eteyoo naacuk Isaak ti pahaaño niŋ aaloo Rebeka.
9 Apimelek náayonkaliyoo naasokoo:
“Pánipani aŋe aali!
Weyme uwune ansok nii aŋe ahoopi?”
Isaak naañahanoo:
“Inci hínaahin eehuu ti kafeyatan timpi kamukam kamma akina.”
10 Apimelek nene asokoo:
“Weyme ánhine unii fiye?
An antaahinto hínum niŋ aali,
intiyan unii himuuyen.”
11 Naayonkal pakan paka púlooŋ naasokii:
“An óo an aŋa éehaañiye híliku áyiin a aŋe niŋ aaloo afaamukee.”
12 Isaak naaya ti oom mah,
ti oom etiil naamaañ kaamaañ kenfakat kamma kaalat óo kaalat enka naasuke nkipenaniye fo keme,
kaatuko Ateeteyo asampanoo.
13 Hitaaku ha hiti Isaak híyekuniit ti epenano fo náayenoonii usaanum.
14 Naataak hícump pukoolee piti písaacii,
pifil niŋ síis niŋ kayoŋ pimiikan fo pakati Filistin nkataake paheeka teyoo.
15 Ta paapaa ateyoo Abraham naayeniye ta kaloŋa,
pimiikan pa pakateyoo kawakaawak písaapun.
Paheeka pa piti pakati Filistin mpuwun nkahokan oom písaapun.
16 Fiye,
Apimelek naasok Isaak:
“Aáyenooniyoo eehaŋe unii sempe meemak,
fúl le nkaay.”
17 Isaak naatoos ti hiyanu ha heesooŋe ha hiti Kelal naakin toko.
18 Náawaakin písaapun pa peewakee pa ti caanak ca citi paapaa ateyoo Abraham,
empa pakati Filistin nkahokane pa paketal Abraham.
Naañahan po ucaw ewwa faafoo mpaalu po wa.
19 Hikee hinoom,
pimiikan pa pakati Isaak nkawak ésaapun lati hiyanu ha heesooŋe ha nkacol ti káapun kenfakat.
20 Pale pufaasa púlukuleen pa pakati Kelal nkáñakalool yo niŋ pufaasa púlukuleen pa pakati Isaak,
nkasokii:
“Man emme mutoonii.”
Ekina ewune Isaak naalu ésaapun eyyuu caacaw ca Esek (ekina eyem “píñakalool”) kaatuko káñakaloolaa-ñákalool yo neyoo.
21 Fiye,
pimiikan pa pakati Isaak nene kawak ésaapun ésupiyenu nene etaak píñakalool.
Isaak naalu yo caacaw ca Sitina (ekina eyem “pítaakool”).
22 Apúful toko naacaawak ésaapun éhaaciyenu eetaakut píñakalool,
naalu yo caacaw ca Lehopot (ekina eyem “káahaaŋ”) naasok:
“Fiye Ateeteyo áwufaniyoo unaa káahaaŋ.
Uyíniyaayini piyeno kusaanum ti mah emme.”
23 Isaak náaful toko naasilo Beerseba.
24 Oom hánant Ateeteyo náafulii teyoo naasokoo:
“Inci yem Pútuun pa piti faafi Abraham;
timpi fe kaatuko inci oopa niŋ awe,
fasampani ínhin keesokuu maamaa kapimeeŋ kamma Abraham amiikan a atoom.”
25 Isaak naalut kaaciin naaluum ti caacaw Ateeteyo.
Naasiiŋan toko ékuut ya eteyoo,
pimiikan pa pakateyoo nkawak toko ekee ésaapun.
26 Po hátikin,
Apimelek náakey hiyoop Isaak ápufulii Kelal náanapoolii niŋ Ahusat aŋa nawunoo ya kunuu niŋ Fikol áhampaatiin a ati pusoocaali pa pakateyoo.
27 Isaak naacakanii:
“Weyme uwune ínnikeyyam hiyoop apan ninataam-nat inniyaanam lataaluu?”
28 Nkañahanoo:
“Ucukaacuk picaaŋ cataŋ nii Ateeteyo oopa niŋ awe,
núumiilool eehe nii,
unaa uñaŋaa hiliilu písiyool nuusintooliyaa kati utaakaa kásuumaay.
29 Sintoolo nii áatihin unii heenaput samat nii fa núuhinuti fa heenaput pale heenape lamma núuhinuu,
nuukatani aapikaay ti kásuumaay.
Fiye,
awe áyiin eesampanee ati Ateeteyo.”
30 Isaak naamemanoolii paliyal,
nkali nkalaan.
31 Eti kacom eteyyo mpucom mic an óo an ti poko t’ésupakii naasintoolo,
Isaak náatiŋanii nkákatinool ti kásuumaay.
32 Ti oom hinoom,
pimiikan pa pakati Isaak nkákey káatuunanoo hilim héesuume hiti ésaapun eyya nkayeniye kaawak,
nkasokoo:
“Unii ucolaacol ti man.”
33 Fiye,
Isaak naalu ésaapun eyyuu caacaw ca Sepa (ekina eyem “esintoolo”) ekina ewune fo fíyooy,
saatee ya nesokee Beerseba (ekina eyem “ésaapun eti esintoolo”).
Esa ya eti Esawu